MAZMUR 116 - KITAB NU TUMPU ALLA LELE MA'IMAI'

Madi'mo tinokan mae nu balaa' kapatean

¹ Ku ka'ima'i na Tumpu, kalana Ia nohongomo mae aku, ka' nonginau'mo mae anu pinoitangkumo.

² Nu hongo mae na aku, de aku mongkakasemo hi – Ia.

³ Aku pinopobuhukmo mae nu balaa' anu monsilakai, ka mabuhuk hi anu monsilakai nontumbuhimo mae aku, sahingga aku nangada'mo ka' nabuhukmo.

⁴ Sahingga aku nomoitamo tulung hi Tumpu, “O Tumpu, ku poita, posalamatakon mae na aku!”

⁵ Tumpu aijo' pangkalibosi ka'adin! Tumpu Allah-nto saja' hondo mongkalibosi.

⁶ Tumpu mompotuu' to mia-mian anu tumuu' madi' molabi-labi; tempo'nyo aku madi'mo noko ala, pinosalamat-Nyomo na aku.

⁷ Pinosanangkumo na kinyonyoangku, kalana nu kanonongi nu Tumpu na aku.

⁸ Tumpu nompojo'onmo mae hi belengku da madi'tinokan mae nu balaa' anu monsilakai, i hase'-Nyomo na aku ka' madi'mo pinojohok-Nyo na aku mohumpak balaa'.

⁹ Sahingga aku nongoa'imo kantumuu'an i dunia aiya anu jinaganmo nu Tumpu.

¹⁰ Aku sabole-boleh palesaya, mau mule' aku notataemo, “Aku talalomo hondo nongoa'i kasansala'an.”

¹¹ De aku bingungmo aku motataemo, “Madi'mo ko samiannyo na timbali opalesaya.”

¹² Apaa na ku bee' hi Tumpu bau pombalosi kanonongan-Nyo hi belengku?

¹³ Aku momboamo anggur osombahkon hi Tumpu bau pontalima kaseh kalana Ia nontulungimo mae.

¹⁴ Aku tionyo ahi' mongganapi anu jinanji'kumo hi Ia, i ahop nu mian iwi-iwi' anu palesayamo hi Ia.

¹⁵ Tumpu talalo hondo monsusuai kasilakan nu samian na anu Nu kalibosi.

¹⁶ Aku aiya posaihon nu – Belento, o, Tumpu, susumo tinangku, aku suele monsombah ahi' Belento. Belento nonsabatakonmo aku i uno nu talungku'.

¹⁷ Aku momboamo koloban bau pontalima kaseh hi Belento, ka' mompotoka do'a hi Belento.

¹⁸ Aku mongganapimo anu jinanji'kumo hi Tumpu, i ahop nu mian iwi-iwi' anu palesayamo hi Ia.

¹⁹ Anu sinihukmo i natan nu Laigan nu Tumpu, itotonga' nu kota' Yerusalem. O puji' na Tumpu!