MAZMUR 119 - KITAB NU TUMPU ALLA LELE MA'IMAI'

Atulan nu Tumpu Kantumuu'an anu ma'ima' hi mian anu tulu-tulutan hi atulan nu Tumpu

¹ Mohumpak ka'ima'an na mian anu kantumuu'annyo madi' ko kasala'annyo ka' tulu-tulutan hi atulan iwi-iwi' nu Tumpu.

² Mohumpak ka'ima'an na mian anu kantumuu'annyo montuluti palentah-Nyo, ka' totu-totu'u na kinyonyoanyo bala'usaha monsumbu' Tumpu.

³ Mohumpak ka'ima'an na mian anu kantumuu'annyo montuluti pongka'oho' nu Tumpu, ka' madi' mombau anu ma'idek.

⁴ Belento nombee'imo mae kami atulan nu Belento o Tumpu, da obau mami ma'i-ma'ima'.

⁵ O' amalakon da kinyonyoangku mahoson na montuluti atulan nu Belento iwi-iwi'.

⁶ De ku palahatikan na palentah nu Belento iwi-iwi', saba' aku madi'mo mohumpak ambang.

⁷ De ku pakalioi na ka'adilan nu kaputusan nu Belento anu adin aijo', hodi' hondo na kinyonyoangku mompuji' Belento.

⁸ Aku montulutimo atulan nu Belento bolimo hondo-hondo mompala'i aku.

Tulu-tulutan hi atulan nu Tumpu

⁹ To oli-olitau timbali monjaga kantumuu'annyo da madi' ko kasala'an de ia tumuu' montuluti palentah nu Belento.

¹⁰ Totu-totu'u hondo na kinyonyoangku bala usaha monsumbu' Belento, boli opojohok mae na aku dumo mosele madi'mo montuluti palentah nu Belento.

¹¹ Pangajalan nu Belento ku una'mo i uno nu kinyonyoangku da aku madi' baladosa' hi Belento.

¹² Ku puji'mo na Belento, o, Tumpu potiju'akon mae na aku atulan nu Belento.

¹³ Ku daka-daka'i na potatae mompoto'i iwi-iwi' na atulan anu binee'mo mae nu Belento.

¹⁴ Aku lame' na montuluti palentah nu Belento iwi-iwi', sumomo daagi' ko halata' anu monga-ngahan hi belengku.

¹⁵ Aku mompaka liomo iwi-iwi' na anu pinutusanmo nu Belento, ka' mompalahatikanmo iwi-iwi' na anu pinoto'imo nu Belento.

¹⁶ Atulan nu Belento nomposanangmo aku; pangajalan nu Belento madi'mo ku kolilimi.

Kantumuu'an anu ma'ima' kalana atulan nu Tumpu

¹⁷ De timbali da Belento manonong mae hi posaihon nu Belento aiya, da aku sabole-boleh tumuu' ka' montuluti pangajalan nu Belento.

¹⁸ Buka'akon mae na matangku da aku montoa pangajalan anu okabangangi hi atulan nu Belento.

¹⁹ Ola sasaingoni' na aku jojoong i dunia aiya boli mae oposuluk hi belengku na atulan nu Belento.

²⁰ Madi'mo sinanang na kinyonyoangku kalana nolibosmo aku kahanda' monsumbu' atulan nu Belento sansina-sinaa.

²¹ Belento mompisala'i mian anu kobubuun ka' mongkutuki mian anu mosele madi'mo montuluti palentah nu Belento.

²² Pobebasakon mae na aku da madi' nu alu ka' nu pisala'i mae nu aha, kalana aku mombaumo atulan nu Belento.

²³ Mau mule' to mia-mian anu balakuasa mosa'angu'mo mongewa mae aku, posaihon nu Belento aiya na mompotutugakon ahi atulan nu Belento.

²⁴ Atulan nu Belento iwi-iwi' baumo pompokinde'i aku anu momposanang kinyonyoangku.

Kahanda' da montuluti atulan nu Tumpu

²⁵ Aku nale'mo i abu'; po'ule'akon mae na kantumuu'anku susumo anu jinanji'mo nu Belento.

²⁶ Aku mongakuimo palabuatanku, lantas tinaamanmo nu Belento na aku; potiju'akon mae na aku atulan nu Belento.

²⁷ Tulungiakon mae na aku da monsumbu' atulan nu Belento iwi-iwi', pangajalan nu Belento anu mompobangang hondo ku potutugakonmo.

²⁸ Kinyonyoangku nohintutumo kalana tinokanmo mae nu kasusa'an, pohosonakon mae na aku susumo anu jinanji'mo nu Belento.

²⁹ Pojo'onakon mae na aku da madi' montulu jalan anu madi' totu'u, kalana Belento manonong potiju'akon mae na aku atulan nu Belento.

³⁰ Aku nompile'imo da tulu-tulutan, palentah nu Belento saja' sabole-boleh ku inau'.

³¹ Aku nontulutimo iwi-iwi' na palentah nu Belento o, Tumpu, boli opojohok na aku dumo ma'ambang.

³² Aku sanang hondo na tulu-tulutan hi palentah nu Belento, kalana Belento nombalakatimo da aku lebe mangalati'.

Do'a mongkakase da mangalati'

³³ O, Tumpu, pangajali mae na aku da mangalati' hi atulan nu Belento iwi-iwi' da ku tuluti sampe i ka'ahenannyo.

³⁴ Balakatiakon mae na aku da mangalati' hi atulan nu Belento da saja' ku tuluti, ka' ku bau nu kinyonyoangku totu-totu'u.

³⁵ O' amalakon da aku mintoong hondo-hondo hi palentah nu Belento, kalana aijo' na anu ku ka'ima'i.

³⁶ Balakatiakon mae na aku da ko kahanda' montuluti atulan nu Belento, da boli mule' ko kahanda' lebe penting na timbali kaya.

³⁷ Jagai mae na aku da boli ola mololoi' anu madi' ko kaliangannyo, bee'i mae kantumuu'an na aku susumo anu Nu kahanda'i.

³⁸ Pohosonakon mae na kinyonyoa nu posaihon nu Belento, aiya na anu jinanji'mo nu Belento anu binee'mo hi mian anu tulu-tulutan hi Belento.

³⁹ Pojo'onakon mae na aku o alu nu anu kukabuhuk, kalana talalo hondo ma'ima' na atulan nu Belento.

⁴⁰ Bee'iakon mae na aku kantumuu'an anu bu'ou kalana Belento adin, aku kokahanda' montuluti iwi-iwi' na anu pinutusanmo nu Belento.

Montaha'imani atulan nu Tumpu

⁴¹ O, Tumpu ponyata' mae hi belengku taalu' Belento mongkalibosi ahi' mae aku, posalamatakon mae na aku susumo anu jinanji'mo nu Belento.

⁴² Sahingga aku moko ala montaami mian anu mongalu mae aku, kalana aku montaha'imani potatae nu Belento.

⁴³ Tulungi mae na aku da saja' montaloakon anu totu'u, kalana aku montaha'imani anu pinutusanmo nu Belento.

⁴⁴ Aku kahanda'mo mintoong hi atulan nu Belento, sampe toka sidu-sidutu'.

⁴⁵ Sahingga aku tumuu' bebasmo kalana binala'usahamo montuluti pangajalan nu Belento.

⁴⁶ Atulan nu Belento ku bebakonmo hi to tomu-tomundo' ka' aku madi'mo ma'ambang.

⁴⁷ Kasananganku aijo'mo mombau palentah nu Belento kalana ku ka'ima'i.

⁴⁸ Ku holomati ka' ku ka'ima'i na palentah nu Belento atulan nu Belento saja' ku potutugakon.

Palesaya hi atulan nu Tumpu

⁴⁹ Inau'akon mae na anu jinanji'mo nu Belento hi posaihon nu Belento aiya anu jinanji'mo aijo' timbali ku taha'imani

⁵⁰ Aiyamo na mohase' aku i uno nu kasala'anku, kalana anu jinanji'mo nu Belento aijo' mombee'i aku kantumuu'an.

⁵¹ Mian anu kobubuun talalo hondo mongalu aku, panyo aku madi' mosele mompala'i atulan nu Belento.

⁵² Ku inau' na atulan nu Belento anu polo-polo'mo daagi' salatanmo pe'e naipuan mae, sahingga sinanangmo na kinyonyoangku, o, Tumpu.

⁵³ Tinambuha'ankumo hondo na mian anu ma'idek na kinyonyoanyo, kalana aha nompala'imo atulan nu Belento.

⁵⁴ Aku tinumuu' ola sasaingoni' i dunia aiya atulan nu Belento binaungkumo nyanyian pompuji'-puji'.

⁵⁵ De malomo ku inau'mo na Belento o, Tumpu, atulan nu Belento sabole-boleh ku toongi.

⁵⁶ Aku nohumpakmo kantumuu'an ma'ima' kalana nontulutimo iwi-iwi' na atulan nu Belento.

Monsombah atulan nu Tumpu

⁵⁷ Olamo Belento na ku ka'ima'i o, Tumpu aku balajanji' mombau pangajalan nu Belento.

⁵⁸ Totu-totu'u na aku mongkakase, kalibosan mae nu Belento, kalibosi mae na aku susumo anu jinanji'mo nu Belento.

⁵⁹ Pinotutugakonkumo na kalakuanku ka' balajanji'mo montuluti atulan nu Belento.

⁶⁰ Ku lia-lia'imo ka' madi'mo montanda'i na mompojalan palentah nu Belento.

⁶¹ Mian anu ma'idek na kinyonyoanyo nompokonamo so'o da nukona na aku, panyo aku madi' mongkolilimi atulan nu Belento.

⁶² Tonga' pahu aku mobulamo ka' mompuji'mo Belento kalana iwi-iwi' na kaputusan nu Belento adin.

⁶³ Aku mobela' tiba iwi-iwi' mian anu tulu-tulutan, iwi-iwi' na mian anu mombau palentah nu Belento.

⁶⁴ Tano' nobuke'mo nu kalibosan nu Belento o, Tumpu pangajali mae na aku atulan nu Belento iwi-iwi'.

Angga'nyo nu atulan nu Tumpu

⁶⁵ Belento nongganapimo anu jinanji'mo nu Belento o, Tumpu ka' nongkanonongimo posaihon nu Belento.

⁶⁶ Bee'i mae na aku kapandean ka' ilimu' da monsumbu' apa-apaa, kalana ku palesaya na palentah iwi-iwi' nu Belento.

⁶⁷ Ma'isa aku i hukum, aku noselemo madi'mo nontuluti palentah nu Belento, uuka aiya aku nontoongimo palentah nu Belento.

⁶⁸ Kalana Belento manonong ka' saja' mombau anu ma'ima', potinganakon mae na aku atulan iwi-iwi' nu Belento.

⁶⁹ Mian anu kobubuun lewa'mo mompobau-bau aku, panyo aku totu-totu'u hondo montuluti kaputusan nu Belento.

⁷⁰ Mian haha aijo' madi' mangalati', panyo de hi belengku atulan nu Belento na momposanang ahi' kinyonyoangku.

⁷¹ Memang sahanyo Belento mohukumo mae aku, da ku sumbu' na atulan iwi-iwi' nu Belento.

⁷² De hi belengku atulan nu Belento lebe ko angga'nyo molingkudui mosoni' ka' salaka i dunia aiya.

Ka'adilan nu atulan nu Tumpu

⁷³ Belentomo na nompotimbali ka' nontali' aku, popangalati' mae na aku monggului' iwi-iwi' na palentah nu Belento.

⁷⁴ Mian anu tulu-tulutan sanangmo de montoamo mae aku, kalana aku montaha'imanimo anu jinanji'mo nu Belento.

⁷⁵ Ku sumbu' na kaputusan nu Belento adin o, Tumpu, Belento nohukumo mae aku kalana Belento nongkanonongi mae.

⁷⁶ O' amalakon da kalibosan nu Belento baumo pohase' aku, susumo anu jinanji'mo nu Belento hi posaihon nu Belento aiya.

⁷⁷ Kalibosiakon mae na aku, sahingga aku sabole-boleh tumuu', kalana atulan nu Belento momposanang mae kinyonyoangku.

⁷⁸ Bakas da mian anu kobubuun ma'ambangmo kalana lewa'mo nompobau-bau aku, panyo aku na nompotutugakonmo ahi' palentah iwi-iwi' nu Belento.

⁷⁹ O' amalakon da mian anu tulu-tulutan toka mae hi belengku, iwi-iwi' na anu monsumbu' to atu-atulan nu Belento.

⁸⁰ O' amalakon da kinyonyoangku madi' mosele mompala'i atulan nu Belento, da aku madi' ma'ambang.

Do'a mongkakase da opobebas

⁸¹ Kinyonyoangku mongka'ima'i hondo kasalamatan lengkat mae hi Belento; aku montaha'imani anu jinanji'mo nu Belento.

⁸² Matangku nalawemo na montanda'i Belento mongganapi mae anu jinanji'mo nu Belento, aku notataemo, “Hipian na Belento mohase'mo mae aku?”

⁸³ Kilitku ningkihu-kihutmo sumomo botutu nu anggur anu pininmo na pinake, panyo atulan nu Belento madi' ku kolilimi.

⁸⁴ Sampe toka hipian na kopinnyo na posaihon nu Belento tionyo sabaan? Hipian na Belento mohukumo to mia-mian anu mololoi' mae aku?

⁸⁵ Mian anu madi' montuluti atulan nu Belento, nongkekemo bolo' da bau pohakob aku.

⁸⁶ Iwi-iwi' na atulan nu Belento timbali otaha'imani, tulungiakon mae na aku, kalana aku i loloi'mo mae madi' ko sababnyo.

⁸⁷ Me ise-ise' pinoko alamo nu aha na aku pinatean, panyo aku madi' nonte palentah nu Belento.

⁸⁸ Posalamatakon mae na aku kalana Belento sabole-boleh mongkalibosi, da aku moko ala montuluti atulan nu Belento.

Palesaya hi atulan nu Tumpu

⁸⁹ O, Tumpu, potatae nu Belento tataap sampe toka sidu-sidutu', sampe toka sidu-sidutu' i suluga'.

⁹⁰ Kanonongan nu Belento madi' ko ka'ahenannyo sidu-sidutu', Belento na nompotinjo tano' sahingga sabole-boleh daagi'.

⁹¹ Iwi-iwi' na anu daagi' tempo' uuka aiya, daagi' kalana palentah nu Belento, kalana aha iwi-iwi' to posa-posaihon nu Belento.

⁹² De bisuannyo atulan nu Belento misa' pinolengkatan mae nu kalame'anku, memang aku sinilakamo i uno nu kasansala'anku.

⁹³ Sabole-boleh aku madi' mongkolilimi palentah nu Belento kalana tiba jalan anu sumo aijo' Belento nompotumuu'mo aku.

⁹⁴ Posalamatakon mae na aku, kalana aku aiya, Belentomo na tumpunyo, aku binala'usahamo montuluti atulan nu Belento.

⁹⁵ Mian anu ma'idek na kinyonyoanyo montanda'imo kahanda'mo monsilakai aku, panyo aku na mompalahatikan ahi' atulan nu Belento.

⁹⁶ Tinoangkumo mau mule' anu sinukupmo hondo panyo ko batasnyo ahi', ola palentah nu Belento na anu sukup hondo ka' madi' ko batasnyo.

Mongka'ima'i atulan nu Tumpu

⁹⁷ Talalo hondo ku ka'ima'i na atulan nu Belento; ku tutugi sansina-sinaa.

⁹⁸ Saja' ku inau' na palentah nu Belento, anu lebemo mompopande aku molingkudui iwi-iwi' na sampobali'ku.

⁹⁹ Anu ku pangalati'i molingkudui anu nu pangalati'i nu to gulu-gulu'ku, kalana aku saja' montutugi palentah iwi-iwi' nu Belento.

¹⁰⁰ Aku na lebe mangalati' molingkudui to tu'a-tu'anyo, kalana aku montoongi iwi-iwi' na anu pinutusanmo nu Belento.

¹⁰¹ Ku pimpalimo iwi-iwi' na kalakuan anu ma'idek, da aku tulu-tulutanmo hi pangajalan nu Belento.

¹⁰² Aku madi' mongkolilimi atulan nu Belento, kalana Belentomo na nompogulu' aku.

¹⁰³ Talalo hondo matami' na potatae nu Belento nyamitnyo lebe matami' nulingkudui na juu' nu uani'.

¹⁰⁴ Iwi-iwi' na atulan nu Belento nompopangalati'mo aku, sahingga aku nongka'idekimo kalakuan anu tageo'.

Atulan nu Tumpu mompojingkamo

¹⁰⁵ Potatae nu Belento ponsulu'i aku malalangkas jingkanyo monjingkai aku lumajang.

¹⁰⁶ Anu jinanji'kumo ka' sinumpa'mo tionyo ku ganapi, bau pintoongan i kaputusan nu Belento anu adin.

¹⁰⁷ Aku sinansalamo hondo, o, Tumpu, jagaiakon mae na kantumuu'anku susumo anu jinanji'mo nu Belento.

¹⁰⁸ Talimakon na do'a bau pontalima kasengku, o, Tumpu, ka' potinganakon mae na aku iwi-iwi' na atulan nu Belento.

¹⁰⁹ Aku saja'mo momboto'akon nyawangku, panyo aku madi' mongkolilimi atulan nu Belento.

¹¹⁰ Mian anu ma'idek na kinyonyoanyo nompokonamo so'o bau pohakop aku, panyo aku madi' mosele mompala'i kaputusan nu Belento.

¹¹¹ Palentah nu Belento baumo pusaka'ku sampe toka sidu-sidutu', anu nompolame'mo kinyonyoangku.

¹¹² Aku ko kahanda' montuluti atulan nu Belento sampe toka i ka'ahenannyo nu kantumuu'anku.

Atulan nu Tumpu mompohoson kinyonyoa da madi' mabuhuk

¹¹³ Aku mongka'ima'i iwi-iwi' atulan nu Belento, ku ka'ideki na mian anu madi' totu-totu'u tulu-tulutan hi Belento.

¹¹⁴ Belentomo na anu montinjohi mae ka' anu monjagai mae aku aku montaha'imanimo anu jinanji' nu Belento.

¹¹⁵ O, mian anu ma'idek na kinyonyoanyo boli mae ohani hi belengku! Aku montulutimo palentah nu Tumpu Allah-ngku.

¹¹⁶ Pohosonakon mae na aku susumo anu jinanji'mo nu Belento da aku tumuu', boli opojohok dumo madi' ku humpak, na anu tinaha'imanankumo.

¹¹⁷ Sangaja'i mae na aku da aku salamat, ka' saja' mompalahatikan palentah nu Belento.

¹¹⁸ Belento madi'mo mongala mian anu moselemo madi'mo montuluti atulan nu Belento, ola palansuma na aha kahanda'mo mombatekai.

¹¹⁹ Iwi-iwi' na anu ma'idek na kinyonyoanyo nu anggap nu Belento sumomo duhehe, kalana aijo' ku ka'ima'i na atulan iwi-iwi' nu Belento.

¹²⁰ Aku ilangkakatanmo kalana nabuhukumo hi Belento, kinyonyoangku nangada'mo kalana kaputusan nu Belento.

Tulu-tulutan i atulan nu Tumpu

¹²¹ Aku nombaumo anu adin ka' anu totu'u, boli obee' na aku hi lima nu mian anu mongewa mae.

¹²² Balajanji'mo ahi' mae na Belento montulungi aku, boli opojohok na aku osakisa nu to mia-mian anu takabun.

¹²³ Matangku naposmo na montanda'i pontulungi mae nu Belento da momposalamat mae, ku tanda'imo da opobebas mae susumo anu jinanji'mo nu Belento.

¹²⁴ Opalentah mae na aku sitimbang tiba kalibosan nu Belento ka' potinganakon mae na aku atulan nu Belento.

¹²⁵ Aku posaihon nu Belento, popangalati' mae na aku da ku sumbu' na palentah nu Belento.

¹²⁶ O, Tumpu, tinokamo na tempo'nyo Belento mohukumo, kalana to mia-mian nolanggaimo atulan nu Belento.

¹²⁷ Palentah iwi-iwi' nu Belento lebe ku ka'ima'i molingkudui mosoni', molingkudui mosoni' anu madi' ko galo'nyo.

¹²⁸ Kalana aijo' aku tumuu'mo susumo pokinde' iwi-iwi' nu Belento; kalakuan anu tageo' ku ka'ideki.

Kahanda' montuluti atulan nu Tumpu

¹²⁹ Iwi-iwi' naatulan nu Belento okabangangi hondo, sahingga ku tuluti hondo-hondo nu kinyonyoangku.

¹³⁰ De otalangkan, pangajalan nu Belento mompojingka, mompopangalati' mian anu madi' talalo pande.

¹³¹ Kinyonyoangku nangada'mo, kalana saja' mongindi palentah nu Belento.

¹³² Siloi mae na aku ka' kalibosi mae na aku, susumo belento mongkalibosi anu mongka'ima'i Belento.

¹³³ Pohosonakon mae na langkasku susumo anu jinanji'mo nu Belento, boli opojohok na aku nukuasai nu kalakuan anu ma'idek.

¹³⁴ Pobebasakon mae na aku da boli nu sakisa nu to mia-mian na aku, da timbali ku tuluti na palentah nu Belento.

¹³⁵ Balakatiakon mae na aku de Belento tokamo mae, ka' potinganakon mae na aku atulan nu Belento.

¹³⁶ Lolu'ku no ilimo susumo kaunyo, kalana atulan nu Belento madi'mo tinulutan.

Atulan nu Tumpu aijo' adin

¹³⁷ Belento adin, o, Tumpu iwi-iwi' na atulan nu Belento kinonamo hondo.

¹³⁸ Iwi-iwi' na palentah anu binee'mo nu Belento adin ka'timbali otaha'imani.

¹³⁹ Tambuha'ku ningobamo i uno nu butongku kalana anu monsampobali' mae aku, nongkolilimimo pangajalan nu Belento.

¹⁴⁰ Anu jinanji'mo nu Belento mahoson ka' timbali opalesaya talalo hondo ku ka'ima'i.

¹⁴¹ Aku aiya ise' ka' madi' ko angga'nyo, panyo aku na madi' ahi' mongkolilimi pangajalan nu Belento.

¹⁴² Ka'adilan nu Belento tuu'an sampe toka sidu-sidutu', ka' atulan nu Belento saja' totu'u.

¹⁴³ Aku tinokanmo nu kasansala'an ka' kasusa'an, panyo atulan nu Belento na mompolame' kinyonyoangku.

¹⁴⁴ Atulan nu Belento saja' adin; popangalati' mae na aku da aku tumuu'.

Do'a mongkakase da opobebas

¹⁴⁵ Totu-totu'u hondo na kinyonyoangku mongkakase hi Belento; taami mae na aku o, Tumpu, aku montulutimo palentah nu Belento.

¹⁴⁶ Aku momoitamo tulung hi Belento; posalamatakon mae na aku, aku montoongimo atulan nu Belento.

¹⁴⁷ Subu-subu aku mobulamo ka' momoita tulung; aku montaha'imanimo aku jinanji'mo nu Belento.

¹⁴⁸ Sampahu-pahu na aku tumudong lewa mompotutugakon pangajalan nu Belento.

¹⁴⁹ Potombihingakon mae na aku kalana kalibosan nu Belento o, Tumpu jagaiakon mae na kantumuu'anku kalana ka'adilan nu Belento.

¹⁵⁰ Mian anu mololoi' mae aku ingohanimo aha ko niat ma'idek ka' madi' mompajuli atulan nu Belento.

¹⁵¹ Panyo Belento ingohanimo, o Tumpu, iwi-iwi' na palentah nu Belento totu'u.

¹⁵² Salatanmo pe'e naipuan mae sinumbu'kumo i pangajalan nu Belento iwi-iwi', taalu' Belento nontantukanmo sampe toka sidu-sidutu'.

Do'a mongkakase da otulungi mae

¹⁵³ Toakon mae na kasansala'anku ka' posalamatakon mae na aku, kalana aku madi' mongkolilimi atulan nu Belento.

¹⁵⁴ Tinjohiakon mae na palakalangku ka' pobebasakon mae na aku; posalamatakon mae na aku susumo anu jinanji'mo nu Belento.

¹⁵⁵ Mian anu ma'idek na kinyonyoanyo madi' oposalamat, kalana madi' tulu-tulutan hi atulan nu Belento.

¹⁵⁶ Talalo hondo daka' na kalibosan nu Belento o, Tumpu, posalamatakon mae na aku susumo ka'adilan nu Belento.

¹⁵⁷ Manjoo' na mian anu monsampobali' mae aku ka' mololoi'mo mae aku, panyo aku madi' mongkolilimi atulan nu Belento.

¹⁵⁸ Ku ka'ideki na montoa mian haha aijo' anu singkap palaganta kalana aha madi' montuluti pangajalan nu Belento.

¹⁵⁹ Toa mae na aku talalo hondo mongka'ima'i palentah nu Belento, o, Tumpu, posalamatakon mae na aku kalana kalibosan nu Belento.

¹⁶⁰ Iwi-iwi' na potatae nu Belento totu'u, iwi-iwi' na atulan nu Belento anu adin tataap sampe toka sidu-sidutu'.

Monsombah atulan nu Tumpu

¹⁶¹ To mia-mian anu balakuasa mololoi'mo mae aku maumo madi' ko sababnyo, panyo ola atulan nu Belento na ku kabuhuk.

¹⁶² Anu jinanji'mo nu Belento nompolame'mo aku sumomo mian anu nohumpakmo halata'.

¹⁶³ Iwi-iwi' na anu madi' totu'u ku ka'ideki, panyo atulan nu Belento ku ka'ima'i.

¹⁶⁴ Aku saja' sabole-boleh montalima kaseh hi Belento, kalana atulan nu Belento anu adin.

¹⁶⁵ Mian anu mongka'ima'i atulan nu Belento madi' ko anu mompoposia ka' kinyonyoa madi' mangada', madi' ko anu moko ala mongewa' aha.

¹⁶⁶ Aku montanda'imo kasalamatan anu lengkat hi Belento, o, Tumpu, palentah iwi-iwi' nu Belento ku bau.

¹⁶⁷ Aku montulutimo atulan iwi-iwi' nu Belento, ka' ku ka'ima'i totu-totu'u nu kinyonyoangku.

¹⁶⁸ Aku montulutimo palentah ka' pokinde' nu Belento, kalana tinoamo mae nu Belento iwi-iwi' na palabuatanku.

Do'a mongkakase da otulungi

¹⁶⁹ O' amalakon da potataengku momoita tulung aiya toka hi Belento, o, Tumpu, popangalati' mae na aku, susumo anu jinanji'mo nu Belento.

¹⁷⁰ De timbali da potataengku mongkakase aiya toka hi Belento, posalamatakon mae na aku susumo anu jinanji'mo nu Belento.

¹⁷¹ Aku saja'mo mompuji' Belento, kalana Belento nompotinganmo aku atulan nu Belento.

¹⁷² Aku kahanda'mo monyanyiakon apaa na anu jinanji'mo nu Belento, kalana iwi-iwi' na palentah nu Belento adin.

¹⁷³ O' amalakon da Belento saja' sanang mae na montulungi aku, kalana aku nompile'imo da montulutimo atulan nu Belento.

¹⁷⁴ Kinyonyoangku mongindimo kasalamatan lengkat mae hi Belento, atulan nu Belento nompolame'mo kinyonyoangku.

¹⁷⁵ Bakas da aku tumuu', aku mompuji'mo Belento, o' amalakon da atulan iwi-iwi' nu Belento montulungi mae aku.

¹⁷⁶ Aku tinalasmo ijalan sumomo domba anu nolapusmo, jadi tokamo mae ka' liomo na posaihon nu Belento aiya, kalana aku madi' mongkolilimi iwi-iwi' na palentah nu Belento.