MARKUS 6 - KITAB NU TUMPU ALLA LELE MA'IMAI'

I Yesus madi' tinalima i Nazaret

¹ Lengkat i tampat aijo', i Yesus ninsusule' nohingga-hinggat tiba anu saja' mombatuki Ia, mokiijo' i posi kampungnyo.

² Tempo'nyo sinaa nu Sabat ia nontampu'unimo nongajan i laigan pogalejaan. Da'isan na mian i kiijo'. Tempo'nyo to mia-mian aijo' nohongo pangajalan i Yesus, aha binangang hondo. Aha notatae, “Lengkat iya na mian aiya nohumpak iwi-iwi' sumo aijo'? Kapandean anu sumo aijo' apaa aiya lengkat hi Ia? Mosia na Ia timbali mombau anu okabangangi?

³ Te misa' Ia aiya tukang anu saja' mombau pakakas nu laigan, Anak i Maria, ka' utus i Yakobus, i Yoses, i Yudas ka' i Simon? Memang to utu-utus-Nyo boune pe'e jojoong i aiya suele.” Kalana aijo' aha madi' nontalima Ia.

⁴ Lantas i Yesus notatae hi aha, “Samian na nabi o adati iyayamae, sambiha'nyo i posi kampungnyo, ka' hi aha to utu-utusnyo ka' sampoto utusannyo mae”.

⁵ I tampat aijo' i Yesus madi' noko bau sa'angu' pe'e na anu okabangangi, sambiha'nyo nompa'alin to pia-piangkuka na mian anu masakit, Ia mompotudu lima-Nyo i buan nu ubak nu aha.

⁶ Ia binangang kalana aha madi' palesaya. Lapas aijo' i Yesus namba i kampu-kampung ise' anu mompaha ohani aijo', ka' mongajan.

I Yesus nompokau sampulu' ka' ohua' na anu saja' mombatuki Ia

⁷ Ia nolaga sampulu' ka' ohua' na anu saja' mombatuki Ia, lantas nonsai toto ua'aha ka' nombee'i kuasa hi aha da molaa' to roh-roh ma'idek.

⁸ Ia nombee'i sonto' ka'ima'an hi aha, “Boli momboa apa-apaa i lumambanan, sambiha'nyo pitokon. Boli momboa kaanon kabai botutu nu sadaka', kabai mule' doi.

⁹ Pake na sapatu, panyo boli momboa ohua' na baju'.”

¹⁰ Ia suele notatae, “De komiu minsoop i sa'angu' na laigan, jojoongmo i kiijo' sampe komiu mompala'i kota aijo'.

¹¹ Panyo de komiu toka i sa'angu' na tampat, ka' to mia-mian i kiijo' madi' mongka'oho' montalima ka' mohongo komiu, pala'imo na tampat aijo'. Ka' osapui na abu' i tengkeum salaku sa'angu' na tanda hi aha!”

¹² Sahingga aha sampulu' ka' ohua' na anu saja' mombatuki Yesus aijo' nambamo. Aha nambamo nombebakon lele da mian tionyo balatobat i to dosa-dosa'nyo.

¹³ Anu saja' mombatuki Yesus aijo' nolaa' da'isan na roh ma'idek, nonsapuakon lanya' nu zaitun hi mian masakit, ka' nompa'alinakon aha.

Kasilakan i Yohanes anu Mompalamandikan

¹⁴ To lele-lele anu mongkona iwi-iwi' na kajadian aijo' tinoka hi Tomundo Herodes, kalana sanggo i Yesus sinumbu'mo iyayamae. Daagi' ko mian anu notatae, “I Yohanes anu Mompalamandikan po'ule'mo tinumuu'! Aijo'mo na sababnyo Ia ko kuasa mombau anu okabangangi aijo'.”

¹⁵ Panyo to mia-mian sangga'at notatae, “Ia i Elia.” Daagi' mule' ko anu notatae, “Ia nabi, sumo sala'samian na nabi u'utu mae.”

¹⁶ Salatan i Herodes nohongo aijo', ia notatae, “Totu'u aiya i Yohanes anu Mompalamandikan anu u'utu mae sinaingkumo da okolongakon na ubaknyo. Uuka aiya ia po'ule'mo tinumuu'!”

¹⁷ Kalana ma'isa pe'e jinadi na aijo' i Herodes nonsaimo mian mohakop i Yohanes, ka' nomposoop i uno nu talungku'. I Herodes nombau aijo' kalana han i Herodias, bengkele' nu utusnyo aijo'mo i Filipus. Kalana i Herodes nongosoaimo i Herodias,

¹⁸ ka' mongkona han aijo' i Yohanes saja'mo montewa' i Herodes sumo uuka, “Madi' timbali beleyum mo'osoa tiba bengkele' nu utusum aijo'!”

¹⁹ Aijo'mo na sababnyo i Herodias monguna', i kinyonyoa ka'idekan hi Yohanes ka' kahanda' mompatei i Yohanes, panyo ia madi' moko bau han aijo', kalana nu polewo-lewot i Herodes.

²⁰ Kalana i Herodes nonsaimo mian monjagai ima-ima' kasalamatan i Yohanes i talungku', kalana ia mabuhuk hi Yohanes. Ia monsumbu' i Yohanes samian na anu ma'ima' anu sinai mae nu Tumpu. Ka' memang totu'u de i Yohanes motatae, i Herodes mongka'ima'i mompotombihing mau mule' kinyonyoanyo madi' sanang hondo kalana hi ia.

²¹ Ahennyo i Herodias nohumpak tempo' inompolabot sinaa nu kinahampean i Herodes. Tempo'nyo aijo' i Herodes nombau lamean ka' nolaga iwi-iwi' na anu ko pangkat matangkas i kalaja'an, to sulu-suludadu ka' mule' to tu'a-tu'anyo nu mian Galilea.

²² I lamean aijo' anak langkoyang i Herodias nonsalelei, ka' posalelenyo aijo' talalo hondo momposanang kinyonyoa i Herodes tiba to mia-mian anu i laga. Sahingga i Herodes notatae hi langkoyang aijo', “Beleyum mongka'ima'i apaa, poitamo mae. Kubee'je hi beleyum!”

²³ Lantas i Herodes binajanji' hi langkoyang aijo' ka' binasumpa'. I Herodes notatae, “Apaa na anu nupoita tionyo kubee', mau pe'e sambahagian na kalaja'anku!”

²⁴ Sahingga langkoyang aijo' nosabat ka' nompokilawa hi tinanyo, “Kita tina, apaa na anu ma'ima', anu tionyo ku poita?” Tinanyo nontaami, “Poitamo na ubak i Yohanes anu Mompalamandikan.”

²⁵ Langkoyang aijo' nalia-lia' ninsusule' hi Herodes ka' notatae, “Ku poita ubak i Yohanes anu Mompalamandikan obee' akon mae uuka aiya hi belengku, o sake', i sa'angu' na dulang!”

²⁶ Nohongo poitaon aijo', i Herodes nolibos hondo. Panyo ia madi' daagi' mombahakon poitaon aijo' kalana ia binasumpa'mo i ahop nu to mia-mian anu i laga.

²⁷ Jadi ia lau-laus nompalentah samian na posaihonnyo mongala ubak i Yohanes anu Mompalamandikan. Lantas suludadu aijo' namba i talungku' ka' ia nompolo ubak i Yohanes.

²⁸ Lapas aijo' nomboa ubak aijo' sinake' i dulang ka' pinotalimanyo hi langkoyang aijo'. Ka' langkoyang aijo' nombee' mule' hi tinanyo.

²⁹ Salatan anu saja' mombatuki Yohanes nohongo han aijo', aha namba nongala bangke' i Yohanes, lantas i lamun nu aha.

I Yesus nombee'i mongkaan olima' na madala na mian

³⁰ To rasul-rasul anu sinai i Yesus lapas aijo' ninsusule' mule', ka' binala gombu tiba i Yesus. Aha nompoto'i hi Ia, iwi-iwi' anu binaumo ka' ingajanakonmo nu aha.

³¹ Da'isan hondo na mian anu tinoka ka' inamba, sahingga i Yesus tiba anu saja' mombatuki Ia, madi' kino tempo' nongkaan. Sabab aijo' i Yesus notatae hi anu saja' mombatuki Ia, “Imbo'mo da kita mamba i tampat anu liing, da timbali manintade na kita, ka' komiu timbali milawe pe'e.”

³² Sahingga aha namba sinumake' i duangan mompatui mokiijo' i tampat anu liing.

³³ Panyo da'isan na mian nontoamo aha nompala'i tampat aijo', ka' monsumbu' ihe na aha. Jadi, iwi-iwi' na kota i tano' aijo', to mia-mian nopadeka' mongkua jalan katano'an da aha pe'e na moona toka, i Yesus tiba anu saja' mombatuki Ia na imihije.

³⁴ Salatan i Yesus ilumobos lengkat i duangan, Ia nontoa mian da'isan. Ia molibos hi aha, kalana aha sumomo domba anu madi' ko polaya'nyo. Sahingga Ia mule' nontampu'unimo nongajanakon manjoo' na han hi aha.

³⁵ Salatan mamalom anu saja' mombatuki Yesus notatae hi Ia, “Ohanimo pihi ka' tampat aiya mosi tade lengkat i kampung.

³⁶ Sahanyo Kita Tuuma monsai to mia-mian aiya mamba, da aha timbali mongoli kaanon i kampung toto ise-ise' ka' i kampu-kampung anu mompaha ohani.”

³⁷ Panyo i Yesus nontaami, “Komiumo na mombee'i mongkaan aha.” “Yoh, te kami tionyo mamba mongoli roti anu olinyo ua'atu na doi salaka bau pombee'i mongkaan to mia-mian aiya?” Sumo aijo' na koonyo nu anu saja' mombatuki Yesus aijo'.

³⁸ Lantas pinokilawa i Yesus, “Daagi' sangkuka na roti itina' hi komiu? Soba lako' toa.” Ilapas na aha namba nontoa, aha notatae, “Daagi' olima' na roti ka' ohua' na ikan.”

³⁹ Lantas i Yesus nonsai iwi-iwi' na mian aijo' sumuhang toto sanggombu i bombong anu molumba'.

⁴⁰ Mian haha aijo' sinumuhang tina'atunmo toto sanggombu. Daagi' ko anu sa'atu na mian sanggombu, ka' ko anu limampulu' na mian sanggombu.

⁴¹ Lapas aijo' i Yesus nongala olima' na roti ka' ohua' na ikan aijo' ka' tinihanga'nyo na langit ka' nontaeakon talima kaseh hi Tumpu. Ilapas aijo' biniha-biha'-Nyo na roti aijo' nu lima-Nyo ka' nombee' hi anu saja' mombatuki Ia, da obagi-bagiakon hi mian da'isan aijo'. Ka' ohua' na ikan aijo' binagi-baginyo mule' hi aha iwi-iwi'.

⁴² Aha nongkaan sampe nobosu.

⁴³ Lapas aijo' labi nu anu kinaan aijo' ilimu' nu anu saja' mombatuki Yesus – iwi-iwi' daagi' sampulu' ka' ohua' na kalanjang inobuke'.

⁴⁴ Mian to momo'ane anu nongkaan roti aijo' kila-kila ohani olima' na madala.

Yesus ilumajang i bawo nu uee

⁴⁵ Lapas aijo' i Yesus lia-lia' nonsai anu saja' mombatuki Ia namba imoona tiba duangan mokiijo' i Betsaida i santoa nu dowiwi, hau-haunyo aijo' Ia nonsaimo mian da'isan aijo' da ninsusule'mo.

⁴⁶ Noko sai mian da'isan aijo', i Yesus nambamo i bungkutnyo da balado'a.

⁴⁷ Salatan pinihimo, duangan nu anu saja' mombatuki Yesus aijo'mo mae i totonga' nu dowiwi, panyo i Yesus daagi' kiijo' mae i katano'an.

⁴⁸ Ia nontoa aha susa' hondo na mombose duangan aijo' kalana baleba' lengkat i ahop nu duangan. Kalana aijo' kila-kila i olot nu jam totolu' ka' jam anom subu-subu, Ia tinoka hi aha ilumajang i bawo nu uee. Ka' Ia ilumajang lau-laus susumo anu moliu-liumo aha.

⁴⁹ Tempo'nyo aha nontoa, Ia lumajang i bawo nu uee, koonyo nu aha Ia kadudu,

⁵⁰ sahingga aha i lakat nu kabuhukan. Kalana aha iwi-iwi' nontoa Ia, ka' aha tinolokengkeng hondo. Panyo i Yesus lau-laus notatae hi aha, “Tendamo! Aku i Yesus. Boli mabuhuk!”

⁵¹ Lantas Ia sinumake' i duangan nu aha ka' baleba' mule' binelentimo. Anu saja' mombatuki Yesus binangang hondo.

⁵² Anu okabangangi tiba olima' na batuan nu roti aijo' ma'isa mule' pinangalati'an nu aha. Susa' na aha mangalati'.

I Yesus nompa'alinakon to mia-mian masakit i Genesaret

⁵³ Tempo'nyo tinoka i santoa nu dowiwi, aha inadaduak i biwi nu Genesaret.

⁵⁴ Salatan aha nosabat lengkat i duangan, to mia-mian nontoa taalu' anu tinoka aijo' i Yesus.

⁵⁵ Lantas aha nopadeka' noyaya i songko-songko na tano' aijo', ka' nontampu'uni nomboa to mia-mian anu masakit pinomale' i ampas binoa i ahop i Yesus. De aha mohongo tukoonyo i Yesus kiijo'mo i sa'angu' na tampat, aha momboa to mia-mian anu masakit mokiijo'.

⁵⁶ Iyayamae na i Yesus toka – mau i kampung, i kota kabai i kampung ise' – i kiijo' mian saja' toka ka' mompo'una' to mia-mian masakit i natan anu bolaa. Lantas pagala nupoita nu aha da to mia-mian masakit aijo' opobee' montiik juba' i Yesus, mau ola puusnyo. Iwi-iwi' na anu montoongi timbali ma'alin.