IMAMAT 6 - KITAB NU TUMPU ALLA LELE MA'IMAI'

¹ Tumpu nombee'mo atulan haha aiya hi Musa.

^2-3 Toto samian tionyo ahi' monsombahkon koloban de ia baladosa'mo hi Tumpu kalana madi' mongka'oho' monsule'akon balang anu pino una' hi ia nu sangalunyo, kabai nongakalimo mian, nontomangmo balang nu sangalunyo kabai i humpaknyomo na anu nolapusmo, panyo mojalo ka' binasumpa'mo.

^4-5 Mian anu ko sala'nyo aijo' tionyo ahi' mombayan iwi-iwi' apaa na anu i humpaknyo aijo' kalana geguan. Salatan ia i humpakmo nombaumo sala', ia tionyo ahi' mombayan iwi-iwi' hi tumpunyo, ka' mombayan mule' uampulu' na palasen.

⁶ Koloban bau polugi'i, mian aijo' tionyo ahi' monsombahkon sa'angu' na domba kabai mee' lakinyo anu madi' ko panyakitnyo ka' o'una'i olinyo susumo angga'nyo anu biasa obau i Kemah nu Tumpu.

⁷ Imam mongkolobanakon bau pontobus dosa' nu mian aijo' sahingga ia nu ampunimo nu Tumpu.

Koloban anu opotunu

⁸ Tumpu nompokaumo i Musa,

⁹ mombee' hi Harun ka' hi to ana-anaknyo atulan haha aiya, mongkona koloban anu opotunu iwi-iwi'. Imam tionyo ahi' mompaha potimpas koloban anu opotunu i mezbah ka' mompobakas ikiijo' sampahu, ka' apunyo tionyo ahi' saja' moak.

¹⁰ Salatan koloban aijo' tinimbalimo abu', imam mompusokmo saluan kodo' ka' juba' hude lenan na kina'ut tionyo ahi monsahukimo abu' anu ko lompo'nyo aijo' i mezbah ka' mompo'una' i sambiha'nyo koko mezbah.

¹¹ Lapas aijo' ia tionyo ahi' mombolosimo baju' ka' momboamo abu' aijo' i sambiha'nyo nu pinombauan Kemah i tampat anu pinosadiamo samata-mata pompo'una'an aijo'.

^12-13 Sansina-sinaa toka daagi' subu imam tionyo ahi' momposunmo apu i mezbah mompaha potimpasmo koloban anu opotunu i mezbah ka' mompotunu lompo'nyo anu o ala i koloban bau pompodame. Apu aijo' i mezbah tionyo ahi' sabole-bole moak ka' madi' timbali mohe.

Koloban kaanon anu osombahkon

¹⁴ Aiya na to atu-atulannyo mongkona koloban kaanon anu osombahkon hi Tumpu. Koloban aijo' tionyo ahi' oboa i ahop nu mezbah nu samian lee' mae i Harun.

¹⁵ Ia tionyo ahi' mongala sangkakup na labu anu ma'ima' hondo tiba lanya' ka' iwi-iwi' na kamangian anu opalalui lantas opotunumo i mezbah salaku bau pontandai saba' iwi-iwi' na koloban aijo' sinombahkonmo hi Tumpu. Nohongnyo nu koloban aijo' momposanangmo kinyonyoa nu Tumpu.

^16-17 Labinyo nu labu tionyo ahi' obaumo roti anu madi' ko raginyo ka' okaan nu to ima-imam i tampat anu samata-mata bau pongkaanan, aijo'mo i natan nu Kemah nu Tumpu. Aijo'mo na bagi nu to ima-imam anu binee'mo nu Tumpu hi aha anu ingala i koloban kaanon. Kaanon aijo' susi' hondo, sumomo koloban anu bau pongampuni dosa' ka' koloban bau polugi'i.

¹⁸ Sampe toka sidu-sidutu' batu-batu mo'ane lee' i Harun timbali mongkaan roti aijo', aijo'mo na bagi nu aha anu saja' o ala i kaanon anu osombahkon hi Tumpu. Mian sangga'at anu sala' mongkanyang kaanon anu kinolobanakonmo aijo' mohumpak balaa' kalana mahoson hondo na kasusi'annyo.

¹⁹ Tumpu nombee'mo hi Musa atulan haha aiya,

²⁰ mongkona koloban de mombalakatimo samian na imam lee' i Harun. Sinaa ia obalakatimo ia tionyo ahi' monsombahkon sa'angu' na kilogram labu nu gandum hi Tumpu. Sambahagian tionyo ahi' osombahkon daagi' subu ka' labinyo mule' mamalom.

²¹ Labu aijo' tionyo ahi' ogalo'i nu lanya' lantas opotunu i pompanggangan, lapas aijo' o dihi-dihismo ka' osombahkonmo salaku bau koloban kaanon anu osombahkon. Nohongnyo nu koloban aijo' momposanangmo kinyonyoa nu Tumpu.

²² Sampe toka sidu-sidutu' batu-batu lee' i Harun anu obalakatimo timbali Imam Daka' tionyo ahi' monsombahkon koloban sumo aijo'. Iwi-iwi' tionyo ahi' opotunu ka' osombahkonmo hi Tumpu.

²³ Batu-batu koloban anu osombahkon nu mian tionyo ahi' opotunu iwi-iwi', sangkunyit pe'e madi' timbali okaan.

Koloban bau pongampuni dosa'

^24-25 Tumpu nompokaumo i Musa mombee' hi Harun ka' to ana-anaknyo atulan haha aiya mongkona koloban bau pongampuni dosa'. Binatang koloban bau pongampuni dosa' tionyo ahi' o kolot i tampat pongkolotan binatang bau koloban anu opotunu. Koloban aijo' susi' hondo.

²⁶ Imam anu monsombahkon koloban aijo' tionyo ahi' mongkaan i tampat anu samata-mata bau pongkaanan, aijo'mo i natan nu Kemah nu Tumpu.

²⁷ Mau mule' ihe kabai pa' apaa na anu nukona nu antok nu potuu'on aijo' mohumpak balaa' kalana mahoson hondo na kasusi'annyo. De sa'angu' na baju' nu pinjitimo nu baso' nu binatang aijo' baju' aijo' tionyo ahi' obaso'i i tampat anu samata-mata pombaso'ian.

²⁸ Kuhon tano' anu opake pongkulukian antoknyo nu koloban aijo' tionyo ahi' oposo'mo. De kuhon besak na pinake, kuhon aijo' tionyo ahi' ogegesi ka' opobelesi' nu uee.

²⁹ Batu-batu mo'ane anu i uno nu auan nu to ima-imam timbali mongkaan koloban anu susi' hondo aijo'.

³⁰ Binatang anu opotunu pongampuni dosa' anu o ala sambagian na baso'nyo oboa i Salipi' Susi', tionyo ahi' opotunu iwi-iwi' ka' madi' timbali okaan.