MAZMUR 12 - KITAB NU TUMPU ALLA LELE MA'IMAI'

Do'a mongkakase da otulungi

¹ Anu mongkapalai panyanyi. Lagunyo ingala i lagu anu ko uwalu'nyo. Mazmur i Daud.

² Tulungiakon mae na kami, o Tumpu, kalana madi'mo daagi' ko mian anu ma'ima' na kinyonyoanyo, mian anu mohongo-hongo Belento i madi'anmo.

³ Aha iwi-iwi' nompaha bale-baleko'imo, nompaha aka-akalimo nu potatae anu toto ima-ima'.

⁴ Bolimo opobee' Tumpu na potatae anu lewa' pagala monsale'i aijo', poki pomohokotmo na to mia-mian anu motatae palangues,

⁵ anu motatae, “Jila' mami na bau pongkuasai mami! Maumo pa' apaa timbali otaloakon mami, ka' madi' ko anu moko ala timbali montewa'!”

⁶ Tumpu notatae, “Mian anu kasiasi binee'anmo kasansala'an, ka' miana nu sinansalamo nongkalakmo. Jadi uuka aiya Aku tinokamo mae mombee'i ka'ima'an da sanangmo na kinyonyoa nu aha anu saja'mo ingindi nu aha.”

⁷ Palajanjian nu Tumpu mahoson ka' timbali otaha'imani, sumomo ahi' salaka anu madi' ko galo'nyo anu inguji'mo i apu.

^8-9 Mian anu ma'idek na kinyonyoanyo notuhekapmo iyaya mae, palabuatan anu ma'idek pinopodaka'mo nu batu-batu mian. Panyo Belento na monjagai ahi' mae kami, o Tumpu, jagai mae na kami da boli nu poposia nu mian anu ma'idek na kinyonyoanyo haha aijo'.