MAZMUR 109 - KITAB NU TUMPU ALLA LELE MA'IMAI'

Do'a i uno nu kasusa'an

¹ Anu mongkapalai panyanyi, Mazmur i Daud. O, Tumpu anu saja' ku puji', boli ola tongo.

² Kalana aku tinumbuhanmo mae nu mian anu toto ide-idek na kinyonyoanyo ka' anu saja' mongakali anu lewa' mombebakon sisi-sisik anu madi' totu'u mongkona aku.

³ Aha lewa'mo montaloakon mae hi belengku potatae anu soa'nyo mongka'ideki mae, ka' mompahampateakonmo mae aku mau madi' ko sababnyo.

⁴ Aha montuuk mae aku mau mule' aku mongkalibosi aha, ka' nondo'akonmo aha.

⁵ Kanononganku nubalosakon mae nu aha nu palabuatan anu ma'idek, ka' kalibosanku nubalosakon mae nu aha nu han mongka'ideki mae aku.

⁶ Hangkatmo na samian anu ma'idek na kinyonyoanyo da momputusi ia, bakas da ia nu kalaak nu anu monsampobali' ia.

⁷ Bakas da ia oputusi ka' otantukan sinala'mo ka' bakas da o'anggapmo dosa' na do'anyo.

⁸ Bakas da kantumuu'annyo sampamo mingkot, ka' pangkatnyo nu alamo nu mian sangga'at.

⁹ Bakas da to ana-anaknyo unonmo madi'mo ko tuumanyo ka' tinanyo, ka' bengkele'nyo balumo.

¹⁰ Bakas da to ana-anaknyo lewa' mamba momoita hi mian iyaya mae ka' olaa'mo da bolimo jojoong i laigannyo anu nohobo'mo aijo'.

¹¹ Bakas da iwi-iwi' na halata'nyo nu alamo nu mian anu montage samaya hi ia, ka' hasin nu ia nalawe na nokalaja nu agoimo nu mian.

¹² Boli ko anu mongkanonongi ia, kabai mongkalibosi to ana-anaknyo anu pinala'iannyomo.

¹³ Bakas da iwi-iwi' na lee'nyo opateimo, ka' sanggonyo nu kolilimimo nu tulunan anu aiya mae i ahop.

¹⁴ Bakas da palabuatan anu ma'idek nu mompolee'nyo saja' nu inau' nu Tumpu, ka' dosa' nu tinanyo madi' ohapusi.

¹⁵ Bakas da dosa' nu aha saja' nu inau' nu Tumpu, ka' madi'mo ko anu lewa' montutugi' aha i dunia.

¹⁶ Kalana mian aijo' madi' toho' monginau' mompotoa kalibosan. Ia monsakisa mian kasiasi ka' anu sansala, ka' nompateimo mian anu madi' mahoson.

¹⁷ Ia sanang hondo na mongkutuki; bakas da ia nukona nu kutuk! Ia madi' sanang na mombalakati, Bakas da ia madi' mohumpak balakat!

¹⁸ De hi ia mongkutuki aijo' sa'angu' na palabuatan anu madi'mo okatalanggangakon, pokakanamo sumo ia mompusok baju'nyo. Bakas da kutuk aijo' na molabe-labesmo susumo uee aijo' i butongnyo, ka' susumo lanya' minsoop i uno nu buku nu butongnyo iwi-iwi'.

¹⁹ Bakas da kutuk aijo' na molupi' ia susumo baju', ka' saja' mongkalekodi ia susumo pombutu'.

²⁰ O, Tumpu nabu'akonmo na hukuman aijo' hi mian anu montutuk mae aku, hi aha anu motatae mae ma'idek hi belengku.

²¹ Panyo tulungiakon mae na aku susumo anu jinanji'mo nu-Belento, o, Tumpungku, posalamatakon mae na aku kalana kanonongan ka' kalibosan nu Belento.

²² Kalana aku kasiasi ka' sinansalamo, ka' kinyonyoangku binelaonmo naleengmo hondo.

²³ Aku kinoboli' nolapusmo susumo, lolung de malomo, aku kinokabahakonmo susumo kihi-kihi'.

²⁴ Ike-ike'ku i langkakatanmo kalana binapuasa'mo, butongku talalomo hondo nagesuk.

²⁵ To mia-mian anu montoa mae aku, mongalu mae aku ka' molilo-lilokakon ubak.

²⁶ Tulungiakon mae na aku, O Tumpungku, posalamatakon mae na aku susumo kalibosan nu Belento.

²⁷ Sahingga nusumbu' nu sampobali'ku saba' aijo' palabuatan nu Belento, saba' Belento, Tumpu na nombau han aijo'.

²⁸ Mau mule' aha mongkutuki mae aku, o' amalakon da Belento mombalakati mae aku. Mau mule' aha mongewa mae aku, aha saidi' mae opopo ambangje; panyo o' amalakon, aku posaihon nu Belento, mohumpak kalame'an.

²⁹ Bakas da to mia-mian anu montutuk mae aku mohumpak anu moko ambang, ka' han anu moko ambang aijo' monsaingkukubi aha susumo juba'.

³⁰ Aku mompuji'mo Tumpu nu potatae anu ku popodaka' hondo, mombebakon Ia, hau-haunyo aku kiijo' hi aha mian anu binalagombumo.

³¹ Kalana Ia montinjohi ka' momposalamat mian anu kasiasi da boli mohumpak hukuman mate anu nu nabu'akon mae nu aha hi ia.