MAZMUR 140 - KITAB NU TUMPU ALLA LELE MA'IMAI'

Do'a mongkakase da ojagai mae

¹ Anu mongkapalai panyanyi. Mazmur i Daud.

² Pojo'onakon mae na aku da madi' opoposia nu mian anu ma'idek na kinyonyoanyo, O, Tumpu, jagaiakon mae na aku da madi' opoposia nu mian anu talalo hondo buhingison na mompalentah.

³ Aha ko tanga'an anu ma'idek i uno nu kinyonyoa nu aha, ka' sansina-sinaa saja' monsaduakon painggagah.

⁴ Soba toa na aha sumomo ulo anu ko bisa'nyo, potatae nu aha sumomo lasung nu ulo sangku'.

⁵ O, Tumpu, jagaiakon mae na aku da madi' opoposia nu kakuasa'an nu mian anu ma'idek na kinyonyoanyo, jagaiakon mae na aku da madi' opoposia nu mian anu talalo hondo buhingison na mompalentah, anu ko tanga'an monsila kaimo aku.

⁶ Madi' kino hengge-hengge' na mian anu sombong nompokonamo so'o bau pohakopnyo aku ka' nompokonamo bukili' bau pohakopnyo aku. I tutuus nu jalan tina'anmo nu aha na talong da bau pohakop aku.

⁷ O Tumpu, aku notataemo: Belentomo na Tumpungku, palahatikanakon mae na do'a bau pongkakasengku.

⁸ O, Tumpu, Tumpungku, anu momposalamat aku ka' mahoson Belento nonjagaimo mae aku tempo'nyo nahampate.

⁹ Boli ositujui na tanga'an nu mian anu ma'idek na kinyonyoanyo, O, Tumpu, boli opobee' tongala na tanga'an nu aha.

¹⁰ Boli opobee' na mian anu monsampobali aku, untung na mahampate; bakas da potatae anu nutaloakon nu aha mongkona butong nu aha anu mompobau-bau mae aku.

¹¹ Bakas da obaa nu apu mongujani aha, ka' o'alinmo i bolo' nu kapatean, sahingga madi'mo daagi' moko ala mosabat mae.

¹² Bakas da mian anu talalomo buhingison na mompalentah nutokai mae nu balaa', boli opobee' na mian anu lewa' mompobau-bau jojoong i dunia aiya.

¹³ Ku sumbu' Belento mombee'i ka'adilan hi mian anu pinosansalamo, ka' montinjohimo palakala nu mian anu kasiasi.

¹⁴ Mian anu hodi' na kinyonyoanyo mompuji'mo Belento; aha jojoongmo hingga-hinggat tiba Belento.