MAZMUR 16 - KITAB NU TUMPU ALLA LELE MA'IMAI'

Do'a anu totu-totu'u ahi' opalesaya

¹ Jagaiakon mae na aku, o Tumpu, kalana hi Belento-Mo na pihohunganku.

² Aku notataemo, “Belentomo na Tumpungku, bau kabilahianku, madi' ko anu molingkudui Belento!”

³ Ku angga'i hondo na to mia-mian anu susi' i lipu' aiya; anu ku ka'ima'i hondo aijo'mo jojoong hingga-hinggat tiba aha.

⁴ Pojohok na mian anu monsombah to pilo-pilogot mompaka pintuangmo na kasusa'an nu kinyonyoanyo. Aku madi' mongka'oho' mombee' koloban hi to pilo-pilogot, ka' mule' madi' mongka'oho' monsanggo sanggo nu aha.

⁵ O Tumpu, olamo Belento na anu daagi' aiya hi belengku; Belento na mombee' mae iwi-iwi' anu ku palalui, kantumuu'anku pa' mosia itina' kongko-kongkom i lima nu Belento.

⁶ Totu-totu'u ma'ima' hondo apaa na anu nubee' mae nu Belento hi belengku, talalo hondo momposanang kinyonyoangku!

⁷ Aku mompuji' Tumpu anu nompokinde'imo mae aku; maumo pihi, uutu i uno nu kinyonyoangku mombee'i mae pangajalan aku.

⁸ Aku saja' monginau' Tumpu; Ia saja' aitu koko hi belengku, sahingga kinyonyoangku madi' mongabali'.

⁹ Kalana aitu kinyonyoangku i lame'mo ka' santuu'ku nontaligalaimo, ka' butongku ningkainmo madi'mo ko anu nompoposia.

¹⁰ Kalana Belento madi' mompojohok aku da silakamo; mian anu nukalibosi nu Belento madi' nupojohok nu Belento da silakamo.

¹¹ Pinotiju'mo mae nu Belento hi belengku na jalan anu mompanjolongi kantumuu'an; hi Belento na pohumpakanku kalame'an anu taha-tahahumo ka' kabilahian sampe toka sidu-sidutu'.