KOLOSE 1 - KITAB NU TUMPU ALLA LELE MA'IMAI'

¹ To Utu-utus mian anu palesayamo hi Tumpu i Kolose anu tulu-tulutan hondo na mosa'angu' tiba i Kristus!

² Salaku rasul i Kristus Yesus, – kalana ingangkatmo nu Tumpu Allah – aku, i Paulus hingga-hinggat tiba utusto i Timotius, monginde'i ka' nongamalakon da Tumpu Tuumanto mombee'i balakat ka' kabilahian hi komiu.

Do'a pontalima kase

^3-4 Kami nohongomo, tukoonyo komiu pinalesayamo hi Yesus Kristus ka' komiu nongkalibosimo iwi-iwi' mian anu pinalesayamo hi Tumpu Allah. Aijo' na sababnyo tempo'nyo kami nondo'akonmo komiu, kami saja' montaloakon talima kase hi Tumpu, Tuuma Tumpunto hi Yesus Kristus.

⁵ Komiu pinalesayamo ka' komiu nongkalibosimo, kalana komiu monginde'i apaa na anu pinosadiamo i suluga' nu Tumpu bau bagi miu. Komiu nohongomo han aijo', salatan Lele Ma'ima' anu totu'u pinotokamo hi komiu.

⁶ Lele lengkat mae hi Tumpu aijo' tinogilelemo i songko-songko na dunia, ka' kantumuu'an nu mian lajangmo binalakatan nu lele aijo', pokakana sumo kantumuu'an miu binalakatanmo salatan pe'e tempo'nyo komiu nohongomo balakat nu Tumpu, ka' totu-totu'u ingoa'anmo.

⁷ Han aijo' pinotokamo i Epafras hi komiu Utus, sangalu anu okalibosi mami. Ia atina' anu tulu-tulutan na mokalaja hi Kristus, mokalaja bau kapentinganto.

⁸ Hi ia na pinohongoan mami tukoonyo, kalana kuasa lengkat mae hi Roh nu Tumpu, sahingga komiu timbalimo nompaha kali-kalibosi.

⁹ Mokonyo aijo' kami saja' mondo'akon komiu salatanmo pe'e kami nohongo komiu. Pinoita mami hi Tumpu, da Roh nu Tumpu Allah mombee'i kapandean ka' da mangalati', sahingga komiu monsumbu' totu-totu'u kahanda' nu Tumpu.

¹⁰ Tiba jalan anu sumo aijo' komiu timbali tumuu' montuluti kahanda' nu Tumpu, ka' saja' momposanang kinyonyoa-Nyo, sahingga i uno nu iwi-iwi na apaa komiu moko ala mohasinakon hahan anu ma'ima'. Ka' mosia na komiu monsumbu' Tumpu mompaka pintuang suele.

¹¹ O'amalakon da kuasa anu lengkat mae hi Tumpu anu talasanggo, komiu opohoson, sahingga komiu moko ala sabaan na mongoa'i sansala i han iwi-iwi', ka' sabaan ka' sanang na kinyonyoa

¹² ka' montalima kase hi Tuuma. Kalana Tuumamo aijo' na nompobee' komiu timbali montalima apaa na anu pinosadiakonmo nu Tumpu bau bagi nu miannyo anu palesayamo i uno nu kalaja'an-Nyo anu majingka.

¹³ Ia nolapasakonmo kita i kuasa nu kapintungan ka' nolalinmo i uno nu kalaja'an nu Anak-Nyo anu Nu kalibosi.

¹⁴ Kalana Anak-Nyo aijo', sahingga kita pinobebasmo; alati'nyo dosa'to iwi-iwi' ingampunanmo.

I Kristus ka' kalaja-Nyo

¹⁵ I Kristus te gambalan nu butong nu Tumpu anu madi' kantoan; i Kristus te anak anu tumpe, lebe penting molingkudui iwi-iwi' apaa na anu pinotimbalimo.

¹⁶ Kalana nontului jalan hi Ia, Tumpu nompotimbalimo iwi-iwi na apaa anu i suluga' ka' i bawo nu dunia, iwi-iwi na apaa na anu kantoan ka' anu madi' kantoan, tibamo suele iwi-iwi na roh anu ko kuasa ka' anu mompalentah. Songko-songko na dunia aiya pinotimbalimo montului jalan hi Kristus ka' da baumo anu i Kristus.

¹⁷ Ma'isa pe'e iwi-iwi na apaa daagi', i Kristus momonanyo polo-polo'mo daagi'. Ka' kalana Ia ahi', sahingga iwi-iwi na apaa tinondaagi'mo i posi-posi tampatnyo.

¹⁸ Iamo na kapala nu butong-Nyo, aijo'mo jama'at, kalana Ia na pinolengkatan nu kantumuu'an nu jama'at aijo'. Iamo na anak anu tumpe, anu sini-sinilaka ka' momonanyo po'ule' pinotumuu', da ola posi Ia na anu timbali tahahumo penting molingkudui iwi-iwi na apaa.

¹⁹ Ola posi Tumpu na mongkahanda'i da iwi-iwi na apaa anu daagi' i butong nu Tumpu, daagi' suele ingko-ingkot hi butong nu Anak-Nyo.

²⁰ Ka' montului jalan hi Anak-Nyo aijo' mule' Tumpu nomputusimo da mompotimbali iwi-iwi na apaa mompo'ule' ma'ima' tiba Ia – mau iwi-iwi na apaa anu i dunia, mau mule' anu i suluga'. Tumpu nombau aijo' montului jalan Anak-Nyo sinilaka i kau' salib.

²¹ Naipuan mae komiu majo'on hi Tumpu. Komiu monsampo bali' Ia, kalana kalakuan ka' pikilan miu ma'idek.

²² Panyo uuka aiya Anak-Nyo sinilakamo kalana Tumpu nombaumo da pompahasumbu'an miu tiba Ia timbali mompo'ule' ma'ima'. Tiba jalan aijo' komiu timbali oboa mangadap hi Tumpu i uno nu han anu susi', ma'ima' ka' madi' ko ide'nyo.

²³ Panyo tantu komiu tataap ahi' saja' palesaya, ka' tuminjo hoso-hoson i kapalesaya'an miu. Boli saidi' mae komiu molapasakonmo anu otaha'imani, anu binee'mo hi komiu salatan komiu nontalimamo Lele Ma'ima' lengkat mae hi Tumpu. Lele aijo' pinokalebamo hi toto samian i songko-songko na dunia. Ka' kalana aijo' suele aku, i Paulus, tinimbalimo posaihon.

Anu kinalaja i Paulus i jama'at

²⁴ Uuka aku sanang na mongoa'i sansala kalana komiu. Kalana sansala anu ingoa'anmo nu butongku, aku momposampa'mo apaa na anu tionyo daagi' nu oa'i i Kristus kalana jama'at-Nyo, aijo'mo butong-Nyo.

²⁵ Tumpu nonsaimo aku da timbali posaihon hi jama'at-Nyo bau kapentingan miu. Aku tionyo mompotokakon lele lengkat mae hi Tumpu, iwi-iwi';

²⁶ aijo'mo lele anu kopinnyo mo'atu-atumo na taun, anu u'utu pe'e mae pinohowini nu Tumpu hi mian iwi-iwi', panyo uuka aiya pinonyata'nyomo hi mian anu palesayamo hi Ia.

²⁷ Hi mian-Nyo anu palesayamo aijo', Tumpu momponyata'mo palias na ko'ima'nyo ka' na katalasanggoan na lahasia-Nyo aijo' hi mian iwi-iwi'. Lahasia-Nyo aijo' atina'mo: I Kristus i unomo nu butong miu, alati'nyo komiu suele mongoa'imo katalasanggoan nu Tumpu Allah.

²⁸ I Kristusmo atina' na anu opolele mami toka hi toto samian. Kami mompotuka' ka' mompagala hondo-hondo mompogulu' aha iwi-iwi'. Kahanda' mami aijo'mo da batu-batu mian timbali oboa hi Tumpu Allah, sumo mian anu motu'amo na pikilan i uno nu hahan rohani, kalana nosa'angu'mo tiba i Kristus.

²⁹ Da timbali moko ala montokai han aijo', aku nokalajamo juku-jukut. Aku binala usahamo nu kahosonanku iwi-iwi' anu binee'mo i Kristus hi belengku ka' anu nokalajamo totu-totu'u nu kuasanyo i uno nu butongku.