MAZMUR 146 - KITAB NU TUMPU ALLA LELE MA'IMAI'

Pompuji' Tumpu anu momposalamat

¹ Opuji' na Tumpu! O santuu'ku, opuji' na Tumpu!

² Aku mompuji'mo Tumpu i uno nu kantumuu'anku, ka' ku nyanyiakon hi Tumpungku de aku daagi' tutuu'.

³ Boli montaha'imani anu ko kakuasa'an, hi mian anu madi' moko ala momposalamat.

⁴ De aha silakamo, aha minsusule'mo i tano'; sinaa' aijo' suele iwi-iwi' na tanga'an nu aha madi'mo daagi'.

⁵ Mohumpak kantumuu'an ma'ima' na mian anu talalo hondo montaha'imani Tumpu-nyo, ka' ko Tumpu i Yakub salaku anu montulungi ia.

⁶ Iamo na nompotimbali langit tiba tano', ambai tiba iwi-iwi' na isinyo; Ia saja' manonong sampetoka sidu-sidutu'.

⁷ Ia na montinjohi hak nu to mia-mian anu pinosakisamo ka' mombee'i mongkaan mian anu no'ohopmo. Tumpu mompobebasmo to mia-mian anu tinalungku'mo,

⁸ ka' mian anu mapisok opo'alinmo sahingga moko alamo montoa. Ia na mohangkat mian anu tinohumpukmo, ka' mongkalibosi mian anu hodi' na kinyonyoanyo.

⁹ Ia na monjagai to mia-mian anu lengkat mae i salipu'an; Ia na montulungi to balu-balu ka' anu ingunonmo madi'mo ko tinanyo ka' tuumanyo, panyo nohungku'imo tanga'an nu mian anu ma'idek na kinyonyoanyo.

¹⁰ Tumpu aijo' Tomundo' sampe toka sidu-sidutu'. O Sion, Tumpu nu beleyum balakuasa mo'atu-atuan nu taun. Opuji' na Tumpu!