MAZMUR 124 - KITAB NU TUMPU ALLA LELE MA'IMAI'

Tumpu monjagai mian anu palesayamo hi Ia

¹ Nyanyian i Daud mamba i tampat anu ko balakatnyo. Mosiamo de Tumpu madi' mae montinjohi kita? O, Israel, taami mae sumo aijo';

² “De Tumpu madi' mae nontinjohi kita salatan kita tinumbuhanmo mae nu mian anu monsampobali',

³ sahingga kita ilonyomo titu-tituu', kalana tambuha' nu aha anu taha-tahahumo.

⁴ Sahingga kita inganjuhakonmo nu iyaba', ka' nu omokimo nu uee;

⁵ Sahingga kita nolomosmo ka' sinilakamo i uno nu buliling nu uee anu okabuhuk.”

⁶ Imbo' da kita montalima kaseh hi Tumpu, kalana Ia madi' nompojohok kita ihopu'an mae nu mian anu monsampobali'.

⁷ Kita sumomo tomonsi' anu nolapasmo i so'o nu mian anu kahanda' mohakop, so'o aijo' nobotu'mo, lantas kita nolapasmo!

⁸ Anu nontulungi mae kita Tumpu, anu nompotimbalimo langit ka' tano'.