MAZMUR 14 - KITAB NU TUMPU ALLA LELE MA'IMAI'

Mian ma'idek hondo na kinyonyoanyo

¹ Anu mongkapalai panyanyi. Mazmur i Daud. Mian anu ponga' motatae i uno nu kinyonyoanyo, “Madi' ko Tumpu.” Palabuatan nu aha ma'idek ka' okahegati madi'mo ko anu mombau anu ma'ima'.

² Lengkat kiita' mae i suluga' Tumpu montoa mokaiyong manusia molio mian anu pande na monsombah Ia.

³ Panyo iwi-iwi' na mian noteba'mo na jalan nu aha ka' pinalagantamo, madi'mo daagi' ko samiannyo na anu mombau anu ma'ima'.

⁴ Tumpu notatae, “Pa' madi'mo ko kasinsumbu'annyo na mian toto ide-idek na kinyonyoanyo haha aijo'? Aha tumuu' ola saja' mompahuhui mian anu palesayamo hi Beleng-Ku ka' madi'mo toho' balado'a mae hi Beleng-Ku.”

⁵ Mian anu ma'idek na kinyonyoanyo saidi' mae mabuhukmo kalana Tumpu na monjagai ahi' mian anu tulu-tulutan hi Ia.

⁶ Mian anu ma'idek na kinyonyoanyo ola saja' monsusa'i kantumuu'an nu mian anu kasiasi panyo Tumpu na monjagai ahi' aha.

⁷ O'amalakon da lengkat mae kiita' i Sion tokamo mae na kasalamatan nu aha Israel! Sahingga lee' mae i Yakub lame'mo de nu po ule'mo nu Tumpu na kantumuu'an nu mian anu palesayamo hi Ia susumo naipuan mae.