MAZMUR 24 - KITAB NU TUMPU ALLA LELE MA'IMAI'

Tomundo' anu talasanggo

¹ Mazmur i Daud. Tano' aiya ka' isinyo iwi-iwi' anu nu Tumpu, dunia aiya ka' iwi-iwi' na anu jojoong i unonyo.

² Ia nompokokomo salaku bau katinjoannyo ibawo nu ndalangon, ka' pinotinjomo i bawo nu uee anu maleng hondo.

³ Ihe na moko ala mindako i Bungkutnyo nu Tumpu, ka' minsoop i uno nu Laigan-Nyo?

⁴ Mian anu madi' ko alunyo na pikilannyo ka' madi' mombau anu ma'idek, anu madi' mimpula-pula basumpa' ka' madi' monsombah pilogot.

⁵ Iamo na anu nu balakati ka' nuposalamat nu Tumpu, ka' anu nupoto'imo nu Tumpu Allah na ia madi' ko kasala'annyo.

⁶ Sumo aijo' na mian anu tokamo mae mangadap hi Tumpu Allah, anu tokamo mae monsombah Tumpu Allah i Yakub.

⁷ Po'ewa na montuhea'akon sabatan daka' anu pini-pininmo, da minsoopmo na Tomundo' anu talasanggo aijo'.

⁸ Ihe na Tomundo' anu talasanggo aijo'? Aijo'mo Tumpu anu baani hondo: Tumpu anu mongkuasai iwi-iwi' anu saja' mohumpak ka'untungan de mahampate.

⁹ Po'ewa na montuhea'akon sabatan daka' anu pini-pininmo, da minsoopmo na Tomundo' anu talasanggo aijo'.

¹⁰ Ihe na Tomundo' anu talasanggo aijo'? Tumpu Anu Daka' hondo na Kuasanyo, Iamo na Tomundo' anu talasanggo!