MAZMUR 26 - KITAB NU TUMPU ALLA LELE MA'IMAI'

Do'a nu mian anu madi' kokasala'annyo

¹ Mazmur i Daud. Bee'i mae ka'adilan na aku, o Tumpu, kalana kinyonyoangku hodi' hondo i uno nu kantumuu'anku. Aku montaha'imani hondo Tumpu, ka' madi' hondo bata-bata maumo ola sangkiding.

² Selidiki mae na aku, o Tumpu, ka' uji' mae na aku, palesamo mae na anu ku kahanda'i tiba pikilanku.

³ Aku saja' monginau' kalibosan nu Belento, ka' saja' tulu-tulutan hi Belento.

⁴ Aku madi' mongka'oho' maninggalum tiba anu saja' mongakali, kabai mogandi-gandian tiba mian nu tageo' na kinyonyoanyo.

⁵ Ku ka'ideki na posa'angu'an nu mian anu mombau palabuatan ma'idek, mian anu lewa' mombau palabuatan anu ma'idek madi' paninggalumanku.

⁶ Ku baso'i na limangku salaku bau pontandai madi' kokasala'an, ka' lumajang montikubi mezbah nu Belento, o Tumpu,

⁷ Ka monyanyi nyanyian anu bau pontalima kaseh, ka' mombebakon apaa na anu binaumo nu Belento, anu talalo hondo okabangangi.

⁸ Aku mongka'ima'i hondo Laigan nu Belento, o Tumpu, tampat kajojoongan nu Belento anu talalo hondo talasanggo.

⁹ De mompateimo mian anu baladosa', boli tibamo aku na opatei, kabai monggautmo nyawa nu mian anu saja'mo nombubusakon, baso' boli tibamo nyawangku na ogaut.

¹⁰ Aha saja'mo nombau palabuatan anu ma'idek, ka' saja' mongindi da otamboi na mombau palabuatan anu ma'idek.

¹¹ Panyo kinyonyoangku hodi' hondo i uno nu kantumuu'anku, kalibosiakon mae na aku, ka' pobebasakonmo mae na aku.

¹² Sahingga iwi-iwi' na balaa' madi'mo ko anu montokai mae aku, aku mompuji'mo Tumpu i uno nu posa'angu'an nu mian anu palesayamo hi Ia.