MAZMUR 110 - KITAB NU TUMPU ALLA LELE MA'IMAI'

Tumpu ka' tomundo' anu pinile'an-Nyomo

¹ Mazmur i Daud. Tumpu nompoto'imo hi tuanku, “Suhangmo i sasu koanan-Ku, sangkut aha anu monsampobali' beleyum Ku popatundu'mo hi beleyum.”

² Lengkat mae i Sion Tumpu mompodaka'mo kalaja'an nu beleyum; kuasaimo na aha anu monsampobali' beleyum!

³ De tokamo na sinaanyo beleyum mongkuasaimo, i bungkutnyo anu susi', layat nu beleyum sanang na mamba mahampate. Sumomo dondu'ok daagi' subu, to oli-olitau tokamo mae hi beleyum.

⁴ Tumpu binajanji' sinumpa'akon, Ia madi'mo timbali mompojalo janji'-Nyo. “Belentomo na imam sampe toka sidu-sidutu', sumomo i Melkisedek.”

⁵ Tumpu i Sasu koanan nu beleyum, de Ia motambuha', to tomu-tomundo, Nu patundu'mo.

⁶ Ia mohukumo to bansa-bansa, sahingga bangke-bangke nu mian paha-paha bandangmo. Ia monsilakaimo aha anu singkap balakuasa, i songko-songko na dunia.

⁷ Tomundo' monginumo uee nu kaunyo i sohipi' nu jalan, salatan pinohosonmo, ia untungmo na mahampate.