MAZMUR 142 - KITAB NU TUMPU ALLA LELE MA'IMAI'

Do'a mongkakase da otulungi mae

¹ Nyanyian pangajalan i Daud, tempo'nyo ia i uno nu liang.

² Dinaka-daka'ankumo hondo na nongkakase hi Tumpu; pinantilan hondo na aku nongkakase da Nu tulungi mae.

³ I ahop-Nyo pinoto'ingkumo na kasusa'anku, pinoto'ingkumo na kasusa'anku iwi-iwi' hi Ia.

⁴ Tempo'nyo me ise-ise' madi'mo ko anu ku taha'imani, sinumbu'mo nu Belento apaa na anu tionyo ahi' ku bau. I jalan anu tionyo ahi' ku tului, anu monsampobali' mae hoko-hokot nompokonamo so'o bau pohakop aku.

⁵ Salatan aku nosiloi i sohipi'ku, madi' aku nontoa anu montulungi mae aku. Madi' ko anu monjagai mae aku, kabai anu mompalahatikan mae butongku.

⁶ Aku mongkakase hi Belento, O, Tumpu, Belentomo na tampat bau pihohunganku, olamo Belento na anu ku palalui i uno nu kantumuu'anku aiya.

⁷ Palahatikan mae na anu ku kakase kalana aku sinansalamo hondo. Posalamatakon mae na aku da madi' nupoposia nu to mia-mian anu monsampobali' mae aku, kalana aha na talalo mahoson mohungku'i aku.

⁸ Pobebasakon mae na aku da madi' otalungku' sahingga i kasikumpunan nu mian anu pinalesayamo hi Belento, ku puji'mo na sanggo nu Belento, kalana Belento manonong mae hi ayu.