MATIUS 17 - KITAB NU TUMPU ALLA LELE MA'IMAI'

I Yesus pinopodaka'mo

¹ Ilapas anon sinaa, i Yesus nomboamo i Petrus ka' i Yakobus tiba utusnyo i Yohanes, ola posi aha na nokiijo' i sa'angu' na bungkutnyo anu matangkas.

² I ahop nu aha, i Yesus nongabali'mo, misa'mo sumo butongnyo biasa: Ohup-Nyo tinimbalimo najingka sumo sinaa, ka' pakean-Nyo mopute' jongkilaban.

³ Lapas mule' aha totolu' anu saja' mombatuki Ia aijo' montoamo i Musa ka' i Elia notatae tiba i Yesus.

⁴ Lantas i Petrus notatae hi Yesus, “Kita Tumpu, ma'ima' hondo na kita jojoong i aiya. De Tumpu mongka'ima'i da ku potinjo totolu' na tampat jojoongan i aiya: Sa'angu' anu nu Kita Tumpu, sa'angu' anu i Musa, ka' sa'angu' mule' anu i Elia.”

⁵ Hau-haunyo i Petrus daagi' motatae, sehu' anu majingka hondo nohohungimo aha, ka' lengkat i sehu' aijo' tolohongo na potatae anu nontaloakon, “Aiyamo na Anak-Ku anu Kuku kalibosi. Ia momposanang kinyonyoang-Ku. Hongo na Ia!”

⁶ Salatan anu saja' mombatuki Yesus nohongomo potatae aijo', aha nabuhukmo, sahingga tinolodadupumo i tano'.

⁷ Panyo i Yesus tinoka ka' nohenggo aha. “Pobulamo”, koo-Nyo, “boli mabuhuk!”

⁸ Salatan tinoa nu aha, aha madi'mo nontoa mau pe'e ihe, boli mompiakon i Yesus.

⁹ Salatan aha nintatau'mo lengkat mae i bungkutnyo aijo', i Yesus nompo'ingat aha, “Boli mompoto'i mau mule' pa' hi hehemo apaa na anu tinoa miu, de ma'isa pe'e Anak nu Mian po'ule' opotumuu' lengkat i kasilakan.”

¹⁰ Anu saja' mombatuki Yesus nompokilawa hi Ia, “Kadaka' to gulu-gulu' agama motatae, tukoonyo i Elia pe'e na tionyo toka momonanyo?”

¹¹ I Yesus nontaami, “Memang i Elia toka, ka' ia na mompotimbali iwi-iwi' aijo'.

¹² Panyo Aku motatae hi komiu, i Elia tinokamo, panyo to mia-mian madi' monsumbu' ia; aha nombau ia, iyamo pongka'oho' nu aha. Ka' sumo aitumo na aha suele mombau Anak nu Mian.”

¹³ Lantas anu saja' mombatuki Ia nonsumbu'mo taalu' i Yesus notatae mongkona i Yohanes anu Mompalamandikan.

I Yesus nompa'alin anak anu pininsoopan nu roh ma'idek

¹⁴ Tempo'nyo i Yesus ka' totolu' na anu saja' mombatuki Ia minsusule'mo hi mian da'isan aitu, samian na mo'ane tinoka tinolodadupu i ahop i Yesus,

¹⁵ ka' notatae, “Kita Tuuma, kalibosiakon na anakku. Ia masakit nu kona nu kumikin. Pongkonanyo nu kumikin aijo' talalo ma'idek, sahingga ia totominsan tohampu i apu, ka' totominsan mule' nu kona i uee.

¹⁶ Binoangkumo na ia hi anu saja' mombatuki Kita Tuuma, panyo aha madi' moko ala mompa'alinakon ia.”

¹⁷ I Yesus nontaami, “Palias na komiu aiya! Komiu totu-totu'u to mia-mian anu palangues ka' madi' palesaya. Piangkuka na kopinnyo na Aku tionyo jojoong tiba komiu ka' monsabaanakon komiu? Boamae na anak aijo'!”

¹⁸ Lantas i Yesus nompalentah roh ma'idek anu i uno nu anak aijo' posabat. Lantas roh ma'idek aijo' nosabatmo, ka' anak aijo' na'alinmo tempo'nyo aitu.

¹⁹ Lapas aitu anu saja' mombatuki Yesus tinokamo hi Ia, madi' kogalo'nyo sangga'at, ka' nompokilawa hi Ia, “Kita Tuuma, apaa na sababnyo kami madi' moko ala molaa' roh ma'idek aijo'?”

²⁰ I Yesus nontaami, “Kalana komiu madi' talalo palesaya. O inau'! De komiu palesaya totu-totu'u kodaka'nyo sumo batu nu sasawi, komiu timbali motatae hi bungkutnyo aiya, ‘Polalin mokiijo' mae!’ tantu bungkutnyo aiya timbali molalin. Madi' ko sa'angu' pe'e na anu madi' opoko ala obau miu! [

²¹ Panyo roh ma'idek anu sangahan aiya, ola ahi' timbali olaa' nu balado'a ka' bapuasa'.]”

I Yesus notatae mule' mongkona kasilakan-Nyo

²² Tempo'nyo anu saja' mombatuki Yesus sinihukmo i Galilea, i Yesus notatae hi aha, “Madi'mo pin, Anak nu Mian o bee'mo hi kuasa nu mian.

²³ Ia o patei, panyo sinaa ko totolu'nyo Ia po'ule'mo opotumuu'.” Jadi anu lewa' mombatuki Ia nolibosmo hondo.

Pombayan hasin Laigan nu Tumpu

²⁴ Tempo'nyo i Yesus ka' anu saja' mombatuki Ia tinoka i Kapernaum, anu saja' montage hasin Laigan nu Tumpu tinokamo hi Petrus ka' nompokilawa, “Gulu'um mombayan hasin Laigan nu Tumpu kabai madi'?”

²⁵ I Petrus nontaami, “Bayan!” Salatan i Petrus ninsusule', i Yesus nompokilawamo hi ia momonanyo, “Simon, mosia na pikilanum? Ihe na anu tionyo mombayan bea kabai hasin hi to tomu-tomundo i dunia aiya? Layat kabai mian nu salipu'an?”

²⁶ “Mian nu salipu'an”, tinaaman i Petrus. “Desumo aitu,” koo-Nyo i Yesus, “layat madi' palalu mombayan.

²⁷ Panyo boli kita monsinggung kinyonyoa nu to mia-mian aijo'. Jadi, lako'mo pokiijo'mo i dowiwi da momeka. Ala na ikan momona i humpakum. I uno nu nganga'nyo aijo' beleyum mohumpakje doi anu sukup bau pombayan hasin nu kita ohua'. Ala na doi aijo' ka' bayan hi aha na hasin nu Laigan nu Tumpu.”