IMAMAT 4 - KITAB NU TUMPU ALLA LELE MA'IMAI'

Koloban bau pontobus to dosa-dosa' anu madi' ototonggolakon

¹ Tumpu nompokau i Musa

² da mombebakon hi bansa Israel tukoonyo mau mule' ihe na anu madi' nontotonggolakon mombau dosa', panyo nolanggaimo sala'sa'angu' na palentah haha aijo' nu Tumpu, tionyo ahi' montuluti atulan aiya.

³ De anu baladosa' Imam Daka', sahingga bansa Israel suele sala'mo, ia tionyo ahi' mongkolobanakon sa'angu' na sapi' lakinyo anu daagi' bata'nyo ka' anu madi' ko panyakitnyo hi Tumpu da dosa'nyo o ampuni.

⁴ Sapi' aijo' tionyo ahi' nuboa i sabatan nu Kemah nu Tumpu. Imam Daka' tionyo ahi' mompotiik limanyo i ubak nu binatang aijo', lantas o kolot i ahop nu Kemah.

⁵ Sambagian na baso'nyo tionyo ahi' nu boa i uno nu Kemah.

⁶ Lantas ia tionyo ahi' molobongakon kangkam nu limanyo i baso' aijo' ka' mompipi'akon pimpitun i ahop nu lalanse' anu mongoloti Salipi' Susi'.

⁷ Sambagian na baso' aijo' tionyo ahi' o sapuakon i tanduk haha aijo' anu pinaha pokona i pasu'nyo nu mezbah bau pompapuan kamangian anu manohong i uno nu Kemah, ka' labinyo tionyo ahi' odudu'akon i paningkokoan nu mezbah anu bau pompotunuan koloban anu aijo' i sabatan nu Kemah.

⁸ Imam tionyo ahi' mongala iwi-iwi' na lompo'nyo nu sapi' lakinyo aijo', aijo'mo tohitisnyo anu monsalaputi isi nu kompongnyo,

⁹ dampilannyo tiba lompo'nyo ka' bahagian anu ma'ima' hondo i atenyo.

¹⁰ Iwi-iwi' aijo' tionyo ahi' nu potunu i mezbah anu pompotunuan koloban susumo koloban bau pompodame.

¹¹ Panyo antoknyo nu sapi' aijo', kilitnyo, ubaknyo, tengkenyo, isi nu kompongnyo ka' sansangga'atannyo tibamo kompong ninisnyo,

¹² jadi iwi-iwi', ola bahagian anu pinosi potademo na tionyo ahi' oboa i sambiha' nu kemah. Ikiijo' mae sapi' aijo' tionyo ahi' opotunu i kau' anu pinosunmo i tampat pongalinan abu' aijo'mo tampat anu pinosadiamo samata-mata mongkona han aijo'.

¹³ De anu baladosa' aha iwi-iwi' mian nu Israel, panyo sinaduakon nu anu madi' tinotonggolakon panyo nolanggaimo sala'sa'angu' na palentah nu Tumpu,

¹⁴ saba' sampa lia-lia' de dosa' aijo' osumbu'mo, aha mian tionyo ahi' momboa sa'angu' na sapi' lakinyo anu daagi' bata'nyo i ahop nu Kemah nu Tumpu. Binatang aijo' tionyo ahi' osombahkon bau koloban pongampuni dosa'.

¹⁵ To pola-polaya' nu bansa tionyo ahi' mompotiik lima nu aha i ubak nu binatang aijo' lantas o kolotmo i tampat aijo'.

¹⁶ Imam Daka' tionyo ahi' momboa sambahagian na baso' nu binatang aijo' i uno nu Kemah.

¹⁷ Ikiijo' ia tionyo ahi' molobongakon kangkam nu limanyo i baso' aijo' lantas nu pipi'akonmo pimpitun i ahop nu lalanse' anu mongoloti Salipi' Susi'.

¹⁸ Sambahagian mule' tionyo ahi' osapuakon i tanduk haha aijo' anu pinaha pokona i pasu'nyo nu mezbah anu bau pompauan kamangian i uno nu Kemah ka' labinyo tionyo ahi' odudu'akon i paningkokoan nu mezbah tampat pompotunuan koloban anu kiijo' i ahop nu sabatan nu Kemah.

¹⁹ Iwi-iwi' na lompo'nyo nu binatang aijo' tionyo ahi' o ala lantas opotunu i mezbah.

²⁰ Mombau anu susumo aijo', sumomo mombau anu osombahkon na sapi' lakinyo bau koloban pongampuni dosa'. Sumo aijo' na Imam Daka' monsombahkon koloban anu bau pontobus to dosa-dosa' nu mian hi Tumpu, sahingga dosa' haha aijo' nu ampunimo nu Tumpu.

²¹ Lapas aitu sapi' lakinyo aijo' tionyo ahi' oboamo i sambiha'nyo ka' opotunumo i sambiha'nyo nu kemah susumo monsombahkon sapi' lakinyo anu bau koloban pongampuni dosa' nu Imam Daka' aijo'. Sumo aijo' na monsombahkon koloban pongampuni dosa' nu mian.

²² De anu baladosa' samian na anu montoongi kakuasa'an panyo madi' tinotonggolakon, panyo nolanggaimo sala'sa'angu' na palentah nu Tumpu,

²³ saba' sampa malia-lia' de osumbu'mo, ia tionyo ahi' mongkolobanakon sa'angu' na mee' lakinyo anu madi' ko panyakitnyo da bau pongampuni dosa'nyo.

²⁴ Ia tionyo ahi' mompotiik limanyo i ubak nu binatang aijo' lantas o kolot i sasu utara nu mezbah, tampat pongkolotan binatang koloban anu opotunu.

²⁵ Imam tionyo ahi' molobongakon kangkam nu limanyo i baso' nu binatang aijo' lantas monsapuakon i tanduk haha aijo' anu pinaha pokona i pasu'nyo nu mezbah ka' odudu'akon na labinyo i paningkokoan nu mezbah.

²⁶ Lapas aijo' iwi-iwi' na lompo'nyo nu binatang aijo' tionyo ahi' opotunu i mezbah, susumo koloban anu bau pompodame. Sumo aijo' na Imam monsombahkon koloban pontobus dosa' nu samian anu montoongi kakuasa'an, sahingga mian aijo' nu ampunimo nu Tumpu.

²⁷ De samian na layat mombaumo dosa' madi' tinotonggolakon panyo nolanggaimo sala'sa'angu' na palentah nu Tumpu,

²⁸ saba' sampa lia-lia' de osumbu'mo ia tionyo ahi' mongkolobanakon sa'angu' na mee' behenyo anu madi' ko panyakitnyo.

²⁹ Ia tionyo ahi' mompotiik limanyo i ubak nu binatang aijo', lantas o kolot i sasu utara nu mezbah tampat pongkolotan binatang koloban anu opotunu.

³⁰ Imam tionyo ahi' molobongakon kangkam nu limanyo i baso' nu binatang aijo', lantas monsapuakon i tanduk haha aijo' anu pinaha pokona i pasu'nyo nu mezbah ka' odudu'akon na labinyo i paningkokoan nu mezbah.

³¹ Iwi-iwi' na lompo'nyo nu binatang aijo' tionyo ahi' o ala susumo anu kinolobanakonmo bau pompodame. Lompo'nyo aijo' tionyo ahi' nupotunu nu imam i mezbah, da hongohisnyo momposanang kinyonyoa nu Tumpu. Sumo aijo' na Imam monsombahkon koloban pontobus dosa' nu samian na layat sahingga mian aijo' nu ampunimo nu Tumpu.

³² De ko mian mongkolobanakon sa'angu' na domba da bau pongampuni dosa'nyo, domba aijo' tionyo behenyo ka' madi' ko panyakitnyo.

³³ Ia tionyo ahi' mompotiik limanyo i ubak nu binatang aijo', lantas o kolot i sasu utara nu mezbah tampat pongkolotan binatang koloban anu opotunu.

³⁴ Imam tionyo ahi' molobongakon kangkam nu limanyo i baso' nu binatang aijo', lantas monsapuakon i tanduk haha aijo' anu pinaha pokona i pasu'nyo nu mezbah ka' mondudu'akon labinyo i paningkokoan nu mezbah.

³⁵ Lapas aijo' iwi-iwi' na lompo'nyo nu binatang aijo' tionyo ahi' o ala susumo anu kinolobanakonmo bau pompodame. Lompo'nyo aijo' tionyo ahi' opotunu i mezbah, hingga-hinggat tiba koloban kaanon anu osombahkon hi Tumpu. Sumo aijo' na imam monsombahkon koloban bau pontobus dosa' nu mian aijo', sahingga ia nu ampunimo nu Tumpu.