MAZMUR 19 - KITAB NU TUMPU ALLA LELE MA'IMAI'

Talasanggo hondo na Tumpu kalana apaa na anu pinodaagi'mo ka' mule' kalana atulan-Nyo

¹ Anu mongkapalai panyanyi Mazmur i Daud.

Talasanggo hondo na Tumpu kalana apaa na anu pinodaagi'-Nyomo

² Langit nompotoamo katalasanggoan nu Tumpu, ka' aita' langa nompoto'imo kalaja-Nyo.

³ Sinaa momona nompoto'imo hi sinaa anu molunduakonmo; pihi momona nonsisikakonmo hi pihi anu mombolosakonmo.

⁴ Madi' ko anu binasisik kabai notatae, madi' ko potatae anu i hongo.

⁵ Panyo loungnyo nu onyi'nyo sinongkomo na dunia, potunon aijo' tinoka-tokamo i puus nu tano'. Tumpu nombauimo laigan aita' i langit bau kajojoongan nu batu nu sinaa,

⁶ daagi' subu-subu ia tolohinsi'mo mae susumo panganteng mo'ane mosabatmo mae, lengkat i salipi'nyo susumo mian anu baani hondo lame'mo na ia malalangkasmo.

⁷ Ia nontusakonmo langit lengkat pe'e mae i puusnyo toka-toka i puusnyo; madi'ko anu madi' nukona nu panasnyo.

Atulan nu Tumpu

⁸ Atulan nu Tumpu aijo' sinukupmo hondo, mompokopiani santuu'. Palentah nu Tumpu timbali opalesaya, mombee'i kapandean bapikin hi mian anu madi' talalo pande.

⁹ Palentah nu Tumpu aijo' sinosokmo hondo, momposanang kinyonyoa. Apaa na anu tinantukanmo nu Tumpu aijo'mo na anu sahondo-hondonyo, mombau mian da mangalati'.

¹⁰ Monsombah Tumpu aijo' ma'ima' sampe toka sidu-sidutu'. Atulan nu Tumpu aijo' totu'u ka' adin iwi-iwi'.

¹¹ Atulan nu Tumpu lebe ko angga'nyo molingkudui mosoni' anu madi' ko galo'nyo, lebe matami' molingkudui juu' nu uwani' anu madi' ko galo'nyo.

¹² Posaihon nu Belento pinokinde'anmo nu atulan aijo' iwi-iwi; daka' hondo na tambonyo obee' hi mian anu mohongo-hongo.

¹³ Madi' ko anu monsumbu' kasala'annyo; O, Tumpu, pobebasakon mae na aku i kasala'an anu sulu-suluk.

¹⁴ Pojo'onakon mae na aku i dosa' anu ototonggolakon, boli opojohok na aku nukuasai nu dosa' susumo aijo'. Sahingga aku madi' ko kasala'an, ka' bebasmo madi'mo molanggai atulan anu maboat.

¹⁵ Ku' amalakon da potatae ka' pikilanku nutalima nu Belento O Tumpu, anu monjagaimo mae ka' anu nontokongimo aku.