MAZMUR 147 - KITAB NU TUMPU ALLA LELE MA'IMAI'

Pompuji Tumpu Anu Daka' na Kuasanyo

¹ Opuji' na Tumpu! Kalana lebe ma'ima' mompuji' Ia, ka' momposanang de monyanyiakonmo bau pompuji' ia!

² Tumpu po'ule'mo mompotinjo Yerusalem; to mia-mian anu i hakop ka' binoamo, po'ule'mo Nu sule'akon mae.

³ Ia nompa'alinmo mian anu madi'mo ko anu opitaha-taha'imani, ka' mombobodimo iwi-iwi na bela nu aha.

⁴ Ia na montantukan konjoo'nyo nu binatang aita' i langa, ka' toto sa'angu' binee'annyomo sanggo.

⁵ Daka' hondo na kuasa ka' opalias hondo na Tumpunto, kapandean-Nyo talalo hondo manjoo'.

⁶ Ia mohangkat mian anu pinosakisamo panyo mian anu ma'idek na kinyonyoanyo Nu lumbu'akonmo i tano'.

⁷ Nyanyiakon na nyanyian pompuji-puji' Tumpu, pahaikakon na kasapi' bau pompuji' Tumpunto.

⁸ Iamo na nompobi kundom aita' i langit; Iamo na nompotouka ujan pongujani tano', ka' nompotumuu' hemput i puge'nyo.

⁹ Ia na nombee'i anu okaan binatang, ka' hi soma' nu papaa' anu lewa'mo molokes molio tinanyo.

¹⁰ Anu nuka'ima'i nu Tumpu misa' ajahan anu mahoson; ka' misa' mule' ahi' suludadu anu baani.

¹¹ Tumpu sanang hi mian anu tulu-tulutan, hi mian anu sabole-boleh montaha'imani kalibosan-Nyo mae.

¹² Opuji' na Tumpu o Yerusalem! Opuji' na Tumpu Allah nu beleyum o Sion!

¹³ Kalana Ia nompohosonmo iwi-iwi' na sabatan daka' nu beleyum, ka' mombalakatimo mian anu jinojoongmo hi beleyum.

¹⁴ Ia na monjagai da'erah nu beleyum da sabole-boleh madi' ko anu mompoposia, ka' momposanangmo beleyum nu gandum anu ma'ima' hondo.

¹⁵ Ia nompalentahmo tano', ka' potatae-Nyo sampa olakukan.

¹⁶ Ia montudunakonmo mae ujan batu susumo kabu-kabung, ka' mongkakambuhakonmo mae dondu'ok anu tinobengmo susumo abu'.

¹⁷ Ia montudunakonmo mae ujan eis susumo bone'; madi' ko anu moko ala montahan bakinnyo.

¹⁸ Lantas kalana palentah-Nyo eis aijo' na timbalimo uee; Ia nompuhakonmo mombun sahingga uee no'ilimo.

¹⁹ Ia nompotokamo potuunon-Nyo hi mian anu pinalesayamo hi Ia, palentah ka' atulan-Nyo hi mian anu pinile'an-Nyomo.

²⁰ Ia madi' nombau susumo aijo' hi bansa-bansa sangga'at, aha madi' monsumbu' iwi-iwi' na atulan-Nyo. Opuji' na Tumpu!