IMAMAT 9 - KITAB NU TUMPU ALLA LELE MA'IMAI'

I Harun nonsombahkonmo koloban

¹ Salatan ilapasmo na sinaanyo nombalakati aijo', tinokamo i sinaa ko ialunnyomo, i Musa nolagamo i Harun tiba to ana-anaknyo tiba to pola-polaya' nu bansa Israel.

² Koonyo i Musa hi Harun, “Ala mae sa'angu' na sapi' lakinyo anu daagi' bata'nyo ka' sa'angu' na domba lakinyo, ohu-ohua' aijo' anu madi' ko panyakitnyo. Sombahkon ohu-ohua' na binatang aijo' hi Tumpu, sapi' lakinyo bau koloban pongampuni dosa' ka' domba lakinyo bau koloban anu opotunu.

³ Lantas pokau na bansa Israel monsombahkon sa'angu' na mee' lakinyo bau koloban pongampuni dosa' ka' sa'angu' na anak nu sapi' tiba sa'angu' na anak nu domba toto sa'angu' umunnyo sataunmo ka' madi' ko panyakitnyo da bau koloban anu opotunu.

⁴ Pokau na aha monsombahkon mule' sa'angu' na sapi' lakinyo ka' sa'angu' na mee' lakinyo bau koloban pompodame. Iwi-iwi' aijo' tionyo ahi' nusombahkon nu aha hi Tumpu hingga-hinggat tiba koloban kaanon anu osombahkon anu ginalo'an nu lanya' kalana sinaa aiya Tumpu tokamo mae hi aha.”

⁵ Iwi-iwi' na anu pinotuunmo i Musa binoamo nu aha i ahop nu Kemah, ka' iwi-iwi' na mian sinihukmo ikiijo' da monsombahmo Tumpu.

⁶ Lantas i Musa notataemo, “Tumpu nompokaumo belemiu mombau aiya de belemiu moko ala montoa jingka de tokamo na Tumpu.”

⁷ Lapas aijo' ia notataemo hi Harun, “Lako'mo i mezbah ka' toukaimo na koloban bau pongampuni dosa' ka' koloban anu opotunu, da dosa' nu beleyum ka' dosa' nu mian nu ampunimo nu Tumpu. Bau na aijo' susumo anu pinalentahkonmo nu Tumpu.”

⁸ Lantas i Harun nambamo i mezbah ka' nongkolotmo sapi' lakinyo anu okolobanakon bau pongampuni dosa'nyo.

⁹ To ana-anak i Harun nomboamo mae baso' nu binatang aijo' hi Harun ka' ia nolobongmo kangkam nu limanyo i baso' aijo' ka' nonsapuakonmo i tanduk opa-opat i pasu'nyo haha aijo' i mezbah. Lapas aijo' labinyo nu baso' aijo' dinudu'akonnyomo i paningkokoan nu mezbah.

¹⁰ Lompo'nyo, dampilannyo ka' bahagian anu talalo hondo ma'ima' i binatang aijo' pinotununyomo i mezbah susumo anu pinalentahkonmo nu Tumpu hi Musa.

¹¹ Panyo antoknyo ka' kilitnyo nu binatang aijo' pinotununyomo i sambiha'nyo nu kemah.

¹² Lapas aijo' i Harun nongkolotmo binatang bau koloban anu opotunu da pongampuni dosa'nyo. To ana-anak i Harun nomboamo mae baso'nyo nu binatang aijo' hi ia, lantas ia nondudu'akonmo i sulapa'nyo opa-opat nu mezbah.

¹³ Lapas aijo' aha nombee'mo hi ia ubaknyo ka' bahagian sangga'at nu binatang aijo' lantas ia mompotunumo i mezbah.

¹⁴ Lapas aijo' isi nu kompongnyo ka' pa'anyo nu binatang aijo' binaso'annyomo ka' pinotununyomo tiba koloban anu opotunu i mezbah.

¹⁵ Lapas aijo' ia nonsombahkonmo mee' bau koloban pongampuni dosa' nu mian. Mee' aijo' kinolotnyo ka' sinombahkonnyomo susumo koloban bau pongampuni dosa'nyo.

¹⁶ Lapas aijo' ingalanyo mule' na binatang bau koloban anu opotunu, ka' sinombahkonnyomo susumo atulan anu biasa obau.

¹⁷ Lapas aijo' sinombahkonnyomo na koloban kaanon; ingalanyo sangkakup na labu, ka' pinotununyomo i mezbah. Aijo' bau pontuangi koloban anu opotunu sansina-sinaa.

¹⁸ Lantas kinolotnyomo mule' na sapi' sa'angu' lakinyo ka' sa'angu' na domba lakinyo bau koloban pompodame aha mian. To ana-anak i Harun nomboamo mae baso' nu binatang aijo' hi ia, lantas dinudu'akonnyomo i sulapa'nyo opa-opat nu mezbah.

¹⁹ Bahagian anu ko lompo'nyo i sapi' ka' mee' aijo' nupotimpas nu aha,

²⁰ i saha'annyo ohu-ohua' nu binatang aijo', lantas nupotunumo i Harun i mezbah.

²¹ Saha'annyo ka' pa'anyo koanan nu binatang aijo' nu sombahkonmo salaku palasombahan anu oboa hi Tumpu. Aijo' baumo bagi nu to ima-imam susumo anu pinalentahkonmo i Musa.

²² Salatan moko sombahkonmo iwi-iwi' koloban haha aijo', i Harun montangkakon limanyo sasu mokiijo' hi mian Israel ka' mombalakatimo aha, lantas ia mintatau'mo.

²³ Lapas aijo' i Musa ka' i Harun ninsoopmo i Kemah nu Tumpu. Lapas mae aha mosabatmo ka' mombalakatimo mian. Lantas iwi-iwi' na aha mian Israel montoamo jingka kalana tokamo na Tumpu.

²⁴ Monti-montik Tumpu montau'akonmo mae apu anu montoyo'i sampe mingkot na koloban anu opotunu ka' baha-bahagiannyo anu ko lompo'nyo i mezbah. Salatan aha mian Israel nontoamo, aha lewa'mo nontaligalai lantas tinolodadupumo nonsombahmo.