LUKAS 22 - KITAB NU TUMPU ALLA LELE MA'IMAI'

Posa'angu'an kahanda'mo mohakop i Yesus

¹ Molame'akon Roti Madi' Mompake Ragi, anu osanggohi Paskah, ohanimo.

² Kapala nu to ima-imam tiba gulu-gulu' agama hau-haunyo molio jalan da o patei na i Yesus hoko-hokot, kalana aha nabuhuk hi mian da'isan.

I Yudas setuju mongkabisa'i Yesus

³ Lapas aitu Ibilis nompinsoopimo i Yudas anu osanggohi Iskariot, aijo'mo sala'samian anu aijo' hi aha sampulu' ka' ohua' na anu saja' mombatuki Yesus.

⁴ Kalana aitu i Yudas namba ka' binasale' tiba kapala nu to ima-imam ka' kapala nu anu monjagai Laigan nu Tumpu pa' mosia na ia timbali mombee' i Yesus hi aha.

⁵ Aha sinanang hondo ka' binajanji' mombee'i doi ia.

⁶ I Yudas mule' sinetujumo, ka' nontampu'unimo nolio kasampatan mombee' i Yesus hi aha hoko-hokot da madi' nusumbu-sumbu' nu mian.

Posadiaon anu okaan i Paskah

⁷ Tinokamo na sinaanyo Molame'akonmo Roti Madi' Mompake Ragi, saba' domba anu okaan i Paskah okolotmo.

⁸ Jadi i Yesus nonsaimo i Petrus ka' i Yohanes, “Lako' posadia na anu okaanto i Paskah.”

⁹ “Iyamae, Kita Tuuma na okahanda'into pontoukaian mami?” na pinokilawa nu aha.

¹⁰ I Yesus nontaami, “Salatan komiu minsoopmo i kota, samian na mo'ane hau-haunyo momboa sa'angu' na selekan ko isinyo uee singkabotmo ka' komiu. Batuki na ia toka i laigan pipinsoopannyo,

¹¹ ka' poto'i hi tumpu nu laigan aijo': Koonyo i Gulu', ‘Iya na tampat, da anu saja' mombatuki Aku, tiba Aku mongkaan kaanon nu Paskah?’

¹² Tumpu nu laigan aijo' mompotiju'je hi komiu sa'angu' na salipi' aita' mae i bangkala daka', daagi'mo iwi-iwi' na talakonannyo. Posadiamo iwi-iwi' i kiita' mae.”

¹³ Atina' ka' i namba na i Petrus tiba i Yohanes, lantas nontokai iwi-iwi' totu'u sumo anu tinaloakonmo i Yesus. Aha nomposadiamo kaanon nu Paskah aijo'.

Palajamuan nu Tumpu

¹⁴ Salatan tinokamo na tempo'nyo mongkaan kaanon nu Paskah aijo', i Yesus sinumuhangmo hingga-hinggat tiba aha iwi-iwi' anu saja' mombatuki Ia i tampat palajamuan.

¹⁵ Lantas ia notataemo hi aha, “Aku mongka'oho' hondo mongkaan kaanon nu Paskah aiya tiba komiu hau-haunyo aku ma'isa mongoa'i sansala!

¹⁶ Kalana aijo' palesayamo: Aku madi'mo po'ule' mongkaan sampe alati'nyo nu palajamuan aiya opaningkoyakonmo i Dunia Bu'ou nu Tumpu.”

¹⁷ Lapas aijo' i Yesus nohangkatmo mangko' nu anggur, lantas nontaloakonmo do'a talima kase hi Tumpu, lantas notatae, “Ala na aiya ka' bagi-bagiakon;

¹⁸ da osumbu' miu: otampu'uni uuka aiya, Aku madi'mo po'ule' monginum anggur aiya sampe Tumpu momponyata'mo totu-totu'u kakuasa'annyo.”

¹⁹ Lapas aijo', i Yesus nongalamo roti. Ka' noko taloakon do'a pontalima kase, Ia nompuge-pugemo roti aijo' nu lima-Nyo lantas nombee'mo hi aha, ka' notatae, “Aiyamo na butong-Ku [anu binee' da bau bagi miu. Bau na aiya da bau ponginau' Aku.”

²⁰ Sumo aitu mule' noko kaan, Ia nombee'mo mangko' nu anggur aijo' hi aha ka' notatae, “Mangko' aiya, salaku pontandai nu Tumpu Allah anu bu'ou anu sinela'mo nu baso'-Ku – baso' anu jinujuhakonmo hi komiu].”

²¹ “Panyo toa! Mian anu monguesani Aku, daagi'mo i aiya hi belengku!

²² Anak nu Mian memang silaka sumo anu tinantukanmo nu Tumpu; panyo mohumpak susa' na mian anu monguesani Ia!”

²³ Sahingga aha nontampu'unimo nompaha poki-pokilawa samian tiba samian, ihe na anu aitu hi aha na mombau han aijo'.

Painggagaan mongkona ihe na anu opopodaka'

²⁴ Anu saja' mombatuki Yesus pinainggagamo mongkona pa' ihe na anu aijo' hi aha na opopodaka'.

²⁵ I Yesus notatae hi aha, “To Tomu-tomundo nu bansa anu madi' monsumbu' Tumpu monsakisa layatnyo, ka' anu ko kuasanyo osanggohi ‘Pohohungi Layat’.

²⁶ Panyo komiu madi' timbali sumo aijo'. Ola ahi', mian anu opopodaka' atina' hi komiu tionyo timbali sumo mian anu talalo i aluknyo, ka' polaya' tionyo timbali sumo posaihon.

²⁷ Ihe na anu lebe daka': mian anu sumuhang mongkaan i meja', kabai anu mongatuni ia? Tantu mian anu sinumuhang aijo'. Panyo Aku aiya hi komiu sumo salaku posaihon.

²⁸ I uno nu kasusa'an-Ku, iwi-iwi' komiu saja' hingga-hinggat ka' Aku.

²⁹ Sumo Tuumangku nombee'imo hak mompalentah, sumo aitumo mule' na Aku mombee' hak aijo' hi komiu.

³⁰ Ka' desumo aijo'mo, komiu timbalimo hingga-hinggat balasanang tiba Aku, de Aku timbalimo Tomundo. Ka' komiu saidi' mae sumuhangmo aita' i sampulu' ka' ohua' na kasuhangan nu Tomundo, da mompalentah sampulu' ka' ohua' na tulunan bansa nu Israel.”

Sisik saidi' mae i Petrus nombahakonmo i Yesus

³¹ “Simon, Simon, hongo! Ibilis binee'anmo kasampatan da monguji' komiu; sumo gandum oga'atakonmo i kilitnyo sahingga anu ma'ima' oga'atakonmo i anu ma'idek.

³² Panyo Aku nondo'akonmo beleyum, Simon, da palesaya nu beleyum anu totu-totu'u boli tolotutus. Ka' de beleyum minsusule'mo mae hi beleng-Ku, beleyum tionyo mompohoson to utu-utusum.”

³³ I Petrus nontaami, “Tumpu, aku halala' minsoop i talungku', ka' mate hingga-hinggat tiba Kita Tuuma!”

³⁴ “Opalesaya Petrus,” tukoo-Nyo i Yesus, “ma'isa pe'e manuk mintutuhu' sinaa aiya, beleyum pintolunmo na momadi'akon Aku.”

Dompet, botutu, kabai bajak

³⁵ Lapas aijo' i Yesus notatae hi aha, “U'utumae tempo'nyo Aku nonsai komiu, madi' nompobee' komiu momboa dompet, botutu, kabai sapatu, kabai kinakulangan apa-apaa na komiu?” “Madi'!” tinaaman nu aha.

³⁶ “Panyo uuka aiya,” koo-Nyo i Yesus, “ihe na ko dompet kabai botutu, tionyo momboa; ka' ihe na madi' ko bajak, tionyo nupobaluk na juba'nyo, da bau pongoli bajak.

³⁷ Kalana, palesaya, ayat nu Kitab nu Tumpu nompoto'imo sumo uuka, ‘Ia o tuuk sumo mian anu ma'idek,’ tionyo aijo' timbalimo i butongku. Kalana apaa na tinulis i Kitab nu Tumpu Allah mongkona aku hau-haunyomo tinimbali tempo' uuka.”

³⁸ “O Tumpu,” koonyo nu anu saja' mombatuki Yesus, “toa, i aiya daagi' ko bajak ohua'.” “Boli!” na koonyo i Yesus.

I Yesus binalado'a i Bungkut nu Zaitun

³⁹ I Yesus nompala'i kota, ka' i namba susumo biasanyo i Bungkutnyo nu Zaitun, ka' anu saja' mombatuki Ia namba suele ka' Ia.

⁴⁰ Salatan tinoka i kiijo', Ia notatae hi aha, “Balado'a, da komiu boli baladosa' de komiu o sobai.”

⁴¹ Lapas aijo' Ia namba sangkiding majo'on lengkat hi aha, kila-kila kojo'onnyo sambunu'an batu.

⁴² Lantas tinolodadupu ka' binalado'a. “Tuuma,” na koo-Nyo, “de timbali opojo'onakon hi beleng-Ku na sansala anu tionyo Ku oa'i aiya. Panyo boli o ala i pongka'oho'-Ku, o ala ahi' samata-mata i pongka'oho' nu Kita Tuuma.” [

⁴³ Samian na malaikat tinoka hi Ia ka' nombee'i kahosonan Ia.

⁴⁴ I Yesus talalomo hondo nongoa'i sansala i kinyonyoa, sahingga Ia nompaka balado'amo totu-totu'u. Liasa'-Nyo sumomo baso' jinumuju' i tano'.]

⁴⁵ Noko balado'a, i Yesus po'ule'mo ninsusule' hi anu saja' mombatuki Ia. Tinokan-Nyo na aha hau-haunyo hoyot, kalana talalomo nolibos.

⁴⁶ Lantas Ia notatae hi aha, “Kadaka' komiu hoyot? Bulamo ka' balado'a da boli komiu nukona nu ponsobai.”

I Yesus i hakop

⁴⁷ Hau-haunyo i Yesus daagi' basisik tinokamo na sanggombu mian. Aha i laya' mae i Yudas, sala'samian anu saja' mombatuki Yesus. Lapas aijo' i Yudas namba hi Yesus, lantas ingookan-Nyo.

⁴⁸ Panyo i Yesus notatae hi ia, “Yudas, te beleyum mongooki atina', beleyum monguesanimo Anak nu Mian?”

⁴⁹ Salatan anu saja' mombatuki Yesus anu i kiijo' nontoa, apaa na anu timbali saidi', aha notatae, “Tumpu, otabasmo mami nu bajak!”

⁵⁰ Lantas sala'samian aitu hi aha nontabas posaihon nu imam daka' nu bajak, sahingga nosahing na bihingnyo koanan.

⁵¹ Panyo koonyo i Yesus, “Bolimo!” Lantas kinanyang-Nyo na bihing nu mian aijo' ka' pina'alinakon-Nyo.

⁵² Lapas aijo', i Yesus notatae hi kapala nu to ima-imam ka' to sulu-suludadu ponjagai Laigan nu Tumpu, tiba to pola-polaya' nu Yahudi anu tinoka i kiijo' kahanda' mohakop Ia, “Te Aku aiya mian ma'idek, sampe komiu toka ka' bajak tiba amangkun kahanda' mohakop Aku?

⁵³ Sansina-sinaa Aku tiba komiu kiijo' i Laigan nu Tumpu, komiu madi' mohakop Aku. Panyo aiyamo na tempo'nyo komiu mohakop, tempo'nyomo kuasa nu pintung montoongimo pamalentahannyo.”

I Petrus nombahakon i Yesus

⁵⁴ Aha nohakop i Yesus ka' binoa-Nyo i laigan nu imam daka', I Petrus nombatuki akaong mae majo'on.

⁵⁵ Itotonga' nu popasan aijo' apu i hopun pinomoakmo, ka' i Petrus namba sinumuhang tiba to mia-mian anu suha-suhang i duhu-duhuknyo.

⁵⁶ Sala'samian pokauhon boune nontoa i Petrus suha-suhang i sohipi' nu apu hopun aijo'; lantas posaihon boune aijo' solaa'mo nonjonohi i Petrus, ka' notatae: “Mian aiya suele u'uka nojajalan ka' i Yesus!”

⁵⁷ Panyo i Petrus nojalo. Ia notatae, “Aku madi' hondo monsumbu' mian aijo'!”

⁵⁸ Madi' pinin mule' samian nontoa i Petrus ka' notatae, “Beleyum suele sala'samian lengkat hi aha!” Panyo i Petrus nontaami, “Madi', misa' aku!”

⁵⁹ Kila-kila sajam ilapas aijo', samian mule' na notatae daka-daka', “Memang mian aiya anu saja' mombatuki Yesus, kalana ia suele mian nu Galilea!”

⁶⁰ Panyo i Petrus nontaami, “Apaa na kooyum atina', madi' kusumbu'!” Tempo'nyo aitu mule' hau-haunyo i Petrus daagi' basisik, manuk nintutuhu'mo.

⁶¹ I Yesus nonsiloi ka' nontoa i Petrus. Lantas i Petrus tinonginau'mo hi Tumpu notatae hi ia, “Ma'isa pe'e manuk mintutuhu' sinaa aiya, beleyum pintolunmo mompojalo Aku.”

⁶² Saba' nosabat na i Petrus lengkat i kiijo' ka' nohohunsuk lewa' i humaang.

I Yesus binia-biangakon ka' dinoke

⁶³ To mia-mian anu hau-haunyo monjagai Yesus, nombia-biangakonmo ka' nondoke Ia.

⁶⁴ Binobodan nu aha na mata-Nyo ka' pinokilawa nu aha hi Ia, “Soba tili'i, ihe na nondoke Oko?”

⁶⁵ Daagi' manjoo' na potatae anu pinompo'ambang nu aha tinaeakon hi Ia.

I Yesus i ahop nu Mian Kopian Daka' nu Agama

⁶⁶ Subu-subu, to pola-polaya' nu Yahudi, kapala nu to ima-imam, tiba gulu-gulu' agama sinilimu'mo, lantas i Yesus binoa pino'ahopakon hi Mian Kopian Daka' nu Agama nu aha.

⁶⁷ “Poto'i hi kami,” koonyo nu aha hi Ia, “pa' Beleyumo aiya na Tomundo anu Momposalamat?” I Yesus nontaami, “De Ku poto'i hi komiu, komiu ahi' madi' palesaya.

⁶⁸ De Ku pokilawa hi komiu, komiu ahi' madi' montaami.

⁶⁹ Panyo otampu'uni uuka, Anak nu Mian sumuhangmo i sasu koanan nu Tumpu anu talalo Mongkuasai.”

⁷⁰ Aha iwi-iwi' notatae, “Desumo atina' Beleyum aiya Anak nu Tumpu?” I Yesus nontaami, “Sumo itina' anu tinaeakonmo miu.”

⁷¹ Sahingga aha notatae, “Madi'mo pilenje ko sakisi! I hongomo hi posi nganga'-Nyo!”