MAZMUR 10 - KITAB NU TUMPU ALLA LELE MA'IMAI'

Do'a mongkakase da ko ka adilan

¹ Kadaka' Belento najo'onmo, o Tumpu, ka' natisulukmo tempo'nyo kami tinokanmo nu kasusa'an?

² Mian anu ma'idek na kinyonyoanyo kinobubuunmo na monsakisa mian anu kasiasi; pobakas da aha nu posi konaje nu so'o nu aha.

³ Mian anu ma'idek na kinyonyoanyo sinombongmo nu tanga'annyo anu ma'i-ma'idek, miana nu mangoa nontotobi'akonmo ka' madi'mo nontalima Tumpu.

⁴ Mian anu baladosa' madi'mo mompajuli Tumpu kalana ia talalo sombong sahingga koonyo madi' ko Tumpu.

⁵ Mian anu ma'idek na kinyonyoanyo de mombaumo apa-apaa nu humpak na hasinnyo; ia madi' mangalati' kabai monsumbu' atulan nu Tumpu ka' madi' mompajuli iwi-iwi' na anu mongewa mae ia.

⁶ Koonyo i uno nu kinyonyoanyo, “madi' ola palasuma na aku, ka' molundu-lundu na tulunannyo sumomo ahi' suele mian anu madi' mombau anu ma'idek i uno nu kantumuu'annyo.”

⁷ Ia ola saja' montotobi'akon, montambuha'i ka' mule' mongakali, potataenyo ola saja' mongka'ideki ka' anu toto ide-idek na otaeakon.

^8-9 Ia matisuluk ikampung toto ise-ise' ko kahanda'mo mompatei mian anu madi' ko sala'nyo. Susumo singa montampungimo na ia isambiha' nu kumbung sola' mondoyoni mian anu madi' mahoson. Ia saja' montumbuhi mian anu kasiasi itampat anu liing, mompanggohakonmo ka' mohela'mo mamba mombatuki ia.

¹⁰ Ia tinolopoukmo, kalana kahanda'mo malalumpat monsa'u; pagalamo pinakisanyo hoso-hoson na mian da motua'mo.

¹¹ Tinutugannyo, “Tumpu nongkolilimimo ka' madi'mo sola' mompotomatakon mae; ka' mule' Ia tantu madi'mo daagi' saja' montoa mae aku!”

¹² Tinjomo mae, o Tumpu bee'imo hukuman na mian anu ma'idek na kinyonyoanyo. Inau'akon na mian anu binee'anmo kasansala'an!

¹³ Kadaka' mian anu ma'idek na kinyonyoanyo me saja' mongalu Tumpu ka' bapikin koonyo Tumpu madi' mule' mohukum ia?

¹⁴ Panyo Belento na montoa ahi' ia, saja' nu inau' nu Belento na kasusa'an tiba kasansala'an, ka' saja' ahi' kahanda' montulungi. Mian anu madi'mo mahoson me saja' mongasanakon butongnyo hi Belento. Belento na saja' ahi' motulungi mian anu kasiasi.

¹⁵ Mian anu ma'idek na kinyonyoanyo tiba mian anu palaganta, pato'akonmo na kakuasa'annyo; hukumo na aha kalana palabuatan nu aha aijo' sampe aha madi'mo daagi' moko ala mombau apa-apaa.

¹⁶ Tumpu mompalentah sampe toka sidu-sidutu' to bansa-bansa anu madi' monsumbu' Ia, saidi' mae madi'mo daagi' ko anu aijo' itano'-Nyo.

¹⁷ O, Tumpu Belento nohongomo do'a nu mian anu madi' mingkaliangan na kantumuu'annyo ka' nompohosonmo kinyonyoa nu aha.

¹⁸ Anak anu madi'mo ko tuumanyo ka' tinanyo ka' mian anu binee'anmo kasansala'an, ti ninjohanmo nu Belento na palakalanyo, da madi'mo ko mian anu sola' monggala-gala aha.