MARKUS 3 - KITAB NU TUMPU ALLA LELE MA'IMAI'

Mian anu limanyo lupe na sambiha'

¹ I Yesus ninsusule' mule' i laigan pogalejaan. I kiijo' daagi' ko samian anu lupe na limanyo sambiha'.

² I kiijo' daagi' ko to mia-mian anu mongka'oho' molio kasala'an i Yesus, da Ia timbali o kalaak. Jadi aha saja' mompotomatakon Ia, pa' Ia mompa'alin mian i sinaa nu Sabat.

³ I Yesus notatae hi mian anu lupe na limanyo sambiha' aijo', “Imbo' tuminjo i aiya, i ahop.”

⁴ Lantas Ia nompokilawa hi aha, to mia-mian anu daagi' i kiijo', “Koonyo nu agamanto timbali mombau apaa i sinaa nu Sabat? Mombau anu ma'ima' kabai mombau anu ma'idek? Momposalamat mian kabai mompatei?” Aha ola ahi' nomohokot.

⁵ Pinusa na i Yesus nontoa anu montikubi, panyo Ia ahi' molibos, kalana aha talalo panggaga. Lantas Ia notatae hi mian aijo', “Kawakon mae na limaum.” Mian aijo' nongkawakon limanyo, lantas limanyo tinimbali na'alin.

⁶ Sahingga to mia-mian nu Farisi nompala'i laigan pogalejaan aijo', lantas aha binasale' lia-lia' tiba to pia-piangkuka na mian anu monsangaja'i Herodes, da opatei na i Yesus.

Mian da'isan i biwi nu dowiwi

⁷ I Yesus ka' anu saja' mombatuki Ia, po'ule' nobalik nokiijo' i Dowiwi Galilea. Saba' da'isan hondo na mian nolengkat mae i Galilea anu namba mombatuki Yesus. Da'isan suele na anu tinoka lengkat mae i Yudea,

⁸ lengkat mae i Yerusalem, ka' lengkat mae i tano' Idumea, ka' mule' lengkat mae i tano' sasu kabete'an Yordan, ka' anu lengkat mae anu mompaha ohani to kota-kota Tirus ka' Sidon. Aha iwi-iwi' tinoka hi Yesus, kalana aha nohongomo hahan anu binaunyomo.

⁹ To mia-mian haha aijo' talalo da'isan, sahingga i Yesus nonsai anu saja' mombatuki Ia, momposadiai duangan Ia, kalana boli-boli to mia-mian haha aijo' mogogensotanmo na toka mae hi Ia.

¹⁰ Ia mompa'alin da'isan na mian, sahingga iwi-iwi' na mian masakit nogogensotan ka' mompagala mongohani da timbali mongkanyang Ia.

¹¹ Ka' to mia-mian anu sinoku'on nu roh ma'idek, salatan nontoa ia, lau-lausmo tinolodadupu i ahopnyo ka' noloboo', “Beleyumo na Anak nu Tumpu!”

¹² Panyo i Yesus nontewa' hondo-hondo to roh-roh ma'idek aijo' mompoto'i ihe na Ia.

I Yesus nompile'i sampulu' ka' ohua' na anu saja' mombatuki

¹³ Lapas aitu i Yesus nindako i sa'angu' na bungkutnyo, ka' nolaga to mia-mian anu Nu kahanda'i. To mia-mian aijo' tinoka,

¹⁴ lantas Ia nompile'i anu tinoka aijo' sampulu' ka' ohua' na mian. Koo-Nyo, “Aku mompile'i komiu, da komiu mon sangalui Aku, da kusai na komiu mompolele Lele Ma'ima' lengkat mae hi Tumpu Allah,

¹⁵ ka' komiu mohumpakje kuasa da molaa'i to roh-roh anu ma'idek.”

¹⁶ Aiyamo na sanggo nu sampulu' ka' ohua' na mian aijo': I Simon (anu osanggohi i Petrus).

¹⁷ I Yakobus ka' i Yohanes utusnyo, aijo'mo to ana-anak i Zebedeus (aha aiya sinanggohan-Nyo Boanerges, alati'nyo “anak nu gohung”),

¹⁸ i Andreas, i Filipus, i Bartolomeus, i Matius, i Tomas, i Yakobus anak i Alfeus, i Tadeus, i Simon si Patriot,

¹⁹ ka' i Yudas Iskariot anu nongkabisa'i Yesus.

I Yesus ka' i Beelzebul

²⁰ Lapas aijo' i Yesus ninsusule' i laigan. Panyo da'isan mule' na mian tinoka binala gombu sampe i Yesus ka' anu saja' mombatuki Ia madi' kino tempo' nongkaan.

²¹ To mia-mian notatae, “Ia ingulawonmo!” Ka' salatan ihongo nu to utu-utus-Nyo na han aijo', aha nambamo nompoboa Ia.

²² To gulu-gulu' agama anu tinoka lengkat mae i Yerusalem notatae, “Ia sinoku'onmo nu Beelzebul! Kapala nu to roh-roh ma'idek aijo' na anu nombee'i kuasa hi Ia, da timbali molaa' roh ma'idek.”

²³ Saba' i Yesus nolaga mian da'isan aijo', ka' nonsisikakon hi aha to pia-piangkuka na kantuang. “Mosia na timbali roh ma'idek molaa' roh ma'idek,” na koonyo i Yesus.

²⁴ “De sa'angu' na negara mombagi-bagi i uno nu posa'angu'an ka' mompaha idek, negara aijo' madi' moko tahan.

²⁵ Ka' de i uno nu sa'angu' na poto utusan madi' ko posa'angu'an ka' to mia-miannyo, mompaha ka'ika'ideki, poto utusan aijo' timbali mosubali.

²⁶ De i uno nu kuasa nu Ibilis timbali mosubali ka' mompaha ka'ika'ideki, kalaja'an aijo' madi' moko tahan pin, ka' totu-totu'u timbali hansun.

²⁷ Madi' ko samian pe'e moko ala minsoop i uno nu laigan nu samian anu mahoson ka' mongagoi halata'nyo, de ia madi' mompungu pe'e mian mahoson aijo'. Lapas aijo' timbalije ia moko ala mongagoi halata'nyo.

²⁸ Osumbu'mo! De mian anu mombau dosa' ka' montaeakon anu moko kulang, ia daagi' o ampuni.

²⁹ Panyo de ia montalo-taloakon anu ma'idek hi Roh nu Tumpu Allah, ia madi'mo daagi' o ampuni! Kalana montaloakon anu ma'idek, atina'mo na dosa' anu sidu-sidutu'.” (

³⁰ I Yesus nontaloakon sumo aijo', sabab daagi' ko mian anu notatae, tukoonyo i Yesus sinoku'onmo nu roh ma'idek.)

Tinanyo ka' to utu-utus i Yesus

³¹ Ilapas aijo' tina ka' to utu-utus i Yesus tinoka. Aha nontanda'i i sambiha'nyo ka' nonsai mian molaga i Yesus.

³² Tempo'nyo aitu, da'isan na mian anu montikubi Yesus. Aha notatae hi Ia, “Kita Tuuma, tina ka' to utu-utus nu Kita Tuuma kiijo' i sambiha'nyo. Aha molio Kita Tuuma.”

³³ I Yesus nontaami, “Ihe na tinang-Ku? Ihe na to utu-utus-Ku?”

³⁴ Lapas aitu Ia nontoa to mia-mian anu suha-suhang montikubi ia ka' notatae, “Aiyamo na tina ka' to utu-utus-Ku!

³⁵ Mian na utus mombau pongka'oho' nu Tumpu, iamo na utus mo'ane, utus boune ka' tinang-Ku.”