MAZMUR 102 - KITAB NU TUMPU ALLA LELE MA'IMAI'

Do'a i uno nu kasusa'an

¹ Do'a nu mian anu sinansalamo ka' nalawemo hondo, nompoto'imo kasansalannyo hi Tumpu.

² O Tumpu, potombihingakon mae na do'angku, de timbali da anu ku kakase aiya toka hi Belento.

³ Boli ola mosiloi panyo tonto'i mae na aku de aku i unomo nu kasusa'an. Potombihingakon mae de aku mongkakasemo ka' taami mae lia-lia' na aku.

⁴ Kantumuu'anku ola saimpotulu madi'mo otoa-toa sumomo tibuk; bukungku iwi-iwi' sumomo oba nu apu.

⁵ Aku nalawemo sumomo hemput anu nanggasmo; ka' madi'mo ko kinyonyoa mongkaan.

⁶ Aku nolokihismo hoso-hoson; butongku me kilit kampi-kampit i buku.

⁷ Aku sumomo tomonsi' undan i tampat padang anu mateges na tano'nyo, sumomo tomonsi' mongkoek i tampat anu mohobo-hobo'mo ka' i liingmo hondo.

⁸ Aku madi'mo moko ala tohoyot, sumomo tomonsi' anu madi'mo ko sanga-sangalunyo aita' i bawo nu atop nu laigan.

⁹ Sansina-sinaa nupopo'ambang mae nu mian anu monsampobali' mae aku; sanggongku baumo pontotobi'akon mian de mian anu mongka'ideki mae aku motambuha'mo.

¹⁰ Aku mongkaan abu' sumomo roti, anu ku inum mogalo-galo'mo lolu',

¹¹ kalana tambuha' nu Belento anu taha-tahahumo sahingga aku i hangkatmo ka' ingalinmo nu Belento.

¹² Kantumuu'anku ola sinaimpotulu sumomo lolung salatan malomo; aku nangkalualemo sumomo hemput.

¹³ Panyo Belento, o, Tumpu, Tomundo' anu sampe toka sidu-sidutu', sabole-boleh o'inau sampe molapi-lapis na tulunan.

¹⁴ Belentomo tuminjomo mae ka' mongkalibosimo Sion, tempo'nyo tinokamo da mongkalibosi ia.

¹⁵ Kalana to posa-posaihon nu Belento nongka'ima'imo ia, maumo ia nohobo'mo. Aha nongkalibosimo ia maumo ia tinimbalimo abu'.

¹⁶ Kuasa nu Tumpu nukabuhukmo nu to bansa-bansa; ka' kakuasan-Nyo anu tinalasanggomo aijo' nukabuhukmo nu to tomu-tomundo' iwi-iwi',

¹⁷ de Tumpu po'ule'mo mompotinjo Sion, ka' po'ule'mo otoa na katalasanggoan-Nyo.

¹⁸ Nu hongomo na do'a nu mian anu palesayamo hi ia aijo'mo mian anu talalomo hondo sinusa', ka' nu talimamo na do'a nu aha.

¹⁹ Tulismo iwi-iwi' na palabuatan nu Tumpu da nubasa' nu lee' to anu aiya mae i ahop, da bansa anu ma'isa pe'e pinohampe timbali mompuji' Ia.

²⁰ Tumpu aita' mae i tampatnyo anu matangkas montoa mae mo uuka, aita' mae i suluga', nu toa mae nu Tumpu na dunia

²¹ da nuhongo na potatae nu mian anu tinalungku'mo lewa' mohehengakon kasala'an, ka' mompobebasmo mian anu nohumpakmo hukuman osilakai.

²² Sahingga sanggonyo obebakonmo kiijo' i Sion, ka' Ia lewa'mo o puji' kiijo' i Yerusalem.

²³ Tempo'nyo to bansa-bansa ka' to kala-kalaja'an sinihukmo da monsombahmo Tumpu.

²⁴ Tumpu nompato'imo kahosonanku tempo'nyo aku daagi' olitau, ka' nongkodo'imo umunku.

²⁵ Lantas aku notataemo, “O, Tumpu boli mongala nyawangku i pohintonga'an nu kantumuu'anku.” O, Tumpu, Belento tumuu' sampe toka sidu-sidutu',

²⁶ naipuan mae Belento nompotimbalimo dunia; langit suele lima nu Belento na nompotimbali.

²⁷ Iwi-iwi' aijo' mingkot, panyo Belento na sabole-boleh ahi' daagi'; iwi-iwi' aijo' maluso'mo susumo baju'. O'alinmo nu Belento susumo baju' anu pinmo, lantas iwi-iwi' mahu'mo.

²⁸ Panyo Belento na satataapnyo ahi', kantumuu'an nu Belento madi' ko ka'ahenannyo.

²⁹ To ana-anak makumpu mami tumuu' madi'mo ko anu mompoposia, ka' saja'mo madi' ko anu mompoposia kalana i unomo nu ponjaga'an nu Belento.