MAZMUR 30 - KITAB NU TUMPU ALLA LELE MA'IMAI'

Do'a bau pontalima kaseh

¹ Mazmur i Daud. Nyanyian anu onyanyi momposawe'imo Laigan nu Tumpu.

² Aku mompuji'mo Belento o Tumpu, kalana Belento nomposalamatmo mae aku ka' madi'mo nompojohok sampobali'ku lewa' nongkokojoi mae aku.

³ O Tumpu-ngku, aku notataemo daka-daka' nomoita tulung hi Belento ka' Belento nompo alinmo mae aku.

⁴ Belento nompoluputmo mae aku da madi' sinilaka, ka' nompotumuu'mo mae aku da madi' sinilaka susumo mian sangga'at anu sinilakamo.

⁵ Nyanyi na nyanyian bau pompuji-puji' Tumpu, o mian anu palesayamo hi Ia ka' tulu-tulutan ka' mule' pontalimakasehmo hi Ia Anu Susi' hondo.

⁶ Kalana ola ahi' sasaingoni' na Tumpu motambuha' Kanonongan-Nyo na sidu-sidutu' ahi' i uno nu kantumuu'anto. De pihimo aku humangmo, panyo salatan sinaa bete'mo mae ia momboamo mae anu momposanang kinyonyoa.

⁷ Salatan ku oa'i madi'mo ko anu lewa' mae mompoposia, aku notataemo, “Aku madi' opoko ala ohungku'i!”

⁸ Kalana Belento manonong ahi' mae hi belengku, o Tumpu, Pinotimbalimo nu Belento na aku susumo bungkutnyo nu batu anu mahoson. Panyo mamanga ahi' Belento naninsulukmo da madi' ku toa, ka' aku nabuhukmo.

⁹ Hi Belentomo o Tumpu na aku mo motatae, hi Tumpu ahi' na pongkakaseanku,

¹⁰ “Apaa na gunanyo hi Belento de aku silakamo, ka' mintatau'mo iliang nu kubun? Te daagi' jadi na mian anu sinilakamo mompuji' Belento, ka' mule' mombebakon kanonongan nu Belento?

¹¹ Potombihingakon mae o Tumpu ka' kalibosiakon mae na aku. O Tumpu tulungiakon mae na aku!”

¹² Haangku pinojadimo nu Belento tarian anu lame' Ingalamo nu Belento na kasusa'an nu kinyonyoangku ka' pinobuke'anmo nu Belento na aku nu kalame'an.

¹³ Sahingga aku madi'mo ola momohokot; ku nyanyimo na nyanyian anu bau pompuji' Belento, o Tumpu-ngku, ka' montalima kaseh hi Belento sampe toka sidu-sidutu'!