MAZMUR 136 - KITAB NU TUMPU ALLA LELE MA'IMAI'Nyanyian montalima kaseh 1 Pontalima kaseh hi Tumpu kalana Ia manonong; kalibosan-Nyo sampe toka sidu-sidutu'. 2 Pontalima kaseh hi Tumpu Anu Matangkas na Kuasanyo; kalibosan-Nyo sampe toka sidu-sidutu'. 3 Pontalima kaseh hi Tumpu Anu Daka' na Kuasanyo; kalibosan-Nyo sampe toka sidu-sidutu'. 4 Ola Ia na anu nombaumo han anu okabangangi toto daka-daka'; kalibosan-Nyo sampe toka sidu-sidutu'. 5 Kalana kapandean-Nyo Ia nompotimbalimo langit; kalibosan-Nyo sampe toka sidu-sidutu'. 6 Ia nompokabamo tano' i bawo nu uee, kalibosan-Nyo sampe toka sidu-sidutu'. 7 Ia nombaumo anu monjingkai mae aita' i langit; kalibosan-Nyo sampe toka sidu-sidutu'; 8 batu nu sinaa da mongkuasai sinaa; kalibosan-Nyo sampe toka sidu-sidutu'; 9 bitu'on ka' mandala' na mongkuasai pihi; kalibosan-Nyo sampe toka sidu-sidutu'. 10 Pinatean-Nyo na to ana-anak tumpe nu Mesir, kalibosan-Nyo sampe toka sidu-sidutu'. 11 Israel sinabatakon-Nyo lengkat mae i Mesir; kalibosan-Nyo sampe toka sidu-sidutu'; 12 kalana lima mahoson ka' baani; kalibosan-Nyo sampe toka sidu-sidutu'. 13 Ambai Gelagah biniha'-Nyo; kalibosan-Nyo sampe toka sidu-sidutu'; 14 Israel mian anu pinalesayamo hi Ia tinapakon-Nyomo nokiijo' i santoanyo; kalibosan-Nyo sampe toka sidu-sidutu'. 15 Panyo tomundo' nu Mesir tiba suludadunyo i lomosan-Nyomo; kalibosan-Nyo sampe toka sidu-sidutu. 16 I laya'-Nyomo na mian anu pinalesayamo hi Ia notulu i tampat padang anu mateges; kalibosannyo sampe toka sidu-sidutu'. 17 Pinatundu'Nyo na to tomu-tomundo' anu toto babaani; kalibosan-Nyo sampe toka sidu-sidutu'; 18 pinatean-Nyo na to tomu-tomundo' anu talasanggo; kalibosan-Nyo sampe toka sidu-sidutu'. 19 Sihon tomundo' nu Amori; kalibosan-Nyo sampe toka sidu-sidutu'; 20 ka' og tomundo' nu Basan; kalibosan-Nyo sampe toka sidu-sidutu'. 21 Lipu' nu aha binee'Nyomo hi mian anu pinalesayamo hi Ia; kalibosan-Nyo sampe toka sidu-sidutu'; 22 ahamo Israel posaihon-Nyo, na tumpunyo; kalibosan-Nyo sampe toka sidu-sidutu. 23 Ia madi' mongkolilimi kita, tempo'nyo kita pinatundu'mo; kalibosan-Nyo sampe toka sidu-sidutu'. 24 Pinobebas-Nyomo na kita da boli nu patei nu mian anu monsampobali' mae; kalibosan-Nyo sampe toka sidu-sidutu. 25 Batu-batu anu ko nyawanyo Nu bee'i mongkaan, kalibosan-Nyo sampe toka sidu-sidutu. 26 Pontalima kaseh hi Tumpu anu mongkuasai langit; kalibosan-Nyo sampe toka sidu-sidutu'. |
LAI 2002
Indonesian Bible Society