MAZMUR 21 - KITAB NU TUMPU ALLA LELE MA'IMAI'

Opuji' na Tumpu kalana inguntungmo na nahampate

¹ Anu mongkapalai panyanyi. Mazmur i Daud.

² O Tumpu, i tomundo' i lame'mo kalana Belento nombee'imo kahosonan ia; ia ilame'mo kalana ka'untungan nahampate anu binee'mo nu Belento hi ia!

³ Binee'mo nu Belento apaa na anu kinahanda'anmo nu kinyonyoanyo ka' nombee'mo apaa na anu pinoitanyomo.

⁴ Belento tinokamo hi ia nomboai balakat anu manjoo' hondo, ka' nomposongko'mo makota' mosoni' i ubaknyo.

⁵ Ia nongkakase kantumuu'an, lantas binee'mo nu Belento hi ia, ka' mule' da pin na tumuu' sampe toka sidu-sidutu'.

⁶ Kalana tinulunganmo nu Belento, ia ingangga'anmo hondo pinotimbalimo nu Belento na ia da tinalasanggomo ka' binilahimo.

⁷ Saja'mo binalakatan nu Belento na ia; Belento tinokamo hi ia sahingga ia ilame'mo hondo.

⁸ I tomundo' saja' hondo montaha'imani Tumpu Anu Matangkas na Kuasanyo ia saja' nukalibosi nu Tumpu kalana aijo' ia madi'mo ko anu saja' mompoposia.

⁹ Nuboamo iwi-iwi' na anu monsampobali' ia ka' nu hakopmo iwi-iwi' na mian anu mongka'ideki Ia.

¹⁰ Ia toka mae sumo apu anu moakmo kahanda'mo mompatei aha. Tinambuha'anmo nu Tumpu na aha kalana aitu aha ohopu'imo, ka' nuangotimu nu apu.

¹¹ Lee' mae nu aha madi'mo ko anu tontuha' nupateimo i tomundo' na aha iwi-iwi'.

¹² De aha ko tanga'an kahanda' mongewa i tomundo' maumo pa' mosia na akan nu aha madi' nupoko ala nu aha.

¹³ Nu peletakonmo na pana'-Nyo, sahingga aha mombalikakonmo ka' mopalaimo.

¹⁴ Opuji' mami na Belento Tumpu, kalana daka' hondo na kuasa nu Belento, kami manyanyi mompuji' kabaanian nu Belento.