MATIUS 26 - KITAB NU TUMPU ALLA LELE MA'IMAI'

Tanga'an ma'idek ka'oho'mo mompatei Yesus

¹ Salatan i Yesus noko ajanmo iwi-iwi' han aijo', Ia notataemo hi anu saja' mombatuki Ia,

² “Osumbu' miu daagi' uansinaa na Sinaa Daka' nu Paskah, ka' Anak nu Mian obee'mo da o salib!”

³ Tempo'nyo aitu Kapala nu to Ima-imam ka' to pola-polaya' nu Yahudi binala gombumo i laigan daka' nu Imam Daka' Kayafas.

⁴ Aha binasale'mo da mohakopmo i Yesus hoko-hokot, ka' mompatei Ia.

⁵ “Panyo,” koonyo nu aha, “boli na han aijo' o bau i tempo' nu lamean, kalana dumo timbali na kahengge'an nu layat.”

I Yesus dinudu'an nu minya-minya' manohong i Betania

⁶ Tempo'nyo i Yesus kiijo' i Betania, i laigan i Simon anu u'utu mae kinona nu panyakit kilit anu talalo ma'idek,

⁷ samian na boune tinoka hi Yesus. Ia nomboa sa'angu' na boton pualam ko isinyo minya-minya' manohong ka' mahan! Tempo'nyo i Yesus hau-haunyo suha-suhang mongkaan, boune aijo' nondudu'imo nu minya-minya' i buan nu ubak i Yesus.

⁸ Anu saja' mombatuki Yesus nontoa han aijo' ka' pinusa. “Apaa na gunanyo iwi-iwi' aiya, ola mompolugi'?” koonyo nu aha.

⁹ “Minya-minya' manohong aijo' timbali opobaluk, olinyo mahan, ka' doinyo o bee' hi mian anu kasiasi!”

¹⁰ Sinumbu' i Yesus na pikilan nu aha, lantas Ia notatae, “Kadaka' komiu momposusa' boune aiya? Ia mombau apa-apaa anu ma'ima' ka' ko angga'nyo hi beleng-Ku.

¹¹ Mian kasiasi saja' atina' hi komiu, panyo Aku madi' saja' hingga-hinggat hi komiu.

¹² Kalana mondudu'akon minya-minya' manohong aijo' i butong-Ku, ia momposadiakonmo Aku o kubun.

¹³ Palesayamo! I songko-songko na dunia aiya, iyayamae na Lele Ma'ima' lengkat mae hi Tumpu oleleakon, apaa na anu binaumo nu boune aiya saja' o sisik, madi' okolilimi na ia.”

I Yudas setuju mongkabisa'i Yesus

¹⁴ Lantas samian lengkat i sampulu' ka' ohua' na anu saja' mombatuki Yesus, sanggonyo i Yudas Iskariot, namba hi Kapala nu to Ima-imam.

¹⁵ Ia notatae hi aha, “Apaa na anu obee' miu hi belengku, de aku mombee' i Yesus hi komiu?” Saba' binilang nu aha tolumpulu' na doi salaka, lantas binee'mo na doi aijo' hi ia.

¹⁶ Imulaan tempo'nyo aijo', i Yudas noliomo tempo' anu ma'ima' da mongkabisa'imo Yesus.

I Yesus nongkaan kaanon nu Paskah tiba anu saja' mombatuki Ia

¹⁷ I sinaa momonanyo i uno nu Molame'akon Roti Madi' Mompake Raginyo, anu saja' mombatuki Yesus tinoka hi Ia. Aha nompokilawa, “Iyamae na anu oka'oho' nu Kita Tuuma kami momposadiakon kaanon nu Paskah hi Tuuma?”

¹⁸ I Yesus nontaami, “Lako'mo hi sala'samian anu kiijo' i kota, ka' taloakon hi ia, ‘Koonyo nu Tuumangku Gulu', tinokamo na tempo'nyo hi beleng-Ku; Aku mongka'oho'mo molame'akon Paskah i laiganum hingga-hinggat tiba anu saja' mombatuki Aku.’ ”

¹⁹ Anu saja' mombatuki Yesus nombaumo apaa na anu pinokaumo i Yesus hi aha. Aha namba momposadiakon kaanon nu Paskah aijo'.

²⁰ Salatan pinihimo, i Yesus ka' sampulu' ka' ohua' na anu saja' mombatuki Ia suha-suhang mongkaan.

²¹ Hau-haunyo aha mongkaan, i Yesus notatae, “Hongo: Samian lengkat atina' hi komiu na mongkabisa'i Aku.”

²² Nohongo aijo', anu saja' mombatuki Yesus talalomo nolibos hondo. Lantas aha, samian ka' samian nomulaimo nompokilawa hi Yesus, “Tantu misa' aku na kokoonto nu Kita Tuuma?”

²³ I Yesus nontaami, “Mian anu momposoop roti i uno nu mangko' hingga-hinggat Aku, iamo na anu mongkabisa'i Aku.

²⁴ Memang Anak nu Mian tionyo mate, sumo anu tinulis i uno nu Kitab nu Tumpu. Panyo silaka na mian anu mongkabisa'i Anak nu Mian! Lebe ma'ima' na mian aijo' de ia madi' pinohampe!”

²⁵ Lantas i Yudas anu mongkabisa'i aijo' notatae, “Tantu misa' aku na anu kokoonyo nu Tuumangku Gulu'?” I Yesus nontaami, “Sumo atina'mo na potataeum!”

Palajamuan nu Tumpu

²⁶ Tempo'nyo aha nongkaan, i Yesus nongala roti lantas binalado'a mompoita talima kaseh hi Tumpu. Lapas aijo' nompuge-puge roti nu limanyo, lantas binee'nyo hi anu saja' mombatuki Ia ka' notatae, “Ala ka' kaanmo; aiyamo na butong-Ku.”

²⁷ Lapas aitu Ia nongala sa'angu' na galas nu anggur, lantas nontaloakon talima kaseh hi Tumpu. Lapas aijo' Ia nombee' galas aijo' hi anu saja' mombatuki Ia ka' notatae, “Inumo komiu iwi-iwi'.

²⁸ Kalana aiyamo na baso'-Ku anu mompokododo apaa na anu jinanji'mo nu Tumpu – baso' anu binubusakon bau kapentingan nu mian da'isan da bau pongampuni dosa' nu aha.

²⁹ Palesayamo: Aku madi' mompo'ule' monginum anggur aijo' sampe toka i tempo'nyo Aku monginumje anggur anu bu'ou hingga-hinggat tiba komiu i Dunia Bu'ou nu Tuumang-Ku.”

³⁰ Lapas aitu, aha nonyanyiakon sa'angu' na nyanyian mompuji'. Ka' lapas aitu, aha nambamo i Bungkutnyo nu Zaitun.

Sisik saidi' mae i Petrus nombahakonmo i Yesus

³¹ Lantas i Yesus notatae hi anu saja' mombatuki Ia, “Pihi uuka komiu iwi-iwi' mopadeka'mompala'i Aku; kalana i uno nu Kitab nu Tumpu tinulis: Tumpu notatae, ‘Aku mompatei polaya' domba aijo', ka' sampahas na dombanyo mosungke-sungkehet.’

³² Panyo salatan Aku po'ule'mo tumuu', Aku na mambamo momona mokiijo' i Galilea, komiu imihije mae.”

³³ I Petrus notatae hi Yesus, “Pojohok na anu iwi-iwi' mompala'i Kita Tuuma, aku totu-totu'u madi'!”

³⁴ “O inau',” koonyo i Yesus hi ia, “pihi uuka mule' ma'isa pe'e manuk mintutuhu', beleyum pintolunmo na mombahakon aku.”

³⁵ I Petrus nontaami, “Mau mule' aku matemo tiba Kita Tuuma, aku madi' motatae tukoongku, aku madi' monsumbu' Kita Tuuma!” Ka' iwi-iwi' anu saja' mombatuki Ia, sangga'at notatae sumo aitu suele.

I Yesus binalado'a i Getsemani

³⁶ Lapas aitu, i Yesus nambamo tiba anu saja' mombatuki Ia, i sa'angu' na tampat sanggonyo Getsemani. I kiijo' mae Ia notatae hi aha, “Suhangmo i aiya hau-haunyo Aku mamba balado'a.”

³⁷ Lantas Ia nonsale'i Petrus ka' ua'aha na anak i Zebedeus mamba mohingga-hinggat tiba Ia. Ia nomulaimo nongoa'i nolibos ka' madi' sanang.

³⁸ Ia notatae hi anu saja' mombatuki Ia, “Kinyonyoang-Ku molibos hondo, Ku oa'i sumo sahanyo matemo. Jojoongmo na komiu i aiya, ka' bajaga-jagamo tiba Aku.”

³⁹ Lapas aitu, i Yesus namba gagana' majo'on, lantas Ia tinolodadupumo i tano' ka' binalado'a. “Kita Tuuma”, Ia notatae, “de timbali pojo'onakon mae hi beleng-Ku na kasansala'an-Ku anu tionyo Ku oa'i aijo'. Panyo boli mombatuki pongka'oho'-Ku, panyo batukimo na pongka'oho' nu Kita Tuuma.”

⁴⁰ Lapas aijo' i Yesus ninsusule' hi aha totolu' anu saja' mombatuki Ia, ka' nontokai aha hau-haunyo hoyot. Ia notatae hi Petrus, “Ola ahi' sajam na komiu totolu' madi'mo moko ala bajaga-jaga tiba Aku?

⁴¹ Bajaga-jaga, ka' balado'a da komiu boli nu kona nu soba'an. Roh miu mongka'oho' mombau anu totu'u, panyo komiu madi' moko ala, kalana sipat nu mian aijo' madi' moko ala.”

⁴² Po'ule' mule' i Yesus namba binalado'a, Ia notatae, “Kita Tuuma, de kasansala'an aiya tionyo Ku oa'i, ka' madi' opoko pojo'onakon, bakas pongka'oho'mo nu Kita Tuuma na jadi.”

⁴³ Lapas aijo' i Yesus ninsusule' mule', ka' nontokai anu saja' mombatuki Ia daagi' suele hoyot, kalana aha talalomo natatundu'.

⁴⁴ Po'ule' mule' i Yesus nompala'i aha kinopintolunnyo da balado'a ka' nontaeakon potatae anu pokakana.

⁴⁵ Lapas aijo' Ia ninsusule' mule' hi anu saja' mombatuki Ia ka' notatae, “Daagi' komiu hoyot ka' milawe? Toa, tinokamo na tempo'nyo Anak nu Mian obee'mo hi anu mongkuasai to mia-mian baladosa'.

⁴⁶ Pobulamo, imbo' kita mambamo. Toa! Mian anu mongkabisa'i Aku tinokamo mae!”

I Yesus i hakopmo

⁴⁷ Hau-haunyo i Yesus daagi' basisik, i Yudas sala'samian anu sampulu' ka' ohua' na anu saja' mombatuki Ia aijo' tinokamo. Nohingga-hinggat mae tiba ia, tinoka suele da'isan na mian anu nomboa mae bajak ka' amangkun. Aha sinai nu Kapala nu to Ima-imam ka' to pola-polaya' nu Yahudi.

⁴⁸ Anu mongkabisa'i nompoto'imo hi aha tanda aiya, “Mian anu ku ooki, aijo'mo na miannyo. Hakop na Ia!”

⁴⁹ Salatan tinoka i tampat aijo', i Yudas lau-laus namba hi Yesus ka' notatae, “Tabea', Kita Tuumangku Gulu'!” Lantas ia nongooki i Yesus.

⁵⁰ I Yesus nontaami, “Utus, apaa na nu bau utus, tinoka mae?” Lapas aijo', mian da'isan aijo' nokiijo' ka' nohakop i Yesus.

⁵¹ Sala'samian na anu saja' mombatuki Ia, anu i kiijo' tiba i Yesus, nombubut bajaknyo ka' nontabas posaihon nu imam daka', sahingga nosamping na bihingnyo.

⁵² I Yesus notatae hi anu saja' mombatuki Ia aijo', “Po'ule' posalung na bajakum i salungnyo, kalana iwi-iwi' mian anu mompahaikakon bajaknyo, mate nu bajak.

⁵³ Nu sumbu' Aku madi' moko ala momoita tulung hi Tuumang-Ku, ka' Ia malia' mae hondo na monsai mae molabi sampulu' ka' ohua' na pasukan nu Suludadu malaikat?

⁵⁴ Panyo desumo aijo', mosia na jadi sumo anu sinisikmo i uno nu Kitab nu Tumpu, tukoonyo memang tionyo jadi sumo anu tempo' uuka aiya?”

⁵⁵ Lantas i Yesus notatae hi mian da'isan aijo', “Te Aku mian ma'idek, sampe komiu toka momboa mae bajak, ka' amangkun mohakop Aku? Toka sansina-sinaa Aku mongajan i Laigan nu Tumpu, kadaka' komiu madi' mohakop Aku!

⁵⁶ Panyo memang sumo aitumo da timbali apaa na anu tinulismo nu to nabi-nabi i uno nu Kitab nu Tumpu.” Lapas aijo', iwi-iwi' na anu saja' mombatuki Ia nopadeka'mo nompala'i Yesus.

I Yesus i ahop nu Mian Kopian Daka' nu Agama

⁵⁷ To mia-mian anu nohakop i Yesus, nomboa Ia i laigan nu Imam Daka' i Kayafas. I kiijo' to gulu-gulu' agama ka' to pola-polaya' nu Yahudi binala gombumo.

⁵⁸ Najo'on na i Petrus nombatuki Yesus sampe tinoka i natan nu laigan nu Imam Daka'. Lantas i Petrus ninsoop i uno nu natan aijo' ka' sinumuhang hingga-hinggat tiba anu monjagai. Ia mongka'oho' monsumbu, mosia na ka'ahenannyo iwi-iwi' aijo' saidi' mae.

⁵⁹ Kapala nu to Ima-imam, ka' iwi-iwi' Mian Kopian Daka' nu Agama bala usaha da mohumpak katalangan anu madi' totu'u, da timbali monabu'akon hukuman mate hi Yesus.

⁶⁰ Panyo aha madi' nohumpak sa'angu' pe'e na bukuti, maumo da'isan na anu nombee'i katalangan baleko'. Ahennyo ua'aha na mian nombee'i katalangan.

⁶¹ Aha notatae, “Mian aiya notatae, ‘Aku moko ala mohobo'akon Laigan nu Tumpu, ka' i uno nu tolunsinaa po'ule'mo opotinjo.’ ”

⁶² Lantas Imam Daka' tinuminjo ka' notatae hi Yesus, “Apaa Beleyum madi' montaami poosala', anu tinaloakonmo hi Beleyum aijo'?”

⁶³ Panyo i Yesus ola nomohokot. Po'ule' mule' Imam Daka' notatae hi Ia, “Tiba sanggo nu Tumpu anu tumuu', taeakon mae hi kami, apaa Beleyum Tomundo anu Momposalamat, Anak nu Tumpu?”

⁶⁴ I Yesus nontaami, “Sumo itina' anu tinaloakonumo. Panyo palesayamo: Mulai uuka, aiya komiu montoaje Anak nu Mian sumuhangmo i sasu koanan nu Tumpu Anu Talalo ko Kuasa, ka' toka mae aita' i kundom, i langit!”

⁶⁵ Sahingga Imam Daka' aijo' nombea-beakmo baju'nyo, ka' notatae, “Ia mompisala'i Tumpu! Madi'mo palalu ko sakisi. Posi komiu iwi-iwi' nosi hongomo potatae anu mompisala'i Tumpu.

⁶⁶ Uuka mosia na pikilan miu?” Aha nontaami, “Ia sinala'mo ka' tionyo opateimo.”

⁶⁷ Lantas aha nontupe'i ohup i Yesus ka' nomboboti Ia. Daagi' mule' ko anu nohapa' Ia,

⁶⁸ ka' notatae, “Soba tili'i ka' poto'i hi kami, o Tomundo anu Momposalamat! Ihe na anu nohapa' Beleyum?”

I Petrus nombahakon i Yesus

⁶⁹ I Petrus hau-haunyo sinumuhang i sambiha'nyo nu kintan. Sala'samian na posaihon boune ka' notatae hi Petrus, “Te misa' beleyum suele sangalu i Yesus mian nu Galilea aijo'?”

⁷⁰ Panyo i Petrus nombahakon i ahop nu aha iwi-iwi', “Aku madi' monsumbu' apaa na anu nu kahanda'i,” tinaaman i Petrus,

⁷¹ lantas ia namba nokiijo' i pontumban nu kintan. Samian na posaihon boune sangga'at nontoa i Petrus ka' notatae hi to mia-mian i kiijo', “Mian aiya u'uka suele nosangalu tiba i Yesus aijo' lengkat mae i Nazaret.”

⁷² Lantas i Petrus po'ule' nombahakon, ka' binasumpa'. “Totu-totu'u aku madi' monsumbu' mian aijo'!” koonyo i Petrus.

⁷³ Madi' pinin lapas aijo', to mia-mian anu tinuminjo i kiijo' tinokamo hi Petrus, ka' notatae, “Totu-totu'umo beleyum sala'samian anu aijo' hi aha. Aijo' osumbu' hondo kalana pokakana na potatae.”

⁷⁴ Lantas i Petrus nomulaimo binasumpa-sumpa' ka' notatae, “Aku madi' monsumbu' mian aijo'!” Tempo'nyo aitu mule' manuk nintutuhu'mo.

⁷⁵ Ka' i Petrus tinonginau'mo apaa na koonyo i Yesus hi ia, “Ma'isa pe'e manuk mintutuhu', beleyum pinintolumo nombahakon Aku.” Lantas i Petrus nosabat, ka' i humaang kalana talalomo nolibos.