MAZMUR 22 - KITAB NU TUMPU ALLA LELE MA'IMAI'

Do'a de susa'mo ka' nyanyian bau pompuji' Tumpu

¹ Anu mongkapalai panyanyi. Lagunyo ingala i lagu nu nyanyian: Jonga de sinaa tolohinsi'mo mae. Mazmur i Daud.

² O Tumpu-ngku, Tumpu-ngku, kadaka' Belento nompala'imo aku? Aku kahanda' mongkakase, panyo Belento sabole-boleh mojo'on ka' madi' mae montulungi aku.

³ O Tumpu-ngku, aku nongkakase sina-sinaa, panyo Belento ola ahi' nomohokot. Aku binalado'a pihi-pihi, panyo kinyonyoangku madi' ahi' tenda.

⁴ Panyo Belento Tomundo' Anu Susi' hondo, anu saja' lewa' opuji' nu mian Israel.

⁵ Mompolee' mami montaha'imani Belento, aha montaha'imani, ka' pinosalamatmo nu Belento na aha.

⁶ Aha mongkakasemo da otulungi, lantas aha madi'mo sinilaka; aha montaha'imani, lantas aha madi'mo ingise-ise' na kinyonyoa nu aha.

⁷ Panyo aku aiya ias, misa' manusia, o'alu ka' opopo'ambang nu mian da'isan.

⁸ Iwi-iwi' na mian anu montoa mae aku, lewa' mongkokojoi aku, mombiu mae ka' mahabilokan.

⁹ Aha notatae, “Bakas da ia taha'iman hi Tumpu, da nuposalamat nu Tumpu na ia, de sanang na Tumpu hi ia!”

¹⁰ Belentomo na nonsabatakon mae aku lengkat i ma'alum tinangku, ka' nonjagaimo mae da madi' ko anu nompoposia tangku-tangkung itinangku.

¹¹ Salatanmo pe'e aku i hampe, sisi'ku aiya kongko-kongkom i lima nu Belento, salatanmo pe'e i uno nu ma'alum nu tinangku, Belentomo na Tumpu-ngku.

¹² Boli matikojo'on hi belengku, kalana balaa' anu montokai mae ingohanimo, ka' madi' ko anu montulungi.

¹³ Sumomo ahi' gombuan nu sapi', na sampobali' nohuntumo mae aku, sumomo ahi' sapi' ma'ela' anu lengkat i Basan na aha nontikumo mae aku.

¹⁴ Aha nongahopi mae aku nganga' nu aha singkapmo tinolo anga', sumomo singa anu nohuu'akonmo ka' monsa'umo.

¹⁵ Kahosonanku iningkotmo sumomo uee anu tinombulokmo, iwi-iwi' na bukungku tinalabakasmo i losuannyo, kinyonyoangku jinumujumo susumo lilin.

¹⁶ Gogohongku notismo susumo kubengan nu palasilen jila'ku naningkampitmo i ngahangku. O Tumpu, pinala'ianmo nu Belento na aku aijo' i abu' susumo mian anu sinilakamo.

¹⁷ Aku tinikumo nu gombuan nu mian anu ma'idek na kinyonyoanyo; susumo ahi' gombuan nu dedeng na aha mohuntumo mae aku, nompahansusukakonmo mae limangku ka' tengkengku.

¹⁸ Iwi-iwi' na bukungku tinimbalimo ku bilang, sampo bali'ku lewa'mo mae nontonto'i aku susumo han anu lewa' opotoakon.

¹⁹ Aha nombagi-bagimo baju'ku, ka' binuangakonmo onde na jubahku.

²⁰ Panyo Belento, boli matikojo'on, o Tumpu, tokamo mae lia-lia' montulungi aku kalana olamo hi Belento na kahosonanku.

²¹ Potuu'akon mae na nyawangku da boli nusilakai nu bajak, posalamatakon mae na aku da boli nusa'u nu dedeng.

²² Aku madi'mo moko ala mombau apa-apaa, potuu'akon mae na aku da madi' nutanduk nu sapi' ka' mule' da madi' nusa'u nu singa.

²³ Apa-apaa na anu nubau nu Belento tionyo ku sisik hi to utu-utusku; de mompahasingka-singkabotmo tiba to mia-mian anu palesayamo hi Belento ku puji-puji'mo na sanggo nu Belento.

²⁴ Opuji' na Ia, o to mia-mian anu mohongo-hongo Tumpu! Opopodaka' na Ia, iwi-iwi' na mian lee' mae i Yakub! Osombah na Ia, iwi-iwi' na mian lee' mae i Israel!

²⁵ Kalana Ia madi' mongkahegati anu nohumpakmo kasansala'an, ka' madi' mompopo'ise' mian anu sinansala'mo. Ia madi' mongkamaalin mian anu sumo aijo'mo, panyo mohongo, de aku momoita tulung mae hi Ia.

²⁶ De sihukmo na mian aku mompuji'mo Belento, kalana iwi-iwi' apaa na anu binaumonu Belento. I ahop nu mian anu mohongo-hongo Tumpu ku sombahkonmo na koloban anu jinanji'kumo.

²⁷ Miana nu kasiasi mongkaan sampe mobosu; mian anu tokamo hi Tumpu mompuji'mo Ia. O'amalakon da komiu mohumpak ka'ima'an sampe toka sidu-sidutu'!

²⁸ Iwi-iwi' na bansa tionyo ahi' monginau' Tumpu ka' po'ule' mae minsusule' hi Ia, iwi-iwi' na tulunan nu bansa tionyo tolodadupu monsombah Ia.

²⁹ Kalana Tumpu na mongkuasai, Ia na mompalentah to bansa-bansa.

³⁰ Iwi-iwi' na mian anu talasanggo tionyo tolodadupu i ahop-Nyo, iwi-iwi' na manusia anu madi' tumuu' batu tionyo tolodadupu hi Ia.

³¹ To mia-mian anu tumuu' aiya mae i ahop tionyo monsombah Tumpu, Ia obebakonmo nu aha molapi-lapis mae na tulunan.

³² Toka hi bansa anu hampeje aiya mae i ahop tionyo opoleleakon aijo'mo Tumpu nomposalamatmo mian anu palesayamo hi Ia.