MAZMUR 139 - KITAB NU TUMPU ALLA LELE MA'IMAI'

Tumpu talalo hondo monsumbu' ka' anu nompotuu'mo sinin na apaa

¹ Anu mongkapalai panyanyi. Mazmur i Daud. O Tumpu, Belento mompangalati'i aku ka' monsumbu' aku.

² Belento na monsumbu'mo iwi-iwi' apaa na anu binaungkumo; maumo majo'on na Belento panyo monsumbu' pikilanku.

³ Belento montoa aku maumo aku mokalaja kabai milawe, Belento monsumbu' iwi-iwi' apaa na anu binaungkumo.

⁴ Aitu pe'e ma'isa aku motatae, Belento nonsumbu'mo apaa na anu kahanda' ku taloakon.

⁵ Belento nontiikubimo mae aku, titiikup, ka' jinaganmo mae na aku nu kuasa nu Belento.

⁶ Talalo hondo maleeng na ilimu' nu Belento aijo', madi'mo nupoko tokai nu pikilanku.

⁷ Moya na aku mamba da madi' nukona nu kuasa nu Belento? Moya na popalaianku da majo'on i ahop nu Belento?

⁸ De aku moliba' i langit, Belento kiita' mae de aku hoyot i dunia nu anu sinilakamo kiijo' suele daagi' ko Belento.

⁹ De aku lumap motulu i sasu kabete'an kabai jojoong kiijo' mae i pus nu sasu kinsoban anu majo'on hondo,

¹⁰ kiijo' mae suele Belento montulungi aku; kiijo' mae suele na lima nu Belento molaya' aku.

¹¹ De ku poita da pintung mongkukumbungi aku, ka' jingka anu titiikup hi belengku malomo,

¹² saba' pintung aijo' madi' ahi' mompintungi Belento; malom aijo' majingkamo susumo sinaa, ka' pintung aijo' susumo jingka.

¹³ Belento na nompotimbali toto sa'angu' na bagian nu butongku, ka' nontali'mo aku i uno nu ma'alum nu tinangku.

¹⁴ Ku puji' na Belento kalana aku talalo ahi' ma'ima'! Iwi-iwi' na anu binaumo nu Belento okahelani ka' talalo ahi' okabangangi, totu-totu'u ku sumbu' na han aijo'.

¹⁵ Salatan bungkungku iwi-iwi' pinotimbalimo, pinokopiananmo na nompoguntang i ma'alum nu tinangku, panyo no'insu'mo ikiijo' madi' ku sumbu-sumbu', aku madi' sulu-sulu' sahingga madi' nutoa nu Belento.

¹⁶ Nutoa nu Belento na aku tempo'nyo aku daagi' kandu-kandung hitinangku, iwi-iwi' tinulismo i uno nu kitab nu Belento; iwi-iwi' na sinaa polo'mo tinantukan mau ma'isa pe'e ko anumo sa'angu' na tinampu'unankumo pinotimbali.

¹⁷ Talalo hondo susa' na aku monsumbu' pikilan nu Belento, O, Tumpu, ka' talalo hondo manjoo' na ngangahannyo!

¹⁸ De ku bilang, lebe manjoo' molingkudui bone'; de aku mobulamo, daagi' sabole-boleh ahi' ku potutugakon na Belento.

¹⁹ De timbali da mian anu ma'idek na kinyonyoanyo nupateimo nu Belento, O, Tumpu, pojo'onakon mae hi belengku na to mia-mian anu lewa' mombubusakon baso'!

²⁰ Aha lewa' mompobau-bau han anu ma'idek mongkona Belento ka' lewa' monsumpa'akon anu madi' totu'u mongkona iwi-iwi' na kota' nu Belento.

²¹ O, Tumpu, ku ka'ideki na mian anu mongka'ideki Belento, kinyonyoangku nompele-pele'mo hi mian anu panggaga hi Belento!

²² Aha talalo hondo ku ka'ideki, ka' ku anggapmo salaku sampobali'.

²³ Selidiki mae na aku o, Tumpu, ka' palesa mae na kinyonyoangku, uji' mae na aku ka' sumbu' mae na pikilanku.

²⁴ Toa mae pa' ko anu ma'idek i uno nu butongku, ka' laya' mae na aku i jalan anu sampe toka sidu-sidutu'.