I RUT 2 - KITAB NU TUMPU ALLA LELE MA'IMAI'

I Rut nokalajamo hi ale' i Boas

¹ I Na'omi daagi' ko samian na mian poto'utusan mae nu langkai'nyo anu sini-sinilakamo i Elimelekh. Mian aijo' kaya ka' talasanggo. Sanggonyo i Boas.

² Daagi' kino sansinaan i Rut notataemo hi Na'omi, “Kita Tinangku, ku poita da aku mamba i ale' da' montoluki gandum pa' ko anu manabu' i lima nu anu mompadak. Ku tutugi tantu daagi' ko mian anu mompobee' aku mombau sumo aijo'.” “Ii'mo anaku!” tinaaman i Na'omi, “lako'mo!”

³ Jadi nambamo na i Rut i ale' ka' nontoluki gandum nompayuntun to mia-mian anu mompadak. Pinopatunyo tempo'nyo aijo' ia nambamo hi ale' i Boas.

⁴ Madi' pinin i Boas tinokamo lengkat mae i Betlehem ka' nontabea'i to mia-mian anu mompadak, “O amalakon da Tumpu monjagai belemiu,” na koonyo. To mia-mian anu mompadak nontaami, “O amalakon da Tumpu mombalakati belento Tuuma.”

⁵ Lantas i Boas nolelekimo hi mandonnyo, “Ihe na boune aijo'?”

⁶ Mandonnyo aijo' nontaami, “Ia boune aha bansa Moab anu sala'je tinoka tiba i Na'omi lengkat mae i Moab.

⁷ Ia nompoita hi belengku da opobee' na mompayuntun to mia-mian anu mompadak montoluki gandum anu manabu'. Daagi' pe'e subu na ia nokalajamo, ka' uuka aiya sala'je na nilawe aiya i tahop.”

^8-9 Lantas i Boas notataemo hi Rut, “Soba hongo pe'e mae. Bolimo mamba montoluki gandum hi ale' nu mian sangga'at. Pontolukimo i aiya tiba to mia-mian anu mokalaja hi belengku aha to bou-boune. Otoa iya na mamba pompadakan nu aha. Saja' obatuki na aha ka' boli matijo'on hi aha. De beleyum megotmo ala na uee i gumbang haha aijo' anu ingisianmo nu to momo'ane anu mokalaja. Pinalentahkonkumo da aha boli mompoposia beleyum.”

¹⁰ Nohongo potatae aijo', i Rut tinolodadupumo hi ahop i Boas ka' notatae, “Kita Tuuma, misa' konanyo na aku mohumpak ka'ima'an lengkat hi belento Tuumangku. Aku aiya mian anu lengkat mae i salipu'an ka' madi' pantas otoa mae nu belento Tuumangku!”

¹¹ I Boas nontaami, “Aku nohongomo iwi-iwi' apaa na anu binaumo nu beleyum hi monian nu beleyum salatanmo pe'e langkai' nu beleyum sinilaka. Ku sumbu' na beleyum nompala'imo mae tuuma ka' tinanu beleyum ka' tano' kinahampean nu beleyum kalana tokamo mae ka' jojoongmo i aiya tiba to mia-mian anu ma'isa mompahasumbu' beleyum.

¹² Ku amalakon da Tumpu mombalosi iwi-iwi' na ka'ima'an nu beleyum. Ku amalakon da beleyum mohumpak apaa na anu patut obee' hi beleyum nu Tumpu, Tumpu Allah Israel, kalana beleyum tinokamo mae mompoita da Ia na monjagai.”

¹³ Tinaaman i Rut, “Kita Tuuma totu-totu'u mongkanonongimo mae aku mau mule' aku madi' pokakana tiba anu mokalaja hi belento Tuuma. Kanonongan nu belento Tuuma nomposanangmo hondo kinyonyoangku.”

¹⁴ Salatan tempo'nyomo pongkaananmo, i Boas notataemo hi Rut, “Imbo' nongkaanmo. Aiya na salamotnyo.” Jadi i Rut nongkaanmo hingga-hinggat tiba anu mompadak haha aijo'. Ka' mule' i Boas nombee'imo gandum anu pinanggang hi ia, ka' kinaanmo i Rut sahingga nobosumo. Noko kaan, daagi' kino labinyo.

^15-16 Lapas aijo' i Rut namba mule' nontoluki gandum. Salatan ia nambamo i Boas nompoto'imo hi anu mompadak haha aijo', “De ia montoluki gandum anu pinaha puutanmo, bakasmo. Boli montaloakon ia kabai montambuha'i ia dumo ia ma'ambang. Aitu pe'e sahanyo ototonggolakon nu belemiu na mombubut toto sangkoeng anu pinaha puutanmo aijo' ka' opotimpas da nu toluki.”

¹⁷ I Rut saja'mo nontoluki gandum aijo' i ale' sahingga tinoka ohanimo malom. Noko lapas na ia nongutut koengan nu gandum haha aijo', ia nohumpak me ise-ise' sampulu'mo na kilogram.

¹⁸ Lapas aijo' ia ninsusule'mo i kota ka' nomboamo anu lewa' tinolukannyo aijo' ka' pinotoanyomo hi moniannyo aijo' na konjoo'nyo. Ka' suele binee'annyomo na moniannyo aijo' kaanon anu madi' pinoko ingkotan kinaannyo.

¹⁹ Sahingga notataemo na i Na'omi hi ia, “Iya na pinohumpakan nu beleyum iwi-iwi' aiya? Hi ale' ihe na pinontolukian nu beleyum sinaa uuka? O amalakon da Tumpu Allah mombalakati mian anu nongakanonongimo beleyum aijo'!” Sahingga sinisikmo i Rut hi Na'omi, tukoonyo ale' anu pinontolukiannyo gandum aijo', aijo'mo anu nu samian na mo'ane sanggonyo i Boas.

²⁰ “Anaku, mian itina' daagi' sampoto'utusanto anu daagi' ohani hondo mae tiba kita,” na koonyo i Na'omi, “Ia memang tionyo ahi' montolukakon kasusa'anto. O'amalakon da Tumpu mombalakati ia. Tumpu saja' mongganapi apaa na anu jinanji'-Nyomo, mau hi aha anu daagi' tutuu', mau mule' hi aha anu sinilakamo.”

²¹ Lapas aijo' notatae mule' na i Rut, “O kita Tinangku, pinoto'i nu mian kiijo' mule' da aku sabole-bole saja' montoluki gandum hingga-hinggat tiba anu mokalaja hi ia sampeje ahi' iwi-iwi' opoko padakmo.”

²² “O'anaku,” tinaaman i Na'omi hi Rut, “Memang lebe ma'ima' beleyum mokalaja hingga-hinggat tiba boune haha itina' hi ale' i Boas. Kalana de beleyum mamba hi ale' nu mian sangga'at boli-boli beleyum nupoposiamo nu mian kiijo' mae!”

²³ Mokonyo aijo' i Rut saja'mo nombatuki to bou-boune anu mokalaja haha aijo' hi ale' i Boas. Ia nontoluki gandum kiijo' mae sampeje i ningkotmo na nompadak – maumo anu pinadakmo momona, maumo anu pinadak i mihinyo. Ka' tempo'nyo aijo' i Rut jojoong hi moniannyo.