MAZMUR 20 - KITAB NU TUMPU ALLA LELE MA'IMAI'

Do'a mongkakase da obee'i mae ka'untungan na mahampate

¹ Anu mongkapalai panyanyi. Mazmur i Daud.

² O'amalakon da Tumpu montaami mae beleyum de nutokaimo nu kasusa'an, O'amalakon da kuasa nu Tumpu i Yakub monjagai mae beleyum!

³ O'amalakon da Ia mompakatu mae bau pontulungi lengkat mae i Laigan-Nyo, ka' mombee'i mae bau pontulungi lengkat mae i Bungkutnyo nu Sion.

⁴ O'amalakon da iwi-iwi' na anu sinombahkonmo nu beleyum nu inau' mae, ka' sanang na Ia i koloban nu beleyum iwi-iwi' anu opotunu.

⁵ O'amalakon da iwi-iwi' na anu nu kahanda'i nu beleyum Nubee' mae sahingga iwi-iwi' na anu nu tangani mingkaliangan.

⁶ Jadi kami montaligalaimo kalana lame'mo, kalana beleyum inguntungmo na nahampate, ka' nohangkatmo bandela' bau pompuji' Tumpu-nto. O'amalakon da Tumpu mombee' mae iwi-iwi' apaa na anu pinoitamo nu beleyum.

⁷ Uuka aiya sinumbu'kumo taalu' Tumpu mombee'imo ka'untungan mahampate hi tomundo' anu pinile'an-Nyomo. Tumpu nontaamimo ia lengkat mae i suluga'-Nyo anu susi' hondo; kalana kuasa nu Tumpu ia nohumpakmo ka'untungan nahampate anu daka' hondo.

⁸ Daagi' ko mian anu montakabunakon kaletanyo anu opake mahampate, daagi' mule' ko anu montakabunakon ajahannyo. Panyo kita montakabunakon kuasa nu Tumpu, Tumpu-nto.

⁹ Aha tosumpun ka' tondahapamo panyo kita mobungkut ka' tuminjo mahoson.

¹⁰ O Tumpu, bee'iakon ka'untungan mahampate na i tomundo', taami mae na kami de kami mongkakasemo.