MAZMUR 112 - KITAB NU TUMPU ALLA LELE MA'IMAI'

Kantumuu'an ma'ima' nu mian anu manonong

¹ O puji' na Tumpu. Mohumpak ka'ima'an na mian anu tulu-tulutan, anu mongka'ima'i iwi-iwi' na palentah nu Tumpu.

² To ana-anaknyo na mongkuasaije lipu' aiya, lee' nu mian anu manonong obalakati.

³ Aha sa'anakan kayamo ka' madi'mo susa', ka' ia sanangmo na kantumuu'annyo sampe toka sidu-sidutu'.

⁴ Jingka monjingkaimo i uno nu pikat kona hi mian anu hodi' na kinyonyoanyo, kona hi mian anu adin, pangkalibosi ka' manonong.

⁵ Mohumpak ka'ima'an na mian anu manonong ka' sanang na monsaboli ka' madi' tageo' i uno nu iwi-iwi na ulusan.

⁶ Mian anu manonong saja' nu humpak na anu nu kahanda'i; ia saja' o inau' sampe toka sidu-sidutu'.

⁷ Ia madi' mabuhuk na mohumpak lele anu ma'idek, kinyonyoanyo mahoson kalana palesaya hi Tumpu.

⁸ Ia madi' bata-bata kabai mabuhuk, kalana nu palesaya hondo sampobali'nyo tionyo nu patundu'.

⁹ Ia mombagi-bagiakon halata'nyo, ka' mombee'i apa-apaa hi mian anu kasiasi; ia saja' mombau anu ma'ima', kalana aijo' ia balakuasa ka' oholomati.

¹⁰ Mian anu ma'idek na kinyonyoanyo montoa ia, lantas motambuha'mo; bese' nu aha koyokobanmo kalana mongka'idekimo. Lantas aha silakamo; anu nu ima-imani nu aha madi'mo nu humpak nu aha sampe toka sidu-sidutu'.