LUKAS 19 - KITAB NU TUMPU ALLA LELE MA'IMAI'

I Yesus tiba i Zakheus

¹ Salatan i Yesus tinokamo i Yerikho, Ia i lumajangmo lau-laus so' noliu-liu kota aijo'.

² I kota kiijo' daagi' ko samian kapala nu topo tage hasin anu kaya, sanggonyo i Zakheus.

³ Ia mongka'oho' montoa pa' ihe na i Yesus aijo', panyo kalana mian talalo da'isan, ka' ia mule' kodo', sahingga ia madi' moko ala nontoa i Yesus.

⁴ Atina' ka' ia nopadeka' noliu-liu to mia-mian lantas noliba' i sangkau na kau', da moko ala montoa i Yesus, gagana' uuka motulumo i kiijo'.

⁵ Salatan i Yesus tinoka i kau' aijo', ia nonsinda nokiita' ka' notatae, “Zakheus, pintau' mae lia-lia'! Kalana aku tionyo sonso' i laiganum sinaa aiya.”

⁶ I Zakheus lia-lia' nintau' ka' nontalima i Yesus, ka' ilame'mo.

⁷ Iwi-iwi' na mian anu nontoa aijo' nontampu'unimo nongo-nguyung. Aha notatae, “Se'! Ia mamba sonso' i laigan nu mian anu madi' ma'ima'!”

⁸ Lapas mule' kiijo' i laigannyo, i Zakheus tinuminjo ka' notatae hi Yesus, “Tumpu, sambahagian na halata'ku, ku halala'akon hi mian kasiasi; tiba ihehe na anu toho' ingakalanku, po'ule' ku bayan hi ia pimpaton lipat!”

⁹ Lantas koonyo i Yesus, “Sinaa aiya beleyum tiba komiu sampoto utusanum pinosalamatmo nu Tumpu, ka' binee'annyomo kantumuu'an bu'ou, kalana beleyum suele lee' i Abraham.

¹⁰ Anak nu Mian toka da molio tiba momposalamat mian anu talas.”

Pongkantuangakon doi mosoni'

¹¹ Hau-haunyo mian daagi' mohongo i Yesus basisik, Ia nonsisikakon sa'angu' na kantuangan. Kalana tempo' aitu Ia kiijo' koko Yerusalem, ka' mian monsangka, saba' Tumpu malia'mo mompalentah susumo Tomundo i dunia aiya.

¹² I Yesus notatae, “Daagi' ko samian lee' nu mian daka' anu namba i lipu' majo'on da o hangkat timbali tomundo, lapas aijo' ninsusule'mo mae.

¹³ Ma'isa pe'e i namba, ia nolagamo sampulu' na mian pokauhonnyo, lantas nombee'i aha toto samian sa'angu' na doi mosoni'. ‘O dagangakon na doi aiya hau-haunyo aku mamba,’ tukoonyo hi aha.

¹⁴ Panyo tumpu nu lipu' aijo' mongka'ideki ia. Jadi, salatan ia i nambamo, aha nonsaimo bobotokon da mompoto'i, ‘Kami madi' mongka'oho' mian aiya timbali tomundo mami.’

¹⁵ Panyo lee' nu mian daka' aijo' i hangkatmo tinimbali tomundo, lantas ninsusule'mo mae i kampungnyo. Lia-lia' ia nolaga to poka-pokauhonnyo da tokamo mae hi ia, da osumbu' sangkuka na ka'untungan anu i humpak nu aha.

¹⁶ Pokauhon anu momona tinokamo ka' notatae, ‘Tuan, sa'angu' na doi mosoni' anu binee'to Tuan, aitu pinotimbalingkumo sampulu'.’

¹⁷ ‘Ma'ima',’ tukoonyo nu Tuan aijo', ‘beleyum pokauhon anu ma'ima'! Kalana i hahan anu toto ise-ise' beleyum timbali opalesaya. Beleyum kupotimbali mongkuasai sampulu' na kota.’

¹⁸ Pokauhon anu ko ohua'nyo tinokamo ka' notatae, ‘Tuan, sa'angu' na doi mosoni' anu binee'to Tuan aijo', pinotimbalingkumo olima'.’

¹⁹ Hi pokauhon aijo', tomundo notatae, ‘Beleyum timbali mongkuasai olima' na kota.’

²⁰ Pokauhon sangga'at tinoka ka' notatae, ‘Tuan, aiya na dointo Tuan, pino'una'ku i lenso.

²¹ Aku mabuhuk hi kita Tuan, kalana kita Tuan mian anu masigo. Kita Tuan mongala apaa na anu misa' posi anu i Tuan, ka' kita Tuan mongala hasin misa' i tampat anu madi' tinugalan i Tuan.’

²² Tomundo aijo' notatae hi ia, ‘Beleyum pokauhon anu ma'idek! Sumo posi potataeum aku mohukum beleyum. Nusumbu' aku mian anu masigo; aku mongala anu misa' anungku, ka' mongala hasin anu misa' i tampat anu madi' tinugalanku.

²³ Desumo aitu ka' kadaka' beleyum madi' momposoop doi aijo' i bank, da de minsusule'mo mae na aku montalimaje bunga nu doi aijo'?’

²⁴ Lapas aijo' i tomundo notatae hi to mia-mian anu tinuminjo i kiijo', ‘Ala na doi aijo' hi ia, ka' bee' hi pokauhon anu ko doi mosoni' sampulu' aijo'.’

²⁵ Panyo to mia-mian aijo' notatae, ‘Tuan, ia nohumpakmo sampulu'!’

²⁶ Tomundo aijo' nontaami, ‘Soba' hongo: mian anu daagi'mo, hi ia opaka bee'i lebe manjoo' mule'. Panyo mian anu madi' ko apa-apaanyo, apaa na anu hi belenyo po'ule' o ala hi ia.

²⁷ Ka' uuka boamo mae na sampo bali'ku haha atina' anu madi' mongka'oho' aku timbali tomundo'nyo. Pateimo na aha iwi-iwi' aiya i ahopku!’ ”

Pinopodaka' na i Yesus ninsoop i Yerusalem

²⁸ Salatan tinaloakonmo i Yesus iwi-iwi' aijo', Ia i lumajangmo namba imoona tiba aha mokiijo' i Yerusalem.

²⁹ Salatan tinokamo koko Betfage ka' Betania i Bungkut nu Zaitun, Ia nonsai ua'aha na mian anu saja' mombatuki Ia mamba imoona.

³⁰ “Lako' i kampung anu ingahopan aijo',” koonyo i Yesus hi aha, “de komiu minsoop i kiijo', komiu montoa sa'angu' na keledai anaknyo sego-segot. Keledai aijo' ma'isa toho' sinake'an nu mian. Bukai ka' boamae na keledai aijo'.

³¹ De nupokilawa nu mian hi komiu, ‘Kadaka' obukai miu na keledai atina'?’ taloakon, ‘Nupalaluimo nu Tumpu.’ ”

³² Ua-ua'aha na anu saja' mombatuki Yesus aijo' namba, tinokannyo iwi-iwi' sumo anu tinaloakon-Nyomo.

³³ Hau-haunyo aha nombukai anak nu keledai aijo', tumpunyo notatae hi aha, “Kadaka' obukaimo miu na keledai atina'?”

³⁴ Aha nontaami, “I Tumpu mompalaluimo.”

³⁵ Lantas binoa nu aha na anak nu keledai aijo' hi Yesus. Lapas aijo' i latasan nu juba' nu aha aita' i keledai, ka' nontulungi Yesus natisake'.

³⁶ Hau-haunyo Ia notulu sake-sake' i keledai aijo', to mia-mian nompolatasmo juba' nu aha i jalan.

³⁷ Salatan i Yesus malia'mo toka i Yerusalem, i jalan pintuahan nu Bungkutnyo Zaitun, iwi-iwi' na anu mombatuki Ia da'isan hondo aijo', lewa'mo noloboo'akon mompuji' Tumpu Allah ka' montalima kaseh hi Ia, kalana iwi-iwi' na anu okabangangi sinakisianmo nu aha.

³⁸ Aha noloboo'akon, “Balakatiakon na Tomundo anu tinokamo mae kalana sanggo nu Tumpu! Salamat i suluga', ka' o puji' na Tumpu Allah!”

³⁹ Toto sangga'at na mian nu Farisi kiijo' i totonga' nu mian da'isan notatae hi Yesus, “Tuumangku Gulu', tewa'mo na anu mombatuki Kita Tuuma, da momohokot.”

⁴⁰ I Yesus nontaami, “Palesayamo! De aha momohokot, batu-batu haha aiya na moloboo'.”

I Yesus nohangi Yerusalem

⁴¹ Salatan i Yesus malia'mo ohani i Yerusalem, ka' nontoa kota aijo', Ia nohangimo.

⁴² Tukoo-Nyo, “Paya', na kino'ima'nyo de sinaa aiya nusumbu'mo apaa na anu timbali mompodaagi' mae paladamean! Panyo uuka beleyum madi' moko ala montoa.

⁴³ Beleyum mongoa'ije sa'angu' na tempo', tempo' sampo bali'um mongewa iyayamae; aha montumbuhi ka' mompakisa beleyum lengkat mae i songko-songko na tampat.

⁴⁴ Nugalisi nu aha na beleyum tiba tumpu nu lipu'um; ka' madi' ko sambatu pe'e na batu nu pojohok nu aha tasusun i tampatnyo, kalana beleyum madi'mo mompalahatikan pa' hi pian na Tumpu toka mae momposalamat beleyum!”

I Yesus ninsoop i Laigan nu Tumpu

⁴⁵ I Yesus ninsoop i Laigan nu Tumpu, ka' i laa'nyo na to daga-dagang i kiijo'.

⁴⁶ “I uno nu Kitab nu Tumpu,” tukoo-Nyo hi aha, “tinulis sumo uuka: Tumpu notatae, ‘Laiganku opotimbali tampat balado'a.’ Panyo komiu mompotimbalimo petaa nu tololang!”

⁴⁷ Sansina-sinaa i Yesus mompogulu' i Laigan nu Tumpu. Kapala nu to ima-imam tiba gulu-gulu' agama, tiba to tu'a-tu'anyo nu Yahudi mongindi da o pateimo na Ia,

⁴⁸ panyo madi' mohumpak jalan da obau na han aijo', kalana iwi-iwi' na mian saja' mohongo Ia, ka' mongka'ima'i potatae-Nyo.