MATIUS 27 - KITAB NU TUMPU ALLA LELE MA'IMAI'

I Yesus binoamo hi Pilatus

¹ Subu-subu hondo, iwi-iwi' na Kapala nu to Ima-imam, ka' polaya' nu Yahudi nombaumo sa'angu' na kaputusan da o pateimo na i Yesus.

² Aha nompungu Ia, ka' nomboa Ia, lantas nombee'mo hi Pilatus, gubernur pamalentahan nu Roma.

Kinapatean i Yudas

³ Salatan i Yudas anu nongkabisa'i aijo' nontoa i Yesus binee'anmo hukuman, ia nompele-pele'mo. Lantas ia nonsule'akonmo tolumpulu' na doi salaka aijo' hi Kapala nu to Ima-imam ka' to pola-polaya' nu Yahudi.

⁴ Ia notatae, “Aku binala dosa'mo, nongkabisa'imo mian anu madi' ko sala'nyo, sahingga Ia i hukum nate!” Panyo aha nontaami, “Kami madi paduli itina'? Aijo' ulusan miu!”

⁵ I Yudas nolumbu'akon doi i uno nu Laigan nu Tumpu, lantas namba ka' nonsegotmo butong, ka' natikalayo'.

⁶ Kapala nu to Ima-imam nontoluk doi aijo' ka' notatae, “Doi aiya, doi nu baso'. Koonyo nu atulan nu agama, doi aiya madi' timbali oposoop i uno nu tampat ponguna'an doi i Laigan nu Tumpu.”

⁷ Salatan nosa'angu'mo na pikilan nu aha, pinakemo nu aha na doi aijo' bau pinongoli tano' anu osanggohi Tano' nu anu Mombau Kuhon Tano'. Tano' aijo' opake bau pongkubulan to mia-mian anu i santano'an.

⁸ Mokonyo aijo' sampe sinaa aiya, tano' aijo' sinanggohan, “Tano' Baso'”.

⁹ Kalana aijo', tinimbalimo apaa na anu tinaeakon nu Nabi Yeremia, aijo'mo, “Aha nontalima tolumpulu' na doi salaka, aijo'mo na oli nu anu sinetujuanmo nu bansa Israel salaku pinombayan Ia.

¹⁰ Ka' doi aijo' pinakemo nu aha bau pinongoli Tano' nu anu Mombau Kuhon Tano', sumo anu pinalentahkon nu Tumpu hi belengku.”

I Pilatus nompalesamo palakala i Yesus

¹¹ Tempo'nyo i Yesus nangadapmo hi Pilatus, gubernur nu lipu' aijo', i Pilatus nompokilawa, “Pa' Belento Tomundo' nu mian Yahudi?” “Sumo itina'mo potataeum”, tinaaman i Yesus.

¹² Panyo tempo'nyo Kapala nu to Ima-imam ka' to pola-polaya' nu Yahudi nontaloakonmo posala' anu manjoo' hondo kona hi Yesus, Ia madi' montaami apa-apaa.

¹³ Kalana aijo' i Pilatus notatae hi Ia, “Te Belento madi' mohongo iwi-iwi' posala' nu aha hi Belento aijo'?”

¹⁴ Panyo i Yesus madi' nontaami mau pe'e santaa', sahingga gubernur aijo' binangangmo hondo.

I Yesus binee'an hukuman mate

¹⁵ De tempo'nyomo Molame'akon Paskah, gubernur biasanyo mompolapas samian anu tinalungku' montuluti pongka'oho' nu mian da'isan. Ihe na anu nu pile'i nu aha.

¹⁶ Tempo'nyo aitu daagi' ko samian na i hukum anu talasanggo, Sanggonyo i Yesus Barabas.

¹⁷ Jadi, tempo'nyo mian da'isan sinilimu'mo, i Pilatus nompokilawamo hi aha, “Ihe na anu oka'oho' miu, da ku lapasakon hi komiu? I Yesus Barabas kabai i Yesus anu osanggohi i Kristus?”

¹⁸ I Pilatus notatae sumo aijo', kalana ia monsumbu' saba' anu mongkuasai Yahudi nombee' i Yesus hi aha, kalana aha madi' sanang na kinyonyoa nu aha.

¹⁹ Tempo'nyo aitu i Pilatus hau-haunyo sinumuhang i kulusi, anu pomputusian palakala, bengkele'nyo nompotuun potuunon sumo uuka hi ia, “Boli beleyum matigalo' i palakala hi mian anu madi' ko kosala'nyo aijo', sabab kalana Ia, aku kino ipion ma'idek sinaa aiya.”

²⁰ Panyo Kapala nu to Ima-imam ka' to pola-polaya' nu Yahudi sabole-bole monsale'i mian da'isan da mompoita hi Pilatus, da i Barabas opobebas ka' i Yesus na o hukum mate.

²¹ Lantas gubernur aijo' po'ule' nompokilawa hi aha, “Aha ua'aha na mian aijo', ihe na oka'oho' miu ku pobebasakon hi komiu?” “I Barabas,” tinaaman nu aha.

²² “Desumo aitu, apaa na kubau hi Yesus anu osanggohi Kristus?” i Pilatus nompokilawa hi aha. “Salibmo na Ia!” tinaaman nu aha iwi-iwi'.

²³ “Panyo apaa na anu ma'idek binau-Nyo?” pinokilawa i Pilatus. Lantas aha noloboo' lebe mahoson mule', “Salibmo na Ia!”

²⁴ Ahennyo i Pilatus tinonginau', saba' ia madi'mo timbali moko ala mombau apa-apaa, ka' to mia-mian haha aijo' ugaat motomuhukmo. Jadi ia nongala uee lantas i ahop nu mian da'isan aijo', ia nombaso'imo limanyo ka' notatae, “Aku madi' mangaku ko sala'nyo i kapatean nu mian aiya! Aijo' ulusan miu!”

²⁵ Iwi-iwi' na mian da'isan aijo' nontaami, “Ii', pojohokmo da kamimo na montanggung ka' to ana-anak mami hukuman lantalan la silakamo!”

²⁶ Lapas aijo' i Pilatus nompolapasmo i Barabas hi aha, ka' aha nonsaimo mian nompohos i Yesus; ka' nombee' Ia da o salib.

To Sulu-suludadu nongkabiangimo i Yesus

²⁷ Lapas aijo' to Sulu-suludadu i Pilatus nomboamo i Yesus ninsoop i laigan daka' nu gubernur, ka' iwi-iwi' na pasukan sinilimu'mo nontiikubi Yesus.

²⁸ Aha nongukat baju' i Yesus, ka' nompopake hi Ia juba' buhitnyo mingkamumu'.

²⁹ Aha noombau sa'angu' na makota kandang anu ko hii'nyo, ka' pinosoku' i ubak i Yesus. Lapas aitu aha nompotoong sangkau na tokon pinotoong-Nyo i lima, i sasu koanan-Nyo, lantas tinolodadupu na aha i ahop-Nyo ka' nompopo'ambang Ia. “Soosa' Tomundo Mian nu Yahudi!” na koonyo nu aha.

³⁰ Aha nontupe'i Ia, ka' nongala tokon aijo', lantas nombongkuk Ia i ubak-Nyo.

³¹ Lapas aha nompahaikakon Ia, aha nongukat juba' buhitnyo kamumu', lantas po'ule' nompopake posi baju'-Nyo. Lapas aitu, Ia binoa nosabat da o salibmo.

I Yesus sinalibmo

³² I totonga' nu jalan, aha nompahakabot tiba samian anu lengkat mae i Kirene, sanggonyo i Simon. Aha nompakisa mian aijo' monsimbu salib i Yesus.

³³ Lapas aitu, aha tinoka i sa'angu' na tampat sanggonyo Golgota anu alati'nyo, “Tampat nu Popoake”.

³⁴ I kiijo' aha nompo'inumi Yesus anggur anu ginalo'an nu pou'. Panyo salatan i Yesus nontumi'mo anggur aijo', Ia madi'mo nongka'oho' nonginum.

³⁵ Lapas aijo' aha nonsalibmo Ia ka' nombagi-bagimo baju'-Nyo ingonde na nombagi.

³⁶ Lapas aijo' aha sinumuhang monjagai Ia i kiijo'.

³⁷ I buan nu ubak-Nyo, aha nompokona tulisan anu momposala' aijo'mo: “Aiyamo na i Yesus, Tomundo nu Mian Yahudi.”

³⁸ Hingga-hinggat tiba Ia, aha nonsalib suele tololang ua'aha; samian i sasu koanan, samian mule' i sasu kowi-Nyo.

³⁹ To mia-mian anu notulu i kiijo' kinolilo-lilok na ubak ka' nongambangi i Yesus.

⁴⁰ Aha notatae, “Beleyum na anu mongka'oho' mohobo'akon Laigan nu Tumpu, ka' nompotinjo ola i uno nu tolunsinaa! De Belento Anak nu Tumpu, pintau'mo mae i salib atina' ka' oposalamat na butong-Um!”

⁴¹ Sumo aitumo mule' na Kapala nu to Ima-imam ka' to gulu-gulu' agama tiba to pola-polaya' nu Yahudi mompopo'ambang i Yesus. Aha notatae,

⁴² “Ia momposalamatakon mian sangga'at, padahan posi butong-Nyo, Ia madi' moko ala momposalamat! De Ia tomundo nu Israel, sahanyo Ia uuka mintau'mo lengkat mae i salib aijo', atina'je ka' kami mongka'oho' palesaya hi Ia.

⁴³ Ia palesaya hi Tumpu ka' notatae, tukoonyo Ia Anak nu Tumpu. Soba imbo' da otoanto pa' Tumpu timbali momposalamat Ia uuka.”

⁴⁴ To tolo-tololang anu sinalib tiba Ia, aijo' suele mompopo'ambang Ia sumo aijo'.

I Yesus sinilakamo

⁴⁵ Sonsu-sonsu'un na sinaa, kopinnyo totolu' na jam, songko-songko na lipu' tinimbali pinikat.

⁴⁶ Jam totolu' mamalom, i Yesus noloboo' notatae daka-daka', “Eli, Eli lama sabakhtani?” alati'nyo, “O Tumpu Ku, o Tumpu Ku, kadaka' Belento nompala'imo Aku?”

⁴⁷ To pia-piangkuka na mian kiijo' nohongo loboo'nyo, ka' notatae, “Ia molaga i Elia!”

⁴⁸ Samian anu kiijo' hi aha nopadeka' lia-lia' namba nongala bunga gahanggan, lantas i lobongnyo i anggur malosing. Lapas aitu pinosusuknyo i tuntung nu kau' ka' pinotepesnyo i biwi Yesus.

⁴⁹ Panyo to mia-mian sangga'at notatae, “Tanda'i pe'e, imbo' da otoanto, pa' i Elia toka momposalamat Ia!”

⁵⁰ Lapas aitu i Yesus noloboo' mule' daka-daka', lantas nompopupusmo nyawa-Nyo.

⁵¹ Lalanse' anu pinosegot i uno nu Laigan nu Tumpu, nobeak tinimbali ohua', lengkat i buannyo tinoka i aluknyo. Dunia ginayu'an, ka' to bungku-bungkutnyo nu batu nobiha-biha'.

⁵² To kubu-kubulan tinabuka', ka' manjoo' na mian anu pinalesayamo hi Tumpu anu natemo po'ule' pinotumuu'.

⁵³ Aha nosabat lengkat i to kubu-kubulan, salalan i Yesus po'ule'mo tinumuu' lengkat i kapateannyo, ka' aha ninsoopmo nokiijo' i Yerusalem, ka' kiijo' mae da'isan na mian montoamo aha.

⁵⁴ Kapala nu pasukan nohingga-hinggat tiba to sulu-suludadu anu hau-haunyo monjagai Yesus, inabuhukmo hondo salatan nongoa'imo luulu' ka' iwi-iwi' anu jinadimo aijo'. Aha notatae, “Totu'u, Ia aiya Anak nu Tumpu!”

⁵⁵ I kiijo' suele manjoo' na to bou-boune anu hau-haunyo montanggalakon mae. Ahamo na anu nombatukimo i Yesus nontulungi Ia lengkat pe'e mae i Galilea.

⁵⁶ Anu kiijo' hi aha aitumo i Maria Makdalena, Maria tinanyo i Yakobus ka' i Yusuf, ka' tinanyo nu to ana-anak i Zebedeus.

I Yesus i lamunmo

⁵⁷ Pihi aijo' tinokamo na samian anu kaya lengkat mae i Arimatea, sanggonyo i Yusuf. Ia suele anu saja' mombatuki Yesus.

⁵⁸ Ia namba hi Pilatus ka' nomoita mayat i Yesus. Lantas i Pilatus nompalentahkon da mayat i Yesus obee'akon hi ia.

⁵⁹ Jadi i Yusuf nongalamo mayatnyo ka' sinaputnyo nu hude lenan anu bu'ou.

⁶⁰ Lantas aitu, ia nompo'una' mayat i Yesus i uno nu kubulan posi anunyo anu binaunyo i uno nu sa'angu' na bungkutnyo nu batu. Lapas aijo', ia nolingginakonmo batu daka' bau pongkulubi bau pontumban bolo' aijo', lantas ia namba.

⁶¹ I Maria Makdalena, ka' i Maria anu sangga'atan jinojoong ka' sinumuhang kiijo' nongahopi kubulan aijo'.

Anu monjagai kubulan

⁶² Dodododopnyo sina-sinaa, i sinaa nu Sabat, Kapala nu to Ima-imam ka' to mia-mian nu Farisi namba hingga-hinggat nangadap hi Pilatus

⁶³ ka' notatae, “Kita Tuan, kami tinonginau'mo tempo'nyo mian anu baleko' aijo' daagi' tumuu', Ia toho' notatae, ‘Sailapas tolunsinaa, Aku po'ule'mo tumuu'.’

⁶⁴ Kalana aitu, palentahkon na mian anu monjagai kubulan aijo' ima-ima' sampe sinaa ko itolunnyo, da anu saja' mombatuki Ia madi' timbali montomang mayat-Nyo lantas motatae hi to mia-mian tukoonyo po'ule'mo pinotumuu' lengkat i kasilakannyo. Ka' akan anu imihinyo aijo, lebe ma'idek ka' lebe molingkudui anu i moonanyo.”

⁶⁵ “Komiu daagi' ko suludadu ponjagai,” koonyo i Pilatus hi aha, “Lako'mo jagai na kubulan aijo' totu-totu'u.”

⁶⁶ Lantas aha namba i kubulan, nonsegen batu pontumbannyo ka' nompojoong anu monjagai i ahopnyo, da boli ko anu mohenggo kubulan aijo'.