LUKAS 3 - KITAB NU TUMPU ALLA LELE MA'IMAI'

Sisikon i Yohanes anu Mompalamandikan

¹ I Taun sampulu'mo ka' olima' ko na i Tomundo Tiberius nompalentah, i Pontius Pilatus tinimbalimo gubernur i Yudea, ka' i Herodes nompalentahmo i Galilea. I Filipus, utus i Herodes nompalentahmo i da'erah Iturea tiba Trakhonitis, sadang i Lisanias nompalentahmo i Abilene.

² Anu nontoongi to ima-imam daka' aitumo, i Hanas ka' i Kayafas. I Taun aijo'mo na Tumpu notatae hi Yohanes, anak i Zakharia i padang bone'.

³ Saba' i Yohanes namba noyaya i songko-songko na tampat nu Kaunyo Yordan, ka' nompotoka lele lengkat mae hi Tumpu. Noloboo' na i Yohanes, “Balatobatmo na komiu bolimo komiu mombau dosa', ka' komiu tionyo opalamandikan, da Tumpu mongampuni komiu.”

⁴ Aijo' pokakana anu tinulis i uno nu Kitab Nabi Yesaya: “Daagi' ko mian anu molo-moloboo' i padang bone', ‘Posadia na jalan nu Tumpu, pohata na kajalanan-Nyo.

⁵ Iya na anu ma'oa' o tabuhi, iya na bungkutnyo ka' puge'nyo opohata. Jalan anu minggeo-geo', tionyo opohodi', ka' jalan anu milebo-lebok opohata.

⁶ Songko-songko na mian i dunia montoaje Tumpu momposalamat mian!’ ”

⁷ Manjoo' na mian toka hi Yohanes, da o palamandikan. I Yohanes notatae hi aha, “Komiu mian ma'idek! Ihe na nontaloakon komiu madi' mohumpak hukuman lengkat hi Tumpu anu toka mae?

⁸ Potoa'i kalakuanum, de komiu binala tobatmo, madi'mo mombau dosa-dosa' miu! Boli montampu'uni motatae, tukoo miu i Abraham aijo' mompolee' miu! Inau': Te batu pe'e aiya, Tumpu moko ala mombau lee' i Abraham!

⁹ Bobolo' sinadiamo pontaa' kau' toka i baka-bakatnyo. Batu-batu anu madi' mimbua' ma'ima' o taa' ka' o alin i uno nu apu.”

¹⁰ “Jadi, apaa na anu tionyo obau mami?” pinokilawa nu to mia-mian hi Yohanes.

¹¹ I Yohanes nontaami, “Mian anu ko baju' ohua', tionyo mombee'i sa'angu' hi mian anu madi' ko baju'; ka' anu daagi' ko kaanon tionyo mombagi.”

¹² Anu saja' montage hasin tinoka suele hi Yohanes da o palamandikan. Aha nompokilawa, “Tuumangku Gulu', apaa na anu tionyo obau mami?”

¹³ I Yohanes nontaami, “Boli montage hasin molingkuduimo apaa na anu pinoko tantukanmo.”

¹⁴ Daagi' mule' ko' suludadu anu nompokilawa, “Mosia na kami? Apaa na tionyo obau mami?” I Yohanes nontaami, “Boli mompagala mongala mau mule' pa' hi he, ka' boli mongagoi doi, pula-pula mompisala'i anu madi' totu'u. Sukupmo na gajium!”

¹⁵ Tempo'nyo aitu to mia-mian montampu'unimo mompoki-pokilawa, pa' i Yohanes Tomundo anu Momposalamat, anu nunu tanda'i nu aha.

¹⁶ Mokonyo aijo', i Yohanes notatae hi aha iwi-iwi', “Aku mompalamandikan komiu nu uee, panyo tokajemae na mian anu lebe daka' molingkudui aku. Mombukai segot nu sapatu-Nyo pe'e, aku madi' pantas. Nupalamandikanje na komiu nu Roh nu Tumpu ka' apu.

¹⁷ I lima-Nyo ko kiapan bau pontapii ingko-ingkot na gandum sampe belesi'. Gandum Nu posa'angu' i uno nu alang, panyo iwi-iwi' na ota'nyo Nu papui i uno nu apu anu madi' ko kapateannyo!”

¹⁸ Sumo aiya na i Yohanes nompokinde'i to mia-mian tiba ngangahan nu jalan, tempo'nyo ia nompolele Lele Ma'ima'.

¹⁹ Panyo i Herodes anu mongkuasai Galilea pinokinde'an i Yohanes mongkona po'osoan-Nyo tiba i Herodias bengkele' nu utusnyo, ka' mongkona iwi-iwi' na kalakuan ma'idek sangga'at anu binaunyomo.

²⁰ Panyo i Herodes ola ahi' nompaka bau ka'idekannyo ka' nomposoop i Yohanes i uno nu talungku'.

I Yesus pinalamandikan

²¹ Salatan iwi-iwi' na mian aijo' pinalamandikanmo, i Yesus suele pinalamandikanmo. Ka' hau-haunyo Ia binalado'a langit tinabuka'mo,

²² ka' Roh nu Tumpu nintau'mo i buan-Nyo sumo tomonsi' malapati'. Lantas i hongo na potatae nu Tumpu nontaloakon, “Beleyum na Anak-Ku, anu Kuku kalibosi. Beleyum momposanang kinyonyoang-Ku.”

Daputan nu mompolee' i Yesus

²³ Tempo'nyo i Yesus nontampu'unimo pakalaja'annyo, umunnyo kila-kila tolumpulu'mo na taun. Koonyo nu pikilan nu mian, Ia anak i Yusuf, anak i Eli,

²⁴ anak i Matat, anak i Lewi, anak i Malkhi, anak i Yanai, anak i Yusuf,

²⁵ anak i Matica, anak i Amos, anak i Nahum, anak i Hesli, anak i Nagai,

²⁶ anak i Maat, anak i Matica, anak i Simei, anak i Yosekh, anak i Yoda,

²⁷ anak i Yohanan, anak i Resa, anak i Zerubabel, anak i Sealtiel, anak i Neri,

²⁸ anak i Malkhi, anak i Adi, anak i Kosam, anak i Elmadam, anak i Er,

²⁹ anak i Yesua, anak i Eliezer, anak i Yorim, anak i Matat, anak i Lewi,

³⁰ anak i Simeon, anak i Yehuda, anak i Yusuf, anak i Yonam, anak i Elyakim,

³¹ anak i Melea, anak i Mina, anak i Matata, anak i Natan, anak i Daud,

³² anak i Isai, anak i Obed, anak i Boas, anak i Salmon, anak i Nahason,

³³ anak i Aminadab, anak i Admin, anak i Arni, anak i Hezron, anak i Peres, anak i Yehuda,

³⁴ anak i Yakub, anak i Ishak, anak i Abraham, anak i Terah, anak i Nahor,

³⁵ anak i Serug, anak i Rehu, anak i Peleg, anak i Eber, anak i Salmon,

³⁶ anak i Kenan, anak i Arpakhsad, anak i Sem, anak i Nuh, anak i Lamekh,

³⁷ anak i Metusalah, anak i Henokh, anak i Yared, anak i Mahalaleel, anak i Kenan,

³⁸ anak i Enos, anak i Set, anak i Adam, anak nu Tumpu.