MAZMUR 13 - KITAB NU TUMPU ALLA LELE MA'IMAI'

Do'a nu mian anu binee'anmo kasansala'an

¹ Anu mongkapalai panyanyi. Mazmur i Daud.

² Hipian na kopinnyo na Belento mongkolilimimo mae aku o Tumpu? Hipian na kopinnyo na Belento matisuluk sahingga madi'mo ku toa?

³ Hipian na kopinnyo na aku tionyo ahi' montanggung kasusa'an, ka' mongoa'i susa' na kinyonyoa sansina-sinaa? Hipian na kopinnyo na aku nukuasai nu sampobali'ku?

⁴ Tonto'i mae na aku, o Tumpu-ngku, taami mae na do'angku. Po'ule'akon mae na kahosonanku, ka' boli pojohokmo mae na aku da silakamo.

⁵ Boli opojohok mae na sampobali'ku motatae tukoonyo aha nohungku'imo mae aku. Boli opojohok mae na aha mongkokojoi mae aku.

⁶ Kalana aku montaha'imani kalibosan mae nu Belento sahingga aku lame'mo kalana Belento nomposalamatmo aku. Aku manyanyimo mompuji' Tumpu, kalana Ia nombaumo mae anu ma'ima' hi belengku!