IMAMAT 5 - KITAB NU TUMPU ALLA LELE MA'IMAI'

Hipian na palalumo monsombahkon koloban bau pongampuni dosa'?

¹ Koloban bau pongampuni dosa' palalu hondo osombahkon: De daagi' ko mian anu opoita mombee'i katalangan salatan mian kopian momputusimo palakala, lantas madi' mombee'i katalangan mongkona apaa na anu tinoanyomo kabai anu i hongonyomo sahingga ia tionyo ahi' montanggungmo kasala'annyo.

² De daagi' ko mian anu sinala'mo kalana anu madi' ototonggolakon tinimbalimo nahumimi', kalana nonsala' kanyangmo anu mahumimi', susumo bangke' nu binatang ka' lapas mae sininsumbu'je apaa na anu binaunyomo.

³ De daagi' ko mian anu sinala'mo kalana madi' nontotonggolakon nongkanyangmo anu mahumimi', anu lengkat mae hi manusia, ka' lapas mae sininsumbu'je apaa na anu binaunyomo.

⁴ De daagi' ko mian anu sinala'mo kalana binasumpa'mo i han anu madi' totu'u da mombau maumo pa'a apaa, ka' lapas mae sinsumbu'je apaa na anu binaunyomo.

⁵ Toto sa'angu' na palakala aijo', mian anu ko sala'nyo tionyo ahi' mongakui kasala'annyo.

⁶ Ka' bau pontobus dosa'nyo, ia tionyo ahi' momboa sa'angu' na domba kabai mee' behenyo osombahkon hi Tumpu. Imam tionyo ahi' monsombahkon koloban aijo' da dosa' nu mian aijo' o ampuni.

⁷ Panyo de mian anu ko sala'nyo madi' moko ala momposadia domba kabai mee' bau pontobus dosa'nyo, ia tionyo ahi' momboa tomonsi' sapatau lakinyo tiba behenyo kabai tomonsi' malapati' anu daagi' bata'nyo, sa'angu' bau koloban pongampuni dosa' ka' sa'angu' mule' bau koloban anu opotunu.

⁸ Tomonsi haha aijo' tionyo ahi' oboa hi imam. Imam na tionyo ahi' monsombahkon pe'e momona tomonsi anu tinantukanmo bau koloban pongampuni dosa'. Gogohong nu tomonsi' aijo' tionyo ahi' opijak, panyo ubaknyo boli okolongakon.

⁹ Baso' nu tomonsi' aijo' tionyo ahi' opipi'akon i sulapa'nyo opa-opat nu mezbah ka' labinyo opinjitakon i paningkokoan nu mezbah salaku koloban bau pongampuni dosa'.

¹⁰ Lapas aijo' imam monsombahkonmo tomonsi' anu ko ohua'nyo bau koloban anu opotunu susumo koonyo nu atulan. Sumo aijo'mo na imam monsombahkon koloban pontobus dosa' nu mian aijo', sahingga ia nu ampunimo nu Tumpu.

¹¹ De mian anu ko sala'nyo madi' moko ala momposadia tomonsi' sapatau behenyo tiba lakinyo kabai tomonsi' malapati' bau koloban pongampuni dosa', ia tionyo ahi' momboamo labu sa'angu' na kilogram. Labu aijo' madi' timbali ogalo'i nu lanya' nu zaitun kabai tiba kamangian, kalana koloban aijo' te koloban bau pongampuni dosa', misa' koloban kaanon anu osombahkon.

¹² Labu aijo' tionyo ahi' oboa hi imam. Imam tionyo ahi' mongala sangkakup na labu aijo' salaku tanda saba' iwi-iwi' kinolobanakonmo hi Tumpu. Labu anu sangkakup aijo' tionyo ahi' opotunu i mezbah salaku koloban kaanon. Aijo'mo na kolobannyo bau pongampuni dosa'.

¹³ Sumo aijio' na imam monsombahkon koloban bau pontobus dosa' nu mian aijio', sahingga ia nu ampunimo nu Tumpu. Labu labinyo aijo' baumo bagi nu imam, susumo biasa obau mongkolobanakon gandum.

Koloban bau polugi'i

¹⁴ Tumpu nombee'mo hi Musa atulan haha aiya.

¹⁵ De daagi' ko mian madi' nontotonggolakon nombaumo dosa' ola kalana tinongkolilimo na nombee' anu tionyo ahi' osombahkon hi Tumpu, saba' mian aijo' tionyo ahi' momboa koloban bau polugi'i. Koloban aijo' tionyo ahi' sa'angu' na domba kabai mee' lakinyo anu madi' ko panyakitnyo ka' olinyo o angga'i susumo angga'nyo anu biasa obau i Kemah nu Tumpu.

¹⁶ Mian aijo' tionyo ahi' mombayan apaa na anu u'utu mae kinolilimannyomo, ka' montuangi mule' uampulu' na palasen. Lapas aijo' ia tionyo ahi' mombee'mo binatang aijo' hi imam, ka' imam mongkolobanakonmo bau pontobus dosa' nu mian aijo' sahingga nu ampunimo nu Tumpu.

¹⁷ De daagi' ko mian madi' nontonggolakon nombaumo dosa', panyo nolanggaimo sala'sa'angu' na palentah nu Tumpu, mian aijo' sinala'mo ka' tionyo ahi' montanggungmo kasala'annyo.

¹⁸ Jadi koloban bau polugi'i ia tionyo ahi' momboa sa'angu' na domba kabai mee' lakinyo anu madi' ko panyakitnyo, ka' olinyo o angga'i susumo angga'nyo anu biasa obau i Kemah nu Tumpu. Imam mongkolobanakon bau pontobus dosa' nu mian aijo', sahingga ia nu ampunimo nu Tumpu.

¹⁹ Aijo'mo na koloban bau polugi'i kalana kasala'an anu binaunyomo hi Tumpu.