MAZMUR 144 - KITAB NU TUMPU ALLA LELE MA'IMAI'

I tomundo' nontalima kasemo hi Tumpu kalana inguntungmo na nahampate

¹ Lengkat hi Daud. Opuji' na Tumpu anu binaumo pihohungan'anku! Ia nompogulu'mo aku nahampate, ka' nongajanmo aku mosia na mahangewa.

² Iamo na anu nontulungi mae aku ka' nontinjohimo mae aku, anu nomposalamatmo mae aku tampat pihohungankumo. Ia nonjagaimo mae aku, tampat pinopalaianku, iwi-iwi' na bansa pinota'aluk-Nyomo hi belengku.

³ O, Tumpu, ihe na mian sahingga nupalahatikan nu Belento na ia? Ihe na ia sahingga Nu inau' na ia?

⁴ Mian aijo' ola susumo mombun saimpotulu, susumo lolung motulu, sumomo aijo' na kantumuu'annyo.

⁵ O, Tumpu, bukaimo mae na langit nu Belento ka' pintatau'mo mae, sintungmo na bungkutnyo iwi-iwi' da mintibukmo.

⁶ Lumbu'akonmo mae na kilat nu Belento da anu monsampobali' mae mosungke-sungkehetmo, lapasakonmo mae na hihis nu pana' nu Belento da aha mabuhuk ka' bingungmo.

⁷ Tajuakonmo mae na lima nu Belento atina' mae i suluga', ka' pobebasakonmo mae na aku da madi' nu anjuhakon nu iyaba'. Posalamatakonmo mae na aku da madi' nukuasai nu mian anu i salipu'an.

⁸ Anu mongka'ima'i baleko' ka' mongakali ka' saja' basumpa' anu madi' totu'u.

⁹ Aku monyanyiakon hi Belento, o, Tumpu nyanyian anu sala'je ingajan, ka' onyanyiakon na mongkuti' kasapi'.

¹⁰ Belento nompo'untungmo to tomu-tomundo' nahampate, ka' nompobebasmo i Daud posaihon nu Belento.

¹¹ Opimpaliakon mae na aku da madi' nukaan nu bajak nu mian anu madi' adin ka' buhingison. Posalamatakon mae na aku da madi' nukuasai nu mian anu i salipu'an anu mongka'ima'i baleko' ka' mongakali, ka' saja' basumpa' anu madi' totu'u.

¹² O'amalakon da to ana-anakto mo'ane de daagi' olitau sumomo sosu'anon anu ko daka-daka'nyomo. O'amalakon da to ana-anakto boune sumomo ahi' ohi anu handa, anu bau pombunga-bungai pasu'nyo i laigan nu tomundo'.

¹³ O'amalakon da alangto iwi-iwi' mobuke'mo nu isinyo, mongangahan na isinyo nu ale'. O'amalakon da dombanto iwi-iwi' anu kiijo' mae i tampat padang, minganakmo sampe mopulu-pulu'mo na madala na konjo'nyo.

¹⁴ O'amalakon da sapi'to iwi-iwi' saponga-ponga'naknyomo ka' madi' ko anu molapus kabai ola manabu' na anaknyo. O'amalakon da madi' ko anu ohongo na mongoa'i kasansala'an i iwi-iwi na jalan nu kota'.

¹⁵ Mohumpak kantumuu'an ma'ima' na bansa anu sumo aijo, mohumpak kantumuu'an na mian anu Tumpu-nyo, aijo'mo na Tumpu!