MAZMUR 17 - KITAB NU TUMPU ALLA LELE MA'IMAI'

Do'a nu mian anu madi' ko sala'nyo

¹ Do'a i Daud. Potombihingakon mae na anu ku poita aiya mongkakase ka'adilan, tutugiakon mae na do'angku aiya anu sahondo-hondonyo, o Tumpu.

² De timbali tinjohiakon mae na palakalangku aiya kalana Belentomo na monsumbu' apaa na anu totu'u.

³ De Belento monguji' kinyonyoangku ka' de pihi na toka mae mompalesa aku, tantu osumbu'je nu Belento na aku memang ahi' sahondo-hondonyo na kinyonyoangku; potataengku madi' sala' sumomo ahi' pikilanku.

⁴ Aku nombaumo anu pinalentahkonmo nu Belento ka' madi' nonggunakon jalan anu mingkinyonyoa singgi.

⁵ Aku saja' tinumuu' nombatuki pokinde' nu Belento ka' madi' noteba' i jalan sangga'at.

⁶ Aku nomoita hi Belento, o Tumpu, kalana Belento nontaamimo mae aku; tutugiakon mae na aku ka' potombihingakon mae na potataengku.

⁷ Potoa mae na kalibosan nu Belento anu talalo hondo okabangangi kalana nuposalamat nu Belento na mian anu mihohung hi Belento, i sohipi' nu Belento madi' ko anu mompoposia aha ka' madi'mo ko anu molambani mae na sampobali' nu aha.

⁸ Potuu'akon mae na aku susumo batu nu mata nu Belento, posulukakon mae na aku i uno nu polipik nu Belento na montindungi mae aku

⁹ de aku nu lambanimo mae nu mian anu ma'idek na kinyonyoanyo. Aku tinikumo nu sampobali' anu kahanda'mo mompatei mae aku;

¹⁰ aha madi'mo ko kalibosan ka' motatae ko bubuunmo.

¹¹ Aha tinokamo mae mongewa aku ka' nontikumo aku, moliomo kasampatan montua'akonmo aku.

¹² Aha sumomo singa anu kahanda'mo monsa'u kaanonnyo, singa bata'nyo na anu labot monsa'u i tampat pinatisulukannyo nontampungi.

¹³ Tinjomo mae, o Tumpu, ewakonmo na sampobali'ku ka' patundu'mo na aha. Posalamatakon mae na aku nu bajak nu Belento, de aku nulambanimo mae nu mian anu ma'idek na kinyonyoanyo.

¹⁴ Boli mae na aku nupoposia nu to mia-mian anu montambun halata' nu aha i dunia aiya. Hukum na aha nu balaa' anu pinotoukamo nu Belento pohukum aha. Ka' to maku-makumpu nu aha suele ahi' o hukum.

¹⁵ Panyo aku na daagi' ahi' montoa Belento, kalana aku madi' ko kasala'an. Salatan aku mobulamo, kinyonyoangku lame'mo kalana Belento tokamo mae.