MAZMUR 148 - KITAB NU TUMPU ALLA LELE MA'IMAI'

Langit ka' tano', opuji' na Tumpu!

¹ Opuji' na Tumpu! Opuji' na Tumpu, o isi iwi-iwi' na suluga'! Iwi-iwi' na anu jojoong i tampat anu matangkas opuji' na Ia!

² Opuji' na Ia, o, iwi-iwi' na malaekat-Nyo, opuji' na Ia o iwi-iwi' na suludadu nu suluga'!

³ Opuji' na Ia, o batu nu sinaa ka' bitu'on, opuji' na Ia, o to manda-mandala' anu lewa'jongkilaban.

⁴ Opuji' na Ia, Opuji' na Ia, o uee anu aita' i langit!

⁵ Tionyo ahi' aha iwi-iwi' mompuji' sanggo nu Tumpu, kalana iwi-iwi' pinotimbalimo nu palentah-Nyo.

⁶ Ia na nontantukanmo tampatnyo toto sa'angu', palentah-Nyo sabole-boleh opake sampe toka sidu-sidutu'.

⁷ Opuji' na Tumpu, o isi iwi-iwi' na dunia, o iwi-iwi' na ulo toto daka-daka' i ambai ka' songko songko na ndalangon;

⁸ o kilat ka' ujan eis, ujan batu ka' kundom, baleba' anu makansang hondo anu pinalentahmo nu Tumpu!

⁹ Opuji na Ia, o puge'nyo iwi-iwi' ka' bungkutnyo iwi-iwi', to kau-kau' anu mimbua' okaan ka' songko-songko na alas;

¹⁰ iwi-iwi' na potuu'on ka' binatang anu ma'ela', iwi-iwi' na binatang anu jumolo ka' to tomo-tomonsi'!

¹¹ Opuji' na Ia, o to tomu-tomundo' ka' iwi-iwi' na bansa, to mia-mian daka' ka' anu ko kakuasa'an;

¹² iwi-iwi' na to oli-olitau ka' to lalangkoyang, mian anu motu'amo ka' anu ma'isa motu'a.

¹³ Tionyo ahi' aha iwi-iwi' mompuji' sanggo nu Tumpu, kalana sanggo-Nyo lebe talasanggo molingkudui iwi-iwi' na sanggo; katalasanggoan-Nyo lebe matangkas molingkudui langit ka' tano'.

¹⁴ Ia nompohosonmo bansa-Nyo, sahingga Ia lewa'mo nupuji' nu mian anu pinalesayamo hi Ia, Israel, mian anu nu kalibosi. Opuji' na Tumpu!