MARKUS 4 - KITAB NU TUMPU ALLA LELE MA'IMAI'

Kantuang mongkona samian anu monsa'u bine'

¹ I Yesus nongajan mule' i biwi nu Dowiwi Galilea. Da'isan hondo na mian montikubi Ia. Kalana aijo' Ia namba sinumuhang i uno nu sa'angu' na duangan lanto-lanto i uee, ka' mian da'isan aijo' tinuminjo i biwi nu dowiwi.

² Lantas i Yesus nongajan manjoo' na han hi aha mompake kantuang. Sumo aiya na Ia nongajan aha.

³ “Hongo mae! Daagi' ko samian na anu nombau ale' namba nonsau bine'.

⁴ Tempo'nyo ia hau-haunyo monsa'u, daagi' ko bine' anu nanabu' i jalan. Lantas tomonsi' tinoka ka' tinoluknyo na bine' aijo' i ningkot.

⁵ Daagi' mule' ko anu nanabu' i tampat anu batuon, tano'nyo ola sangkiding. Bine' haha aijo' malia' tumuu' kalana sangkiding na tano'nyo,

⁶ panyo tempo'nyo sinaa matangkasmo, bine' aijo' anu sumpenyo montampu'unimo magayou lapas aijo' i nanggas ka' mate, kalana bakatnyo madi' talalo maleeng.

⁷ Daagi' mule' ko bine' anu nanabu' i totonga' nu hemput anu kohii'nyo. Hemput anu kohii'nyo tumuu' ka' mongipidi sumpenyo anu sala'je tumuu' aijo' sahingga madi' mimbua'.

⁸ Panyo daagi' mule' ko bine' anu manabu' i tano' anu ma'omuk. Bine' aijo' tumuu', lantas timbali daka' lantas mimbua', daagi' ko anu tolum pulu', daagi' ko anu anom pulu', ka' daagi' mule' ko anu pinsa'atu lipat.”

⁹ Lapas nonsisikakon kantuang aijo', i Yesus notatae, “Komiu daagi' ko bihing, hongomo!”

Kadaka' i Yesus mompake kantuang

¹⁰ Tempo'nyo posi sausa' i Yesus, to mia-mian anu nohongomo pangajalan-Nyo tinoka hi Ia nohingga-hinggat tiba sampulu' ka' ohua' na anu saja' mombatuki Ia. Aha mompoita hi Ia da Ia montutuhakon alati'nyo nu kantuang aijo'.

¹¹ Sahingga i Yesus notatae hi aha, “Komiu binee'anmo balakat da monsumbu' lahasia mongkona mosia na Tumpu mompalentah. Panyo to mia-mian anu i sambiha'nyo ingajan nu kantuang,

¹² da ‘Aha tionyo mompalahatikan panyo madi' osumbu' pa' apaa na anu jinadi, aha daagi' tionyo saja' mohongo, panyo madi' mangalati', aiya tinimbali da aha boli montoa ka' mangalati' ka' boli toka hi Tumpu ka' Tumpu mongampuni aha.’ ”

I Yesus nontalangkan kantuang mongkona samian anu topo monsa'u bine'

¹³ Lapas aijo' i Yesus notatae hi aha, “De komiu madi' mangalati' i kantuang aijo', mosia na komiu timbali mangalati' i kantuang anu sangga'at?

¹⁴ Mian anu monsa'u bine' aijo'mo mian anu mompolele, lele lengkat mae hi Tumpu.

¹⁵ Bine' anu nanabu' i jalan, sumomo to mia-mian anu mohongo lele mongkona mosia na Tumpu mompalentah. Sala'je ihongo Ibilis tinoka ka' mongala apaa na anu sinau i uno nu kinyonyoa nu aha.

¹⁶ Bine' anu nanabu' i tampat anu batuon, sumomo to mia-mian anu mohongo lele aijo' ka' lau-laus tinalimanyo ka' sanang na kinyonyoa.

¹⁷ Panyo lele aijo' madi' jojoong i uno nu kinyonyoa nu aha, sahingga madi' pin. Salatan aha mongoa'i sansala i kasusa'an kabai okabisa'i kalana lele aijo', lau-laus aha madi'mo palesaya.

¹⁸ Bine' anu nanabu' i totonga' nu hemput anu kohii'nyo, aijo' sumomo to mia-mian anu mohongo lele aijo',

¹⁹ panyo kantumuu'an nu aha daagi' bata-bata ka' mongka'ima'i tumuu' sanang. Lupa-lupa na napisu minsoop i uno nu kinyonyoa nu aha. Kalana aijo' lele anu lengkat mae hi Tumpu ingipidanmo nu kinyonyoa nu aha da madi' mimbua'.

²⁰ Ka' bine' anu nanabu' i tano' anu ma'omuk aijo', sumomo to mia-mian anu mohongo lele aijo' ka' tinalimanyo, aha mimbua' manjoo', daagi' ko anu tolum pulu', daagi' ko anu anom pulu', ka' daagi' ko anu pinsa'atu lipat na hasinnyo.”

Sulu' anu okulubi nu gumbang

²¹ Pinotusnyo mule' na i Yesus notatae, “Toho' tinoa na mian mompomoak sulu' ka' okulubi nu gumbang, kabai opo'una' i aluk nu kamale'an? Te misa' ia mompo'una' sulu' aijo' i tengke nu sulu'?

²² Madi' ko anu matisuluk na madi' kantoan; ka' madi' ko anu opohowini na anu madi' ohongo ka' osumbu'.

²³ Sabab aijo', de ko bihing, hongomo!”

²⁴ Lantas i Yesus notatae mule', “Palahatikan apaa na anu ohongo miu aiya! Ukulan anu opake miu hi mian sangga'at, suele opake nu Tumpu hi komiu – ka' daagi' mule' lebe manjoo'.

²⁵ Kalana mian anu daagi'mo, obee'ije lebe manjoo' mule'; panyo mian anu madi' ko anu daagi', sangkiding anu daagi' hi ia suele o ala.”

Kantuang mongkona bine' anu tumuu'

²⁶ I Yesus nontusakon potatae-Nyo mule', “De Tumpu mompalentah sumo Tomundo, ka'ada'annyo timbali okantuangakon sumo samian anu monsa'u bine' i ale'nyo.

²⁷ Pihi ia hoyot; sinaa ia mobula. Ka' hau-haunyo aijo', bine' haha aijo' satumu-tumuu'nyo ka' tinimbali daka'. Panyo mosia na balu-balu'nyo bine' haha aijo' tumuu' ka' timbali daka', mian aijo' madi' monsumbu'.

²⁸ Aijo'mo na tano' anu mohasinakon: momonanyo pangkoengnyo, lapas aijo' buhaknyo, lantas bua'nyo.

²⁹ Ka' de gandum aijo' mahamo, mian aijo' mule' montampu'uni mompadak, kalana tempo'nyomo na mompadak.”

Kantuang bine' nu sasawi

³⁰ “De Tumpu mompalentah, tiba apaa na kita timbali mompokakanakon?” pinokilawa i Yesus mule'. “Sonto' apaa na timbali opakento montutuhakon?

³¹ De Tumpu mompalentah, balu-balu'nyo sumo kantuang aiya: Sambatu na bine' nu sasawi ingala nu samian, lantas tinugannyo i tano'. Batu nu sasawi aijo' bine' anu talalo ise' i dunia.

³² Panyo de tumuu'mo, ia timbali anu talalo daka' i totonga' nu sosu'anon. To panga-panga'nyo molumba' sahingga to tomo-tomonsi' timbali toka, ka' mombau petaa i aluknyo anu nutindungi.”

³³ Sumo aijo' na i Yesus mongajan mian mombau manjoo' na kantuang anu sumo aijo', anu timbali nupangalati'i nu aha.

³⁴ I Yesus saja' mompake kantuang de Ia mongajan mian haha aijo'. Panyo de ola posi Ia tiba anu saja' mombatuki Ia, nupotalang iwi-iwi' hi aha.

I Yesus nompobelenti baleba' makansang

³⁵ Mamalom sinaa aitu mule', i Yesus notatae hi aha anu saja' mombatuki Ia, “Imbo'mo da kita talabut mokiijo' i santoa nu dowiwi.”

³⁶ Lantas i Yesus sinumake' i duangan, ka' anu saja' mombatuki Ia, nompala'i mian da'isan i biwi nu dowiwi, ka' sinumake' suele i duangan aijo'. To dua-duangan sangga'at daagi' suele i kiijo'. Lapas aijo' i Yesus ka' anu saja' mombatuki Ia nontampu'unimo tinalabut.

³⁷ Madi' pinin tinokamo na baleba' makansang. Bokon nontampu'unimo nontintip duangan ka' ninsoop i unonyo sahingga duangan aijo' boboli' nobuke'mo nu uee.

³⁸ Imboyok nu duangan aijo', i Yesus hau-haunyo hoyot nintangonan. Anu saja' mombatuki noliko Ia. Aha notatae, “Tuumangku Gulu', apaa Tuumangku Gulu', madi' mompajuli, kita silaka?”

³⁹ I Yesus nobula, lantas nonsegai baleba' aijo', ka' notatae hi dowiwi, “Hokot, tumendamo!” Baleba' aijo' binelenti, ka' dowiwi tinimbalimo nolino.

⁴⁰ Lantas i Yesus notatae hi anu saja' mombatuki Ia, “Kadaka' komiu mabuhuk? Kadaka' komiu madi' palesaya hi beleng-Ku?”

⁴¹ Sahingga aha tinimbali nabuhuk ka' notatae samian ka' samian, “Ihe na mian aiya, sampe baleba' ka' bokon mohongo Ia.”