MAZMUR 132 - KITAB NU TUMPU ALLA LELE MA'IMAI'

Pompuji' Laigan nu Tumpu

¹ Nyanyian mamba i tampat anu ko balakatnyo. O, Tumpu, inau'akon na i Daud, ka' iwi-iwi' na kasansala'annyo.

² Boli okolilimi na ia monsombah hi Belento Tumpu, ka' mule' apaa na anu jinanji'nyomo hi Belento Anu Mahoson hondo, Tumpu i Yakub.

^3-4 Ia notatae, “Aku madi' milawe i laiganku kabai hoyot i kahoyotanku,

⁵ de ma'isa pe'e mompotouka Laigan nu Tumpu i Yakub, bau kajojoongan nu Tumpu Anu Mahoson hondo.”

⁶ Kiijo' mae i Betlehem i hongontomo na Peti' Palajanjian, lantas i humpakmo i padang yaar.

⁷ Imbo' da kita mamba i kajojoongan nu Tumpu, ka' monsombah Ia i ahop nu kasuhangan-Nyo.

⁸ Tokamo mae ka' jojoongmo i Laigan nu Belento, o, Tumpu, hingga-hinggat tiba Peti' Palajanjian anu momponyata' kakuasa'an nu Belento.

⁹ O'amalakon da mian anu pinalesayamo hi Belento montaligalai kalana lame'mo, ka' to ima-imam nu Belento saja' tumuu' montuluti pongka'oho' nu Belento.

¹⁰ Kalana i Daud posaihon nu Belento boli mule' madi' otalima na tomundo' anu pinile'anmo nu Belento.

¹¹ Tumpu binasumpa'mo hi Daud; Ia madi'mo mompojalo anu jinanji'-Nyomo. Ia notatae, “Samian na anak nu beleyum Ku potimbalimo tomundo', da mompalentah mombolosakon beleyum.

¹² De to ana-anak nu beleyum tulu-tulutan hi apaa na anu jinanji'-Kumo, ka' montuluti iwi-iwi' na palentah-ngKu, sahingga sampe toka sidu-sidutu' na lee' nu aha mombolosakon beleyum salaku tomundo'.”

¹³ Kalana Tumpu nompile'imo Sion; Ia mongkahanda'i tampat bau kajojoongan-Nyo.

¹⁴ Ia notatae, “I aiyamo na kajojoongan-Ku sampe toka sidu-sidutu', Aku kahanda'mo mompalentah i tampat aiya.

¹⁵ Iwi-iwi' na anu nupalalui nu aha Ku bee'i molabi-labi, to mia-mian nu aha anu kasiasi Ku pokaan sampe mobosu.

¹⁶ To ima-imam nu aha mompotoamo kasalamatan anu lengkat mae hi belengku; aha mian manyanyimo ka' montaligalaimo kalana lame'mo.

¹⁷ I aiyamo na lee' i Daud samian, Ku potimbalimo tomundo'; kapalentahannyo Ku potataapmo.

¹⁸ Kalaja'annyo saja'mo mohumpak ka'ima'an, panyo iwi-iwi' na mian anu monsapobali' aha opopoambangmo.”