MAZMUR 108 - KITAB NU TUMPU ALLA LELE MA'IMAI'

Do'a momoita tulung da boli mae ko anu monsampobali'

¹ Nyanyian Mazmur i Daud.

² Palesaya totu-totu'u hondo na aku, o, Tumpu, aku manyanyimo ka' mompuji'mo Belento.

³ Pobulamo, o santuu'ku! Pobulamo, o gambus tiba kasapi! Aku molikomo jingkahang nu sinaa.

⁴ O, Tumpu aku montalimakasemo hi-Belento aijo' hi aha to bansa-bansa. Aku kahanda monyanyi mompuji Belento i tonga' nu mian.

⁵ Kalana kalibosan nu-Belento daka' hondo toka-tokamo aita' mae i langit, ka' kanonongan nu-Belento toka-tokamo aita' mae i kundom.

⁶ O, Tumpu, potoa mae na katalasanggoan nu-Belento aita' mae i langit, ka' kadaka'an nu sanggo nu-Belento i songko-songko na dunia.

⁷ Posalamatakon mae na kami nu kakuasa'an nu-Belento, taamiakon mae na do'a mami, da to mia-mian anu nukalibosi nu-Belento mohumpak kasalamatan.

⁸ Kiita' mae i kajojoongan-Nyo anu susi' Tumpu notataemo mae, “Aku montaligalaimo ka' mombagi-bagiakonmo tano' nu Sikhem, Bangka'nyo nu Sukot Ku buangakonmo onde.

⁹ I Gilead ka' i Manasye Aku na tumpunyo, i Efraim baumo topi wajang-Ku, ka' i Yehuda baumo tokon nu kalaja'an-Ku;

¹⁰ Panyo Moab baumo tampat pombaso'ian-Ku tengke; Aku montaligalaimo kalana nompatundu'mo Filistea. Hi aha Edom Ku lumbu'akonmo mokiijo' na sapatung-Ku, salaku bau pontandai saba' ia anung-Kumo.”

¹¹ Ihe na momboa aku mamba mokiijo' i Edom? Ihe na molaya' aku mamba mokiijo' i kota' anu ko bentengnyo aijo'?

¹² O, Tumpu, pa' madi' mamba na Belento hingga-hinggat tiba kami? Pa' madi' mamba na Belento hingga-hinggat tiba suludadu mami?

¹³ Tulungiakon mae na kami da boli mae ko anu monsampobali', kalana de ola mian na montulungi mae madi' ko gunanyo.

¹⁴ De tiba Tumpu, kita timbali baani ka' mahoson; Iamo na anu mompatundu' anu monsampobali' mae kita.