I RUT 4 - KITAB NU TUMPU ALLA LELE MA'IMAI'

I Boas no'osoamo tiba i Rut

¹ I Boas nambamo i tampat anu lewa' kasingkabotan i sabatan daka' i kota. Salatan ia sinumuhangmo ikiijo' notulumo na mo'ane samian, koonyo i Boas i uno nu kinyonyoanyo, aitumo na sampoto'utusan anu daagi' mae ohani hi Elimelekh. Lantas i lagamo i Boas na ia, “Kita utus, imbo' suhang pe'e mae aiya!” Mian aijo' tinokamo mae ka' sinumuhang.

² Lapas aijo' i Boas nonsale'mo aha sampulu' na to tu'a-tu'anyo i kota aijo' da suele sumuhang hingga-hinggat ikiijo'. Salatan aha sinumuhangmo,

³ notataemo na i Boas hi mian anu sampoto'utusan mae aijo' tiba ia, “I Na'omi ninsusule'mo mae lengkat i Moab. Uuka aiya ia kahanda'mo mompobaluk tano' anu i Elimelekh, langkai'nyo anu sini-sinilakamo, sampoto'utusanto mae.

⁴ Ka' kugantang beleyum tionyo ahi' suele monsumbu' han aijo'. De beleyum ko kahanda' mongoli, poto'i mae aiya i ahop nu to mia-mian anu suha-suhang i aiya. De madi', yo poto'imo mae hondo-hondo, kalana ola kita ohua' na ko hak i han aijo'; beleyum na anu momona lapas aijo' akuje.” Tinaaman nu mian aijo', “Ii', akumo na mongoli.”

⁵ Lantas notataemo na i Boas, “Ma'ima'mo desumo itina'. Panyo de beleyum na mongoli tano' aijo' hi Na'omi, beleyum ahi' suele na mongala i Rut, boune nu aha Moab, balu nu anak i Na'omi. Kalana tano' aijo' tataap sabole-bole ahi' tumpunyo anu nu lee' nu mian anu sinilakamo.”

⁶ Mian aijo' nontaami, “Desumo itina' aku madi' moko ala. Uuka aiya aku madi'mo ko hak salaku mian anu momona tionyo mongoli tano' aijo'. Madi' ko gunanyo na aku mongoli, kalana tano' aijo' tantu madi' timbali da lee'kumo na tumpunyo. Sahanyo beleyumo na mongoli.”

⁷ Tempo'nyo aitu de mian mompobaluk kabai mompotolos pa' apaa na anunyo, saba' anu bau pompohoson han aijo', kalana haknyo nambamo hi sangga'at biasanyo anu nompobaluk mongukat sandannyo lantas obee' hi anu mongoli. Sumo aijo' na jalannyo de to mia-mian hi aha Israel mompohoson hak nu kaputusan mompobaluk ka' mongoli tano'.

⁸ Kalana aijo', salatan mian aijo' notatae hi Boas, “De aku na mongoli,” Ia mongukatakonmo sandannyo lantas nu bee'mo hi Boas.

⁹ Sahingga notataemo na i Boas hi to tu'a-tu'anyo ka' hi iwi-iwi' mian sangga'at anu ikiijo', “Sinaa uuka belemiu iwi-iwi' na baumo sakisi, saba' akumo na mongoli hi Na'omi iwi-iwi' apaa na anu i Elimelekh langkai'nyo sini-sinilakamo ka' to ana-anaknyo aijo'mo i Kilyon tiba i Mahlon.

¹⁰ Ka' suele mule' akumo na mongosoai i Rut, boune nu aha Moab balu i Mahlon anu sini-sinilakamo, baumo bengkele'ku. Jadi tano' aijo' tataap anu nu sampoto'utusan nu mian anu sini-sinilakamo aijo'. Ka' lee'nyo suele tataap sabole-bole hi sampoto'utusannyo mae ka' jojoong kiijo' i kota nu aha. Sabole-bole o inau' to utu-utus, sinaa aiya, belemiu iwi-iwi' nonsakisimo.”

¹¹ To tu'a-tu'anyo ka' mian sangga'at anu ikiijo' notatae, “Ii', kamimo na nonsakisi. O amalakon mami da Tumpu mompotimbali bengkele' nu beleyum aijo' sumo i Rahel ka' i Lea anu nohampeakon manjoo' na anak hi langkai'nyo nu aha i Yakub. O amalakon mami da beleyum kaya hi aha to mia-mian lee' mae i Efrata ka' o amalakon da beleyum talasanggo i Betlehem.

¹² O amalakon mami da to ana-anak anu nubee' nu Tumpu hi beleyum kalana nongalamo boune anu ma'isa bengkele' aiya mompotimbali belemiu sa'anakan susumo i Peres anak i Yehuda tiba i Tamar.”

I Boas tiba lee'nyo mae

¹³ Sahingga ingalamo i Boas na i Rut binaunyomo bengkele'nyo. Tumpu nombalakatimo i Rut sahingga ia pinoboamo lantas nohampeakonmo samian na anak mo'ane.

¹⁴ To bou-boune notataemo hi Na'omi, “O puji' na Tumpu! Ia nombee'imo samian na makumpu mo'ane hi belento sinaa aiya da mompotuu' beleyum. O amalakon da anak aitu timbali talasanggo hi aha Israel!

¹⁵ Monian nu belento aijo' mongkalibosi hondo belento. Ia nombee'imo belento lebe molingkudui apaa na anu binee'mo nu aha popitu' na anak mo'ane. Uuka aiya ia nombee'imo samian na makumpu mo'ane hi beleyum anu momposanangje kantumuu'an nu beleyum ka' mompotuu' belento de bengkele'mo na belento.”

¹⁶ I Na'omi nongalamo anak aijo' ka' pinotuu'nyomo tiba talalo hondo nu kalibosi.

¹⁷ To bou-boune anu mompaha'ohani na laigan tiba aha nonsanggohimo anak aijo' i Obed. De aha singkabot mian, “Nupoto'imo nu aha, kino anakmo mo'ane samian!” I Obedmo aijo' na anu saidi' mae tinimbali tuumanyo i Isai, ka' i Isaimo aijo' na tuuma i Daud.

^18-22 Ka' aiyamo na tundulan i Daud, lengkat pe'e mae hi Peres, aijo'mo: I Peres, i Hezron, i Ram, i Abinadab, i Nahason, i Salmon, i Boas, i Obed, i Isai, i Daud.