MAZMUR 137 - KITAB NU TUMPU ALLA LELE MA'IMAI'

Lewa'mo humang isonibi nu kaunyo anu kiijo' i Babel

¹ I sonibi nu kaunyo anu kiijo' i Babel kami sumuhangmo ka' lewa'mo humang de monginau'mo Sion.

² I kau' gandarusa anu i lipu' aijo' opokalayo'mo mami na kasapi' mami.

³ To mia-mian anu nohakop ka' nomboamo kami nompokaumo kami manyanyi da nuhongo nu aha. To mia-mian anu nonsansalamo kami nompokaumo kami da monyanyiakon lagu anu toto lame-lame' “Nyanyiakon mae hi kami na lagu anu toto lame-lame' lengkat mae i Sion!”

⁴ Pa' timbali na i lipu' nu mian kami monyanyiakon hi Tumpu?

⁵ Bakas da aku madi'mo daagi' timbali manyanyi de aku mongkolilimimo beleyum Yerusalem!

⁶ Bakas da aku madi'mo daagi' timbali manyanyi de aku mongkolilimimo beleyum ka' misa'mo beleyum na anu ku kalame'akon!

⁷ O, Tumpu, o'inau' apaa na anu binaumo nu mian Edom tempo'nyo Yerusalem i hopu'anmo. Tinaloakonmo nu aha, “Hobo'akonmo, hobo'akonmo toka-toka i pinaningkokoannyo!”

⁸ O Babel, beleyum opateimo! Mohumpak kantumuu'an ma'ima' na mian anu mombalosakonmo beleyum palabuatan ma'idek anu binaumo nu beleyum hi kami.

⁹ Mohumpak kantumuu'an ma'ima' na mian anu nongalamo to bunga-bungamea' nu beleyum ka' nongalinmo nokiita' i puge'nyo nu batu!