IMAMAT 3 - KITAB NU TUMPU ALLA LELE MA'IMAI'

Koloban bau pompodame

¹ De ko mian monsombahkon sa'angu' na sapi' anu okolobanakon bau pompodame, sapi' aijo' lakinyo timbali, kabai behenyo timbali, panyo anu madi' ko panyakitnyo.

² Mian anu monsombahkon aijo' tionyo ahi' mompotiik limanyo i ubak nu binatang aijo' lantas o kolot i ahop nu sabatan nu Kemah nu Tumpu. To ima-imam lee' i Harun tionyo ahi' mondudu'akon baso' nu sapi' aijo' i sulapa'nyo opa-opat nu mezbah aijo'.

³ Koloban bau pompodame anu osombahkon hi Tumpu, imam tionyo ahi' monsombahkon baha-bahagiannyo nu binatang aijo'; tohitisnyo anu nonsalaputi isi nu kompongnyo,

⁴ dampilannyo tiba lompo'nyo ka' bahagian anu ma'ima' hondo i atenyo.

⁵ Iwi-iwi' aijo' hingga-hinggat tiba koloban anu opotunu sangga'at tionyo ahi' opotunu i mezbah. Hongohisnyo nu koloban anu okaan aijo' momposanangmo kinyonyoa nu Tumpu.

⁶ De anu osombahkon bau koloban pompodame aijo' sa'angu' na domba kabai mee', binatang aijo' lakinyo timbali, kabai behenyo timbali, panyo madi' ko panyakitnyo.

⁷ De ko mian monsombahkon sa'angu' na domba, ia tionyo ahi' momboa i Kemah nu Tumpu.

⁸ Ikiijo' ia tionyo ahi' mompotiik limanyo i ubak nu domba aijo' lantas o kolot i ahop nu Kemah. Lantas imam tionyo ahi' mondudu'akon baso' nu domba aijo' i opa-opat na sulapa'nyo nu mezbah.

⁹ Koloban bau pompodame anu osombahkon hi Tumpu, imam tionyo ahi' monsombahkon baha-bahagiannyo nu domba aijo'; lompo'nyo, sa'a-sa'angu' na ikunyo anu ko lompo'nyo ka' mongkolongakon okeket i kekentutnyo, tohitisnyo anu monsalaputi isi nu kompongnyo,

¹⁰ dampilannyo tiba lompo'nyo ka' bahagian anu ma'ima' hondo i atenyo.

¹¹ Imam anu mokalaja tionyo ahi' mompotunu iwi-iwi' aijo' i mezbah bau koloban kaanon anu osombahkon hi Tumpu.

¹² De anu osombahkon sa'angu' na mee', mian anu monsombahkon tionyo ahi' momboa i Kemah nu Tumpu.

¹³ Ikiijo' ia tionyo ahi' mompotiik limanyo i ubak nu mee' aijo' lantas o kolot i ahop nu Kemah. Imam tionyo ahi' mondudu'akon baso' nu binatang aijo' i opa-opat na sulapa'nyo nu mezbah.

¹⁴ Koloban kaanon anu osombahkon hi Tumpu, imam tionyo ahi' monsombahkon baha-bahagian nu mee' aijo'; tohitisnyo anu monsalaputi isi nu kompongnyo,

¹⁵ dampilannyo tiba lompo'nyo ka' bahagian anu ma'ima' hondo i atenyo.

¹⁶ Imam anu mokalaja tionyo ahi' mompotunu iwi-iwi' aijo' i mezbah. Hongohisnyo nu koloban anu okaan aijo' momposanangmo kinyonyoa nu Tumpu. Iwi-iwi' na lompo'nyo nu binatang aijo' osombahkon hi Tumpu.

¹⁷ Mian nu Israel madi' hondo-hondo timbali mongkaan lompo'nyo kabai baso'nyo. Atulan aijo' opake sampetoka sidu-sidutu' ka' tionyo ahi' otuluti nu aha batu-batu mian Israel mau mule' pa' iyamo mae na kajojoongannyo.