MAZMUR 138 - KITAB NU TUMPU ALLA LELE MA'IMAI'

Do'a montalima kaseh

¹ Lengkat hi Daud. O, Tumpu, aku montalima kasemo hi Belento, lengkat i kinyonyoangku totu-totu'u. I ahop nu iwi-iwi na to pilo-pilogot aku monyanyimo bau pompuji' Belento.

² Aku tinolodadupumo monsombahmo mo'ahop sasu i Laigan nu Belento anu susi', ka' nompuji'mo sanggo nu Belento kalana Belento manonong ka' saja' mongkalibosi. Belento talalo hondo mompentingkan anu jinanji'mo nu Belento molingkudui pikilan nu mian anu montutuhakon Belento.

³ Salatan aku nongkakasemo hi Belento, Belento nontaamimo mae, pinohosonmo nu Belento na kinyonyoangku sahingga aku binaanimo.

⁴ Iwi-iwi' na tomundo' i dunia aiya mompuji'mo Belento, O, Tumpu, kalana aha nohongomo anu jinanji'mo nu Belento.

⁵ Aha monyanyiakonmo anu pinojadimo nu Belento ka' katalasanggoan nu Belento anu daka' hondo.

⁶ Belento talalo hondo susi' panyo anu madi' talakana' Nu palahatikan ahi'; mian anu kobubuun madi' moko ala maninsuluk da madi' Nu toa.

⁷ Tempo'nyo aku tinokanmo nu kasusa'an Belento na sabole-boleh nontoongi kantumuu'anku. Belento na nongewa anu monsampobali' mae aku anu notomuhukmo ka' pinosalamatmo nu Belento na aku nu kuasa nu Belento.

⁸ Belento mongganapimo anu jinanji'mo nu Belento hi belengku boli belenti na mongatun mae mian anu palesayamo hi Belento.