MAZMUR 2 - KITAB NU TUMPU ALLA LELE MA'IMAI'

Tomundo anu pinile'anmo nu Tumpu

¹ Kadaka' to bansa-bansa nombaumo anu moko hengge' ka' to tulu-tulunan nu bansa montanga'imo mombau anu madi' mingkaliangan?

² To tomu-tomundo' nu dunia singkapmo sinumikakan tinuminjo ka' to mia-mian anu montoongi kakuasa'an binasale'mo mongewa Tumpu ka' tomundo' anu pinile'an-Nyomo.

³ Anu montoongi kakuasa'an haha aijo' notataemo, “Imbo' da opaha pato'imo na kakuasa'an nu aha da o'alantomo na kamaladeka'anto!”

⁴ Kiita' mae i kasuhangan-Nyo i suluga' Tumpu kinumojomo ka' mompisala'i apaa na anu tinanga'anmo nu aha.

⁵ Lantas notambuha'mo na Ia ka' sinegan-Nyomo na aha, ka' tinolokengkengmo kalana Ia notambuha'mo.

⁶ Ia notatae, “Kiita' mae i Sion puge'Nyo anu susi' aijo' anung-Ku i hangkatkumo na tomundo' anu pinile'an-Kumo.”

⁷ Notataemo na tomundo', “Ku bebakonmo apaa na anu tinantukanmo nu Tumpu. Ia notataemo hi belengku, ‘Beleyum ana-Ku mo'ane, sinaa aiya aku timbalimo Tuuma nu beleyum.

⁸ Poitamo mae, saba' iwi-iwi' na bansa Ku bee'mo hi beleyum, ka' songko-songko na dunia Ku bee'mo beeyumo na tumpunyo.

⁹ Aha iwi-iwi' nu pato'imo nu tokon besak ka' nu biha'mo susumo kuhon tano'.’ ”

¹⁰ Jadi intomakon, o to tomu-tomundo', boli okolilimi, o belemiu iwi-iwi' anu montoongi kakuasa'an nu dunia!

¹¹ Sabole-boleh Tumpu na osombah ka' okabuhuk ka' tuluti na palentah-Nyo,

¹² nu lakat ahi' na tolodadupu i ahop-Nyo, dumo ahi' nutambuha'i nu Tumpu ka' ola sangkinihap belemiu opateimo, kalana ia motambuha' pojohinjit sumo apu. Mohumpak ka'ima'an na mian anu mihohung hi Tumpu!